កិច្ចសន្ទនាថ្នាក់តំបន់ស្តីពី ការចែករំលែកការអនុវត្តល្អលើការលើកកម្ពស់សិទ្ធិមនុស្ស អំឡុងពេលនៃការរាតត្បាតជំងឺកូវីដ-១៩ ក្នុងតំបន់អាស៊ាន

ភ្នំពេញ ៖ ដោយទទួលការអនុញ្ញាតដ៏ខ្ពង់ខ្ពស់ពី ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល លោកជំទាវវេជ្ជបណ្ឌិត យក់ សម្បត្តិ រដ្ឋលេខាធិការក្រសួងសុខាភិបាល បានអញ្ជើញចូលរួមក្នុងកិច្ចសន្ទនាថ្នាក់តំបន់ស្តីពី ការចែករំលែកការអនុវត្តល្អលើការលើកកម្ពស់សិទ្ធិមនុស្ស អំឡុងពេលនៃការរាតត្បាតជំងឺកូវីដ-១៩ ក្នុងតំបន់អាស៊ាន, នារសៀលថ្ងៃទី២៨ ខែតុលា ឆ្នាំ២០២៤។

​កិច្ចសន្ទនាថ្នាក់តំបន់នេះ ធ្វើឡើងក្នុងគោលបំណង ចែករំលែកការអនុវត្តល្អលើការលើកកម្ពស់សិទ្ធិមនុស្សក្នុងអំឡុងពេលរាតត្បាតកូវីដ-១៩ ក្នុងតំបន់អាស៊ាន ដោយផ្តោតលើការពិភាក្សារួមមួយក្រោមក្របខណ្ឌនៃសសរស្តម្ភទាំងបីរបស់អាស៊ាន និងការចែករំលែកទស្សនៈ ការយល់ដឹង ការអនុវត្តល្អ និងចំណេះដឹងលើរបៀបលើកកម្ពស់សិទ្ធិមនុស្ស អំឡុងពេលមានការរាតត្បាតយ៉ាងធ្ងន់ធ្ងរនៃជំងឺកូវីដ-១៩ ព្រមទាំងដើម្បីពិនិត្យលទ្ធភាពសម្រាប់កិច្ចសហប្រតិបត្តិការបន្ថែមនាពេលអនាគតក្នុងក្របខណ្ឌអាស៊ាន។ ក្នុងនាមក្រសួងសុខាភិបាល លោកជំទាវរដ្ឋលេខាធិការ បានធ្វើបទអន្តរាគមន៍លើប្រធានបទ“ការចែករំលែកការអនុវត្តល្អ និងបញ្ហាប្រឈមនានា លើការលើកកម្ពស់សិទ្ធិទទួលបានសេវាសុខភាពអំឡុងពេលរាតត្បាតជំងឺកូវីដ-១៩”។

លោកជំទាវរដ្ឋលេខាធិការ បានជម្រាបជូនអំពីការលើកកម្ពស់សិទ្ធិមនុស្សអំឡុងពេលមានការរាតត្បាតយ៉ាងធ្ងន់ធ្ងរនៃជំងឺកូវីដ-១៩ ដែលក្រសួងសុខាភិបាលបានយកចិត្តទុកដាក់ រួមមាន៖

១. សិទ្ធិទទួលបានការថែទាំសុខភាព៖ ផ្តល់​ការថែទាំសុខភាពជាសារវ័ន្តទាំងនៅថ្នាក់មណ្ឌលសុខភាពរហូតដល់ថ្នាក់ជាតិ។ ការធ្វើតេស្ត ចត្តាឡីស័ក ការព្យាបាលជំងឺកូវីដ-១៩ ទាំងកម្រិតស្រាល និងធ្ងន់ធ្ងរ ។ រាជរដ្ឋាភិបាលកម្ពុជា បានផ្តល់វ៉ាក់សាំងដោយឥតគិតថ្លៃតាមយុទ្ធសាស្ត្រផ្ការីក ជូនប្រជាជនកម្ពុជា និងជនបរទេសដែលស្នាក់នៅកម្ពុជា ។ ក្រសួងសុខាភិបាល ក៏បានយកចិត្តទុកដាក់ខ្ពស់ ដល់កុមារ ស្ត្រីមានផ្ទៃពោះ ជនមានពិការភាព ជនទេសន្តរប្រវេសន៍ ។

២. សិទ្ធិទទួលបានព័ត៌មាន៖ ក្រសួងសុខាភិបាល បានជូនព័ត៌មានត្រឹមត្រូវ ច្បាស់លាស់ ជារៀងរាល់ថ្ងៃអំពីជំងឺកូវីដ-១៩ ព្រមជាមួយនឹងសន្និសីទសារព័ត៌មានប្រចាំសប្តាហ៍។ ក្រសួងសុខាភិបាល បានដាក់ឱ្យប្រើប្រាស់ប្រព័ន្ធ ១១៥ សម្រាប់ផ្តល់ព័ត៌មានពាក់ព័ន្ធនឹងជំងឺ ជូនសាធារណៈជន ២៤ម៉ោងលើ ២៤ម៉ោង។

៣. សិទ្ធិទទួលបាន​ អាហារូបត្ថម្ភ​ ក្រោមការឧបត្ថម្ភរបស់រាជរដ្ឋាភិបាល ជាការផ្តល់សាច់​ប្រាក់​ ដល់​ប្រជាជន​ ដែល​រង​ហានិភ័យ​ ពិសេស​ ស្រ្តី​ និង​ កុមារ​ រួមទាំងអាហារហាឡាល់សម្រាប់ជនមូស្លីមផងដែរ។

៤. សិទ្ធិចូលរួមក្នុងការងារប្រយុទ្ធប្រឆាំងនឹងការរាតត្បាតជំងឺ៖ តាមរយៈយុទ្ធនាការការចូលរួមរបស់សហគមន៍ ក្នុងការផ្សព្វផ្សាយការយល់ដឹងអំពីការបង្ការ និងការស្វែងរកការធ្វើតេស្ត ការធ្វើចត្តាឡីស័ក និងការព្យាបាលជំងឺ។

ក្នុងនេះដែរ លោកជំទាវរដ្ឋលេខាធិការ បានបញ្ជាក់ជូនអង្គពិធីថា កម្ពុជា បានទទួលនាវាទេសចរណ៍ Westerdam ដែល​ទទួល​ផ្ទាល់​ដ៏ខ្ពង់ខ្ពស់​បំផុត​ ពី​ សម្តេច​តេជោ​ ប្រធាន​ព្រឹទ្ធសភា​នៃ​ព្រះរាជាណាចក្រ​កម្ពុជា​ ដែល​កាប៉ាល់​ដឹកមនុស្សជាង ២២០០នាក់ ក្នុង​កាលៈទេសៈ​ នោះ​មិន​មាន​ប្រទេស​ណា​យល់​ព្រម​ទទួល​ឲ្យ​ កាប៉ាល់​ Westerdam ចូល​ចតទ្បេីយ​ ។

៥.​ ប្រទេសកម្ពុជាមានប្រព័ន្ធសន្តិសុខសុខភាពដែលមានភាពធន់ និងនិរន្តរភាពដែលអាចឆ្លើយតបទៅនឹងភាពអាសន្នផ្នែកសុខភាពសាធារណៈ ហើយសហគមន៍ទាំងអស់ បានត្រៀមលក្ខណៈយ៉ាងល្អសម្រាប់ជំងឺរាតត្បាត​ដែល​អាច​កើត​មាន​ឡើង​នា​ពេល​អនាគត​ ។

កិច្ចសន្ទនាថ្នាក់តំបន់នេះ មានការចូលរួមពីផ្នែកពាក់ព័ន្ធតាមវិស័យអាស៊ាន អ្នកជំនាញផ្នែកសិទ្ធិមនុស្សមកពីស្ថាប័នសិទ្ធិមនុស្សជាតិ វិទ្យាស្ថាននីតិអន្តរជាតិនៃបណ្ឌិតសភាវិទ្យាសាស្ត្រសង្គមចិន ការិយាល័យឧត្តមស្នងការទទួលបន្ទុកសិទ្ធិមនុស្សអង្គការសហប្រជាជាតិ លេខាធិការដ្ឋានអាស៊ាន បណ្តាភ្នាក់ងាររបស់អង្គការសហប្រជាជាតិ អង្គការមិនមែនរដ្ឋាភិបាល និងតំណាងក្រសួង/ស្ថាប័នពាក់ព័ន្ធនានាសរុបប្រហែល ១០០នាក់៕

អត្ថបទ រដ្ឋា