ប្រជានុរាស្ត្រវ័យចាស់បង្ហាញភាពកក់ក្តៅក្រោមម្លប់ព្រះមហាក្សត្រគ្រងរាជសម្បត្តិ រយៈពេល២០ឆ្នាំមកនេះ

នៅថ្ងៃទី២៩ ខែតុលា គឺជាថ្ងៃដ៏វិសេសវិសាលបំផុត នៃការយាងឡើងគ្រងព្រះបរមសិរីរាជសម្បត្តិ របស់​ព្រះករុណា ព្រះបាទ សម្តេច ព្រះបរមនាថ នរោត្តម សីហមុនី។ អំឡុង​ការ​យាង​ឡើង​គ្រង​ព្រះ​បរ​មសិរីរាជសម្បត្តិក្នុងរយៈពេល២០ឆ្នាំមកនេះ បណ្តាប្រជានុរាស្ត្រខ្មែរ បានបង្ហាញ​អំពី​ភាព​កក់​ក្តៅ ភាពសុខក្សេមក្សាន្ត សំបូរសប្បាយរុងរឿង ក្រោមម្លប់ត្រជាក់ របស់អង្គ​ព្រះមហាក្សត្រ​​នៃ​ព្រះរាជាណាចក្រកម្ពុជា។

បណ្តាប្រជានុរាស្ត្រខ្មែរ ក្នុងចំណោយអ្នកវ័យចំណាស់ ថ្លែងប្រាប់ BTV នៅថ្ងៃនេះថា ក្នុង​អំឡុង​រយៈ​ពេល​២០ឆ្នាំនេះ នៃការយាងគ្រងព្រះបរមសិរីរាជសម្បត្តិ ព្រះមហាក្សត្រ នៃព្រះរាជា​ណា​ចក្រ​កម្ពុជា​ ព្រះករុណា ព្រះបាទ សម្តេច ព្រះបរមនាថ នរោត្តម សីហមុនី បានប្រកាន់​ខ្ជាប់​នូវ​ព្រះរា​ជ​តួនាទី​ និងព្រះរាជកិច្ច តាមលំអានព្រះរាជបិតារបស់ព្រះអង្គបានល្អប្រសើរ ពិសេស​ការ​កិច្ចការ​ក្នុង​វិស័យ​សាសនា វិស័យមនុស្សធម៌ វិស័យអប់រំ ស្គមកិច្ច សុខមាលភាព និងជីវភាពរស់​នៅ​របស់​ប្រជា​រាស្ត្រ​នៅទូទាំងប្រទេស ហើយសម្រាប់ព្រះរាជកិច្ចការងារអន្តរជាតិវិញ ព្រះអង្គបាន​បង្កើត​ទំនាក់​ទំនង កិច្ចសហប្រតិបត្តិការបានល្អប្រសើរជាមួយបណ្តាប្រទេសលើពិភពលោក។

សូម​បញ្ជាក់ថា ព្រះករុណា ព្រះបាទ សម្តេច ព្រះបរមនាថ នរោត្តម សីហមុនី បាន​យាង​គ្រង​ព្រះបរម​សិរីរាជសម្បត្តិ នៅថ្ងៃទី២៩ ខែតុលា ឆ្នាំ២០០៤ រហូតមកដល់ថ្ងៃទី២៩ ខែតុលា ឆ្នាំ​២០២៤​នេះ គឺមានរយៈពេល២០ឆ្នាំ ហើយក្នុងអំឡុងពេលនេះដែរ ព្រះអង្គ ក៏បានចាត់​ទុក​បញ្ហា​របស់​ប្រជា​នុរាស្រ្ត គឺដូចជាបញ្ហារបស់ទ្រង់ផ្ទាល់ដែរ។ ហេតុនេះដែរ ព្រះអង្គតែង​តែ​ចូល​រួម​ចំណែក​បរិច្ចាគ​ថវិកាផ្ទាល់របស់ព្រះអង្គជួយសាសង់អាគារមន្ទីរពេទ្យ សាលារៀនជាដើម ដើម្បី​ទុក​ជាប្រយោជន៍ក្នុងការរស់នៅរបស់ប្រជានុរាស្រ្ត ក្នុងនេះដែរ ព្រះអង្គ​ក៏​តែង​តែ​ប្រទា​នថ​វិកា​ជា​រៀង​រាល់​ខែ​ជួយ​ទ្រទ្រង់​ដល់​សកម្មភាព​កាក​បាទ​ក្រហម​កម្ពុជា​ប្រើ​ប្រាស់​ជួយ​សង្គ្រោះ​​ប្រជា​នុរាស្ត្រ​ជួប​ទីទ័ល ក៏ដូចជួបគ្រោះមហន្តរាយនានា។ បន្ថែមលើនេះព្រះអង្គក៏តែងតែយាងចុះជួបប្រជានុរាស្រ្តនៅតាមមូលដ្ឋានដាច់ស្រយ៉ាល ដោយ​ផ្ដល់​ជា​គ្រឿង​ឧបភោគ និងថវិកា ដើម្បីដោះស្រាយបញ្ហាជីវភាព៕ អត្ថបទ ស៊ុម សុខជា