កូរ៉េខាងជើង បាញ់សាកល្បងមីស៊ីលបាលិស្ទិករយៈចម្ងាយឆ្ងាយ ស្របពេលភាពតានតឹងក្នុងតំបន់

កូរ៉េខាងត្បូង និងជប៉ុន បាននិយាយថា កូរ៉េខាងជើង បានបាញ់មីស៊ីលបាលិស្ទិករយៈចម្ងាយឆ្ងាយចូលទៅក្នុងសមុទ្រពីឆ្នេរសមុទ្រភាគខាងកើតរបស់ខ្លួននៅថ្ងៃព្រហស្បតិ៍ (៣១ តុលា) នេះ មួយថ្ងៃបន្ទាប់ពីទីក្រុងសេអ៊ូល បានរាយការណ៍ថា ទីក្រុងព្យុងយ៉ាងកំពុងត្រៀមបាញ់សាកល្បងមីស៊ីលបាលិស្ទិកអន្តរទ្វីប ICBM ខណៈភាពតានតឹងក្នុងតំបន់កាន់តែកើនឡើង។

កូរ៉េខាងត្បូង បាននិយាយនៅក្នុងសេចក្តីថ្លែងការណ៍មួយថា កាធ្វើតេស្តមីស៊ីល ដែលបាញ់ចេញពីមុំដ៏ខ្ពស់នេះ គឺចេញពីតំបន់មួយនៅជិតរដ្ឋធានីព្យុងយ៉ាង របស់កូរ៉េខាងជើង នៅម៉ោង ៧:១០នាទីព្រឹក (ម៉ោងក្នុងស្រុក)។ ក្រោយមក រដ្ឋាភិបាលជប៉ុននិយាយថា មីស៊ីលនោះបានធ្លាក់ចូលទៅក្នុងសមុទ្រនៅម៉ោង ៨:៣៧នាទីព្រឹក (ម៉ោងក្នុងស្រុក) ដោយពុំមានការខូចខាតអ្វីត្រូវបានរាយការណ៍ឡើយ។

កូរ៉េខាងត្បូង និយាយថា មីស៊ីលកូរ៉េខាងជើងនោះត្រូវគេជឿថាជាមីស៊ីលបាលិស្ទិករយៈចម្ងាយឆ្ងាយ ដែលត្រូវបានបាញ់ចេញនៅ “មុំដ៏ខ្ពស់”។ ដ្ឋមន្ត្រីក្រសួងការពារជាតិជប៉ុន ថ្កោលទោសយ៉ាងខ្លាំងចំពោះការសាកល្បងមីស៊ីលនេះ ដោយនិយាយថា វាបានគំរាមកំហែងមិនត្រឹមតែដល់ជប៉ុនប៉ុណ្ណោះទេ ថែមទាំងសហគមន៍អន្តរជាតិផងដែរ។

កូរ៉េខាងជើង បានធ្វើការបាញ់សាកល្បងមីស៊ីលអន្តរទ្វីប ICBM ជាបន្តបន្ទាប់ក្នុងគន្លងដ៏ចោតខ្លាំង ដើម្បីអនុញ្ញាតឱ្យក្បាលគ្រាប់ធ្លាក់ក្នុងចម្ងាយខ្លីជាងនេះ ឱ្យស្របទៅនឹងរយៈចម្ងាយដែលបានរចនាឡើង មួយផ្នែកគឺសម្រាប់សុវត្ថិភាព និងដើម្បីបញ្ចៀសភាពតានតឹងនយោបាយក្នុងករណីក្បាលគ្រាប់ហោះទៅឆ្ងាយខ្លាំងពេកក្នុងសមុទ្រប៉ាស៊ីហ្វិក៕