រុស្ស៊ី អះអាងដណ្តើមបានភូមិមួយទៀតរបស់អ៊ុយក្រែន ខណៈការប្រយុទ្ធកាន់តែខ្លាំងក្លាឡើង

ក្រសួងការពារជាតិរុស្ស៊ី បាននិយាយកាលពីថ្ងៃពុធ (៣០ តុលា) ថា កងកម្លាំងទីក្រុងមូស្គូ បានគ្រប់គ្រងតំបន់តាំងទីលំនៅនៃភូមិ គ្រូលៀគីវកា (Kruhliakivka) នៅជិតទីក្រុងសំខាន់ គូភីយ៉ាន (Kupiansk) ក្នុងតំបន់ ខាគីវ (Kharkiv) ភាគឦសាននៃប្រទេសអ៊ុយក្រែន។

យោធាអ៊ុយក្រែន មិនបានទទួលស្គាល់ថាភូមិ Kruhliakivka ធ្លាក់ចូលក្នុងដៃរុស្ស៊ីទេ ប៉ុន្តែក្រុមមន្ត្រីនិយាយថា ការប្រយុទ្ធគ្នាដែលកាន់តែខ្លាំងក្លាឡើង កើតមាននៅក្នុងតំបន់នោះ ហើយក្រុង Kupiansk បានស្ថិតនៅក្រោមការបាញ់ផ្លោងរបស់រុស្ស៊ី។

អគ្គសេនាធិការអ៊ុយក្រែន បានដាក់ឈ្មោះភូមិ Kruhliakivka ជាភូមិមួយក្នុងចំណោមភូមិចំនួន៩ ដែលត្រូវរួមរឹតដោយការប្រយុទ្ធ ដោយមានការវាយលុករបស់រុស្ស៊ីចំនួន ១៥លើក ត្រូវបានបំផ្លាញ និងការប៉ះទង្គិចគ្នាចំនួន ៩ទីតាំងនៅតែបន្តកើតមាន។ កាលពីដើមខែនេះ ចារកម្មអ៊ុយក្រែនរាយការណ៍ថា កងកម្លាំងរុស្ស៊ីត្រូវបានវាយរុញចេញពីភូមិនោះវិញ។

រដ្ឋអាជ្ញាក្នុងតំបន់ Kharkiv បាននិយាយថា ទីក្រុង Kupiansk រងការបាញ់ផ្លោង និងវាយប្រហារតាមអាកាស ដោយធ្វើឱ្យមនុស្ស ៦នាក់រងរបួស រួមទាំងមន្រ្តីនគរបាល ២រនាក់ផងដែរ។ មនុស្សម្នាក់បានស្លាប់នៅពេលកងកម្លាំងរុស្ស៊ី បានបាញ់ផ្លោងលើភូមិ គូឆេរីវកា (Kucherivka) ចម្ងាយប៉ុន្មានគីឡូម៉ែត្រប៉ុណ្ណោះពីភាគខាងកើត។

ក្រុង Kupiansk ដែលជាចំណុចប្រសព្វផ្លូវដែក និងមជ្ឈមណ្ឌលដឹកជញ្ជូនដ៏សំខាន់ ត្រូវបានគ្រប់គ្រងដោយកងកម្លាំងរុស្ស៊ីក្នុងប៉ុន្មានសប្តាហ៍បន្ទាប់ពីការវាយលុកដំបូងៗក្នុងឆ្នាំ២០២២ ប៉ុន្តែកងកម្លាំងអ៊ុយក្រែន ដណ្តើមបានក្រុងនេះមកវិញក្នុងការវាយបកឆ្លងកាត់ភាគឦសានក្នុងខែកញ្ញាឆ្នាំដដែលនោះ៕