ប្រជានុរាស្ត្របង្ហាញក្ដីគោរព និងសាទរព្រះមហាក្សត្រ ក្នុងឱកាសគ្រងព្រះរាជសម្បត្តិ គម្រប់ខួបលើកទី២០

ប្រជានុរាស្ត្រជាច្រើនបានមកកម្សាន្តនៅពីមុខព្រះបរមរាជវាំង ក្នុងឱកាសរៀបចំ ពិធីអបអរសាទរ ខួបលើកទី២០ ព្រះរាជពិធីគ្រងរាជសម្បត្តិ ព្រះករុណា ព្រះបាទសម្ដេចព្រះបរមមនាថ នរោត្តម សីហមុនី។ ពួកគាត់បានបង្ហាញនូវក្ដីគោរពស្រឡាញ់ និងថ្វាយព្រះពរ អបអរ​សាទរ​ក្នុង​ការ​ឡើង​គ្រ​​ងព្រះរាជសម្បត្តិរបស់ព្រះអង្គក្នុងរយៈពេល ២០ឆ្នាំមកនេះ។

ជា​ការ​អបអរសាទរ រៀងរាល់ឆ្នាំ ថ្ងៃទី ២៩ ខែតុលា ត្រូវបានកំណត់​ជា​ថ្ងៃ​ឈប់​សម្រាក​សម្រាប់​ប្រជាពលរដ្ឋ​ទូទាំងប្រទេស។ ក្នុងឆ្នាំ ២០២៤ ជាគម្រប់ខួបលើកទី ២០ នៃការឡើងគ្រង​ព្រះ​រាជ​សម្បត្តិ​នេះ រាជរដ្ឋាភិបាលកម្ពុជា ក៏មានការរៀបចំតុបតែងលម្អ ការតាំងព្រះឆាយាល័ក្ខណ៍ និង​មាន​ការ​បាញ់កាំជ្រួចជាច្រើនសិបគ្រាប់ នៅម៉ោង ៧.០០ យប់ នៅថ្ងៃទី ២៨ ថ្ងៃទី ២៩ និងថ្ងៃទី ៣០ ខែតុលា នេះផងដែរ។

សម្រាប់​ថ្ងៃដំបូងនៃការបាញ់កាំជ្រួច ប្រជាពលរដ្ឋជាច្រើនក៏បានមកកម្សាន្តនៅមុខព្រះបរមរាជវាំង ដោយ​ម្នាក់ៗភ្ជាប់មកជាមួយស្នាមញញឹម ភាពសប្បាយរីករាយ និងក្ដីគោរពស្រឡាញ់ ពិសេស​ការ​ថ្វាយ​ព្រះពរព្រះមហាក្សត្រ ក្នុងឱកាស ខួបលើកទី ២០ ព្រះរាជពិធីគ្រងរាជសម្បត្តិ ផងដែរ។

ជា​ការ​អបអរសាទរ គម្រប់ខួបលើកទី ២០ នៃការឡើងគ្រងរាជសម្បត្តិរបស់ ព្រះករុណា ព្រះបាទ​សម្ដេច​ព្រះ​បរមមនាថ នរោត្តម សីហមុនី ព្រះមហាក្សត្រនៃប្រទេសកម្ពុជា សហភាព​សហព័ន្ធ​យុវជន​កម្ពុជា ក្រោមការដឹកនាំដោយ ឯឧត្តម ហ៊ុន ម៉ានី ក៏ទទួលបានការអនុញ្ញាត ក្នុងការរៀបចំ ពិព័រណ៍​ព្រះបរមឆាយាល័ក្ខណ៍ ដែលបង្ហាញពី ព្រះរាជជីវប្រវត្តិ ព្រះរាជកាតព្វកិច្ច ស្នាព្រះហស្ថ និង​ព្រះរា​ជសកម្មភាពសប្បុរសធម៌ របស់ព្រះករុណាជាអម្ចាស់ ជីវិតលើត្បូងព្រះមហាក្សត្រ នៃ​ព្រះរាជា​ណា​ចក្រកម្ពុជា។

ពិព័រណ៍ រៀបចំឡើងសម្រាប់រយៈពេល ២២ថ្ងៃ ចាប់ពីថ្ងៃទី ២៧ ខែតុលា រហូតដល់ថ្ងៃទី ១៧ ខែវិច្ឆិកា ឆ្នាំ ២០២៤។ ពិព័រណ៍ព្រះបរមឆាយាល័ក្ខណ៍ ត្រូវបានរៀបចំ​ឡើង​ក្នុង​គោល​បំណង​បង្ហាញពីការដឹងគុណ ចំពោះព្រះគុណូបការៈ ព្រះគំរូវីរៈភាព និងព្រះរាជបូជនីយកិច្ច ដ៏ឧដុង្គ​ឧត្តម របស់ព្រះករុណា ជាអម្ចាស់ ដែលទ្រង់បានបំពេញ ព្រះរាជតួនាទី របស់ព្រះ​អង្គ​យ៉ាង​ខ្ជាប់​ខ្ជួន​ស្រប​តាមរដ្ឋធម្មនុញ្ញ នៃព្រះរាជាណាចក្រកម្ពុជា៕ អត្ថបទ៖ គឹមហុក