ពិព័រណ៍ការងារថ្នាក់ជាតិត្រូវបានបញ្ចប់ដោយផ្លែផ្កា និងទាក់ទាញអ្នកចូលរួមទស្សនារាប់ម៉ឺននាក់

ពិព័រណ៍ការងារ និងផលិតភាពជាតិឆ្នាំ២០២៤ ត្រូវបាន​ប្រកាស​បិទ​បញ្ចប់​ដោយ​ភាព​សប្បាយ​រីករាយ ដែលទាក់ទាញ់សាធារណជនយ៉ាងច្រើនកុះករមកចូលរួមទស្សនា។ ព្រឹត្តការណ៍នេះ ក៏​បាន​ជំរុញឲ្យនិយោជក និងអ្នកស្វែងរកការងារ បានជួបគ្នានៅមួយកន្លែងដោយងាយស្រួល ដើម្បី​ធ្វើ​ការ​ជ្រើសរើសកម្លាំងពលកម្មតាមតម្រូវការ និងដាក់ពាក្យសុំការងារដែលខ្លួនពេញចិត្ត។

ក្នុង​បទ​សម្ភាសន៍ជាមួយព័ត៌មាន ប៊ីធីវី លោក ជា សំភាស់ អ្នកគ្រប់គ្រងធុរកិច្ចធនធានមនុស្ស នៃ​ធនាគារ កាណាឌីយ៉ា បានរៀបរាប់ឲ្យដឹងថា ក្នុងរយៈពេល២ថ្ងៃ នៃកម្ម​វិធី​ពិព័រណ៍​នេះ​បាន​កត់​សម្គាល់​ឃើញ​ថា មានអ្នកចូលរួមទស្សនាច្រើនជាងឆ្នាំកន្លងទៅ។ ជាក់ស្តែងនៅស្ត់រប់ កាណា​ឌីយ៉ា ក្រុមការងារទាំងអស់មិនមានពេលសម្រាកនោះទេ ដោយសារ​មាន​ការ​សួរនាំ​ព័ត៌មាន​ការងារ​ជា​ច្រើន​ពីក្រុមយុវជន សិស្សនិស្សិត និងអ្នកស្វែងរកការងារ ខណៈក្រុមហ៊ុន​បាន​នាំ​យក​ឱកាស​ការងារ​ជា​ច្រើនកន្លែង និងជាច្រើនមុខតំណែងមកបង្ហាញពីតម្រូវការកម្លាំងពលកម្ម។

លោកបានចាត់ទុកព្រឹត្តិការណ៍នេះទៀតថា គឺជាយន្តការដ៏សំខាន់ និងមាន​សារៈ​ប្រយោជន៍​ដល់​វិស័យ​ឯកជន ដោយសារ បានជួយដល់ក្រុមហ៊ុនក្នុងការស្វែងរកបុគ្គលិកប្រកបដោយសក្តានុពល និង​ឆាប់រហ័សផងដែរ។

លោក ជា បូរ៉ា ប្រធានផ្នែកធនធានមនុស្សជាន់ខ្ពស់ នៃក្រុមហ៊ុន អ អិម អេ ខេមបូឌា បានឲ្យ ប៊ីធីវី ដឹងដែរថា ព្រឹត្តការណ៍នេះ ពិតជាមានសារៈណាស់ ថែមទាំង​ផ្តល់​ឱកាស​ការងារ​ជា​ច្រើន​កន្លែង​ដល់​មនុស្សគ្រប់គ្នា មិនថាតែសិស្សនិស្សិត ឬអ្នកស្វែងរកការងារធ្វើប៉ុណ្ណោះទេ គឺទទួល​បាន​អត្ថ​ប្រយោជន៍ដូចគ្នា។ លោកបានបន្ថែមថា ជារួមការ​សហការ​ជាមួយ​នឹង​ទីភ្នាក់​ងារ​ជាតិ​មុខរបរ និងការងារ (NEA) គឺជួយឱ្យក្រុមហ៊ុនទទួលបានបេក្ខជនល្អៗ និងអាច​ជួយ​ផ្សព្វ​ផ្សាយ​ពី​ក្រុម​ហ៊ុន​ជូនដល់សាធារណជនទូទៅឱ្យបានស្គាល់ស្ថាប័នរបស់លោកផងដែរ។

សូមបញ្ជាក់ថា នេះជាឆ្នាំទី១៤ ដែលទីភ្នាក់ងារជាតិមុខរបរ និងការងារ (NEA) នៃក្រសួងការងារ និង​បណ្តុះបណ្តាលវិជ្ជាជីវៈ បានរៀបចំពិព័រណ៍ការងារ និងផលិតភាពជាតិ នេះឡើង ក្នុងគោ​ល​បំណង​បង្កើត​ជាវេទិកាដ៏ធំ រវាងអ្នកស្វែងរកការងារ និយោជក និងអ្នកផ្តល់ការ​អប់រំ​បណ្តុះ​បណ្តាល ​ដើម្បីដាក់ពាក្យស្វែងរកការងារ ជ្រើសរើសបុគ្គលិក ផ្សព្វផ្សាយព័ត៌មានឱកាសការងារ វគ្គអប់រំ​បណ្តុះបណ្តាល និងប្រឹក្សាយោបលអាជីព ការងារ និងវិជ្ជាជីវៈ, បង្កើនការយល់ដឹង បណ្តុះ​ផ្នត់​គំនិត និងផ្សព្វផ្សាយពីការបង្កើនផលិតភាពការងារ តាមរយៈសិក្ខាសាលា ដែលចូលរួម​ចែក​រំលែក​ដោយ​វាគ្មិនដែលមានបទពិសោធន៍ក្នុងវិស័យការងារ និងដើម្បីង្កើត​ជាវេ​ទិកា​តភ្ជាប់​បណ្តាញ​ទំនាក់ទំនងក្នុងចំណោមក្រសួង ស្ថាប័ន និងក្រុមហ៊ុនដែល​ចូល​រួម​ព្រឹត្តិការណ៍​នេះ​ជា​ដើម​៕ អត្ថបទ៖ ឈិត បូរ៉ាវី