បណ្ឌិត គិន ភា៖ រយៈពេល២០ឆ្នាំមកនេះ ព្រះមហាក្សត្របានរក្សានូវនិរន្តរភាពជាតិ និងអព្យាក្រិតភាពយ៉ាងខ្ជាប់ខ្ជួន

ឯកឧត្តមបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិកម្ពុជា នៃរាជបណ្ឌិត្យ​សភា​កម្ពុជា​បាន​មើលឃើញថា រយៈពេល២០ព្រះវស្សានៃ​ការឡើង​គ្រងព្រះបរមសិរី​រាជ​សម្បត្តិ​របស់​ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជា​ណាចក្រ​កម្ពុជា ទ្រង់បានបំពេញនូវព្រះរាជតួនាទីយ៉ាងល្អបំផុត។

ឯកឧត្តមថា ក្នុងរយៈពេល២០ឆ្នាំ នៃ​ការយាង​ឡើង​គ្រង​ព្រះបរមសិរី​រាជ​សម្បត្តិ​របស់​ព្រះអង្គ​គឺ​ព្រះអង្គ​បាន​បំពេញនូវព្រះរាជតួនាទីទាំងកិច្ចការជាតិ និងទំនាក់ទំនងអន្តរជាតិ ជាពិសេស បាន​នាំ​មក​នូវការធានានិរន្តរភាពជាតិនិងអព្យាក្រិតភាពយ៉ាងខ្ជាប់ខ្ជួន។

ឯកឧត្តមបានបន្តថា ការដែលក្រុមប្រឹក្សារាជសម្បត្តិទាំង៩អង្គនាក់​ឯកភាព​ជា​ឯកច្ឆ័ន្ទ​ជ្រើស​រើស​ព្រះអង្គ​ឡើង​គ្រងព្រះបរមសិរីរាជសម្បត្តិបន្តពីព្រះបិតារបស់ព្រះអង្គពិតជាសាកសមណាស់ ជា​ពិសេស​ដើម្បីធានានិរន្តរភាពជាតិ ដែលមានព្រះប្រមុខរដ្ឋមិនដាច់ សម្រាប់ព្រះ​រាជា​ណា​ចក្រ​កម្ពុជាទី២​យើង​េះ។

ក្នុងឱកាសខួប២០ព្រះវស្សានៃការយាងឡើងគ្រងព្រះបរមសិរីរាជសម្បត្តិរបស់ព្រះអង្គ ថ្នាក់​ដឹក​នាំ​គ្រប់​ជាន់ថ្នាក់ និង​ប្រជានុរាស្ត្រ​មានសេចក្តីសោមនស្ស​រីករាយ​ឥត​ឧបមា​សូម​បួង​សួង​ដល់​ព្រះវិញ្ញាណក្ខន្ធ អតីតព្រះមហាក្សត្រ ព្រះមហាក្សត្រី​យានី ជាពិសេសដួងព្រះវិញ្ញាណក្ខន្ធ ព្រះមហាវីរក្សត្រ ព្រះបរមរតនកោដ្ឋជាទីសក្ការៈ សូមព្រះអង្គតាមជួយបីបាច់ថែរក្សា អភិបាល​ប្រោះព្រំនូវព្រះរាជសព្វសាធុការពរជ័យ ថ្វាយព្រះករុណាព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា សូមព្រះអង្គព្រះប្រកបដោយព្រះពុទ្ធពរ៤ ប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕ អត្ថបទ៖ មុត សុទ្ធ