អភិបាលរាជធានីដឹកនាំប្រជុំត្រៀមលក្ខណៈរៀបចំព្រះរាជពិធីបុណ្យអុំទូក ខណៈចំនួនទូក និងប្រទីបមានច្រើនជាងឆ្នាំមុន

ភ្នំពេញ ៖ ព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ឆ្នាំ២០២៤នេះមានទូក ង ចូលរួមប្រកួនប្រជែងចំនួន ៣៤៦ទូក លើសពីឆ្នាំកន្លងទៅ ខណៈចំនួនប្រទីបមកពីតាមក្រសួង ស្ថាប័នក៏មានច្រើនជាងឆ្នាំមុន។

​នាព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ដែលនឹងប្រព្រឹត្តទៅរយៈពេល ៣ថ្ងៃ គឺថ្ងៃព្រហស្បតិ៍ សុក្រ និងសៅរ៍ ទី១៤-១៥-១៦ ខែវិច្ឆិកា ឆ្នាំ២០២៤នេះ គឺមានទូក ង ចូលរួមប្រកួនប្រជែងចំនួន ៣៤៦ទូក លើសពីឆ្នាំកន្លងទៅ ៩ទូក និងមានកីឡាករ ចំណុះទូកប្រមាណជាង ២ម៉ឺននាក់ និងប្រទីបចំនួន ៣៥ប្រទីប ខណៈឆ្នាំ២០២៣កន្លងទៅមានចំនួនត្រឹមតែ ២៩ប្រទីបប៉ុណ្ណោះ។

នេះបើតាមការបង្ហាញឱ្យដឹងក្នុងកិច្ចប្រជុំស្តីពីការត្រៀមលក្ខណៈរៀបចំព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ឆ្នាំ២០២៤ នៅសាលារាជធានីភ្នំពេញ នារសៀលថ្ងៃទី២៨ ខែតុលា ឆ្នាំ២០២៤ ក្រោមអធិបតីភាព ឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ។

ឯកឧត្តម ឃួង ស្រេង មានប្រសាសន៍ថា ការរក្សាសន្តិសុខ សណ្តាប់ធ្នាប់សាធារណៈ ការរៀបចំសោភណ្ឌភាពរាជធានីភ្នំពេញឱ្យកាន់តែានភាព្រស់ស្អាតជារឿងធំ ក្នុងនាមជាអាជ្ញាធរត្រូវតែធ្វើឱ្យបានល្អបំផុត។ ចំពោះកីឡាករចំណុះទូក ង ទាំងជាង ២ម៉ឺននាក់ត្រូវស្នាក់នៅទីតាំងចំនួន ២ ដែលរៀបចំដោយរដ្ឋបាលរាជធានីភ្នំពេញ ក្នុងនោះទីតាំងទី១ នៅឃ្លាំងសាំង ខណ្ឌឬស្សីកែ វនិងទីតាំងទី២ នៅតំបន់រង្វង់មូលនាងមច្ឆាក្នុងតំបន់អភិវឌ្ឍន៍OCIC ខណ្ឌជ្រោយចង្វា ដើម្បីងាយស្រួលក្នុងការការពារសន្តិសុខជូន។

ក្នុងកិច្ចប្រជុំនោះឯកឧត្តម ឃួង ស្រេង ក៏បានធ្វើការណែនាំ ដោយមិនឱ្យមានការលក់ដូរនៅលើបណ្តោយផ្លូវមួយចំនួន ដែលមានទីតាំងនៅក្នុងព្រះរាជពិធីនេះផងដែរ ជាមួយនិងការពិនិត្យមើលឱ្យម៉ត់ចត់ចំពោះការផ្ញើកង់ ម៉ូតូ ដោយអាជ្ញាធរខណ្ឌត្រូវតែម្ចាស់ការ ស្គាល់ និងដឹងច្បាស់ពីអត្តសញ្ញាណអ្នកទទួលផ្ញើរ ជៀសវាងបាត់បង់ម៉ូតូប្រជាពលរដ្ឋគ្មានការទទួលខុសត្រូវ។

ជាមួយគ្នានោះកិច្ចប្រជុំក៏បានគិតគូពីការរៀបចំបន្ទប់ទឹកឱ្យបានច្រើនទីតាំង ទិតាំងសង្គ្រោះ និងទីបញ្ជាការស្រាលក្នុងកិច្ចប្រតិបត្តិការណ៍ការពារសន្តិសុខសុវត្ថិភាពក្នុងព្រះរាជពិធីបុណ្យ ការទប់ស្កាត់ ការរៀបចំលំហូរចរាចរណ៍ចំពោះរថយន្តមួយចំនួនចូលមកក្នុងរាជធានី និងទប់ស្កាត់ជនអាណាថាជាដើម។

ក្នុងកិច្ចប្រជុំនេះដែរ ឯកឧត្តម ឃួង ស្រេង អភិបាលរាជធានីភ្នំពេញក៏បានណែនាំឱ្យអាជ្ញាធរខណ្ឌទាំង១៤ ត្រូវចលនាប្រជាពលរដ្ឋ ពិសេសម្ចាស់ភោជនីយដ្ឋាន សណ្ឋាគារ ខុនដូរ ត្រូវលើកទង់ជាតិ ទង់សាសនា ទង់ព្រះមហាក្សត្រ និងចងបដាពាក្យស្លោក អមដោយការតុបតែងលម្អរចនាបំភ្លឺភ្លើងពណ៌ចម្រុះនៅតាមបណ្តាអង្គភាព ទីតាំងអាជីវកម្ម និងគេហដ្ឋានរបស់ខ្លួនឱ្យបានផុលផុស និងស្រស់ស្អាត៕

អត្ថបទ ៖ ប្រាក់ វ៉ាន់ដា