អង្គការសង្គមស៊ីវិលបើកកិច្ចសន្ទនាថ្នាក់ជាតិមួយ ដើម្បីជជែកគ្នាលើការគាំពារ​សង្គមដល់កម្មករ និងកសិករ

អង្គការអុកស្វាម និងអង្គការដៃគូអនុវត្តគម្រោងសមភាពសម្រាប់ទាំងអស់គ្នា សហការគ្នាបានរៀបចំកិច្ចសន្ទនា ថ្នាក់ជាតិក្រោមប្រធានបទ “ប្រព័ន្ធគាំពារសង្គមដែលល្អប្រសើរ សម្រាប់កម្មករ និងកសិករ ក្នុងខ្សែច្រវាក់ចេក និងកៅស៊ូ” ដើម្បីធ្វើការចែករំលែកការអនុវត្តល្អរបស់អ្នកពាក់ព័ន្ធសំខាន់ៗពីស្ថាប័នរាជរដ្ឋាភិបាល ក្រុមហ៊ុននានា។

លោកស្រី ភាណ សោភ័ណ នាយិកាអង្គការ Oxfam ក្នុងកម្មវិធីកិច្ចសន្ទនា នៅព្រឹកថ្ងៃទី៣១ តុលា ឆ្នាំ២០២៤នេះ បានលើកឡើងថា មូលហេតុដែលលើកយកប្រធានបទនេះឡើង ដោយសារកម្មករនៅក្នុងវិស័យកសិ-ឧស្សាហកម្ម ដំណាំចេក និងកៅស៊ូ ជួបការលំបាកជាច្រើនទាំងការស្នាក់នៅ និងការបំពេញការងារដោយសារចម្ការភាគច្រើនស្ថិតនៅតំបន់ដាច់ស្រយ៉ាល ពេលខ្លះមិនមានសេវាទូរស័ព្ទទៅដល់ផ្លូវធ្វើដំណើរឆ្ងយ និងលំបាក។ លោកស្រី បន្តទៀតថា កម្មករប្រឈមដោយផ្ទាល់ពីការប្រើប្រាស់ថ្នាំគីមីកសិកម្ម ដែលអាចបង្កផលលំបាកដល់សុខភាពទាំងពេលកំពុងបំពេញការងារ និងឥទ្ធិពលរយៈពេលវែង ប្រសិនបើមិនមានការប្រើប្រាស់សម្លៀកបំពាក់ សំភារៈ និងឧបករណ៍ការពារអោយបានត្រឹមត្រូវ។ កម្មករទទួលបានការគាំពារមួយចំនួន តាមរយៈរបបសន្តិសុខសង្គម ដែលបានផ្តល់អត្ថប្រយោជន៍យ៉ាងច្រើន ប៉ុន្តែវិសាលភាពនៅមានកម្រិតនៅឡើយ។

លោក ខៀវ សាវុធ អគ្គនាយករង នៃអគ្គនាយកដ្ឋានក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍ថា ទាក់ទិនប្រធានបទនេះ ក្រសួងការងារក៏បានយកចិត្តទុកដាក់ខ្ពស់ និងចាត់ក្រុមមន្រ្តីផ្នែកអធិការកិច្ចចុះទៅកាន់ខេត្តគោលដៅចំនួន៤ ដូចជា មណ្ឌលគិរី រតនគិរី ក្រចេះ និងស្ទឹងត្រែង ដើម្បីធ្វើការណែនាំអនុវត្តលក្ខខណ្ឌការងារឲ្យបានល្អប្រសើរ។ លោកបានឲ្យដឹងថា បញ្ហាប្រឈមរបស់កម្មករនិយោជិតក្នុងវិស័យទាំងនេះ គឺការកំណត់ប្រាក់ឈ្នួលអប្បបរមា ដោយសារបច្ចុប្បន្នការកំណត់ប្រាក់ឈ្នួល គឺមានសម្រាប់តែវិស័យឧស្សាហកម្មកាត់ដេរប៉ុណ្ណោះ ដោយឡែកវិស័យកសិកម្ម និងវិស័យផ្សេងៗទៀតមិនទាន់ត្រូវបានរៀបចំនៅឡើយទេ ខណៈរដ្ឋាភិបាលបានកំពុងគិតគូរដូចគ្នាសម្រាប់វិស័យទាំងឡាយ។

សូមជម្រាបថា កិច្ចសន្ទនានេះមានអ្នករចូលរួម កពីស្ថាប័នក្រសួងពាក់ព័ន្ធ ថ្នាក់ជាតិ និងរដ្ឋបាលថ្នាក់ក្រោមជាតិ តំណាងក្រុមហ៊ុនវិនិយោគ កម្មករ និងកសិករ ពាណិជ្ជករ អង្គការក្រៅរដ្ឋាភិបាល និងដៃគូអភិវឌ្ឍន៍ពាក់ព័ន្ធចំនួនប្រហែល ១៣០នាក់។ កិច្ចសន្ទនា នេះ ធ្វើឡើងក្នុងគោលបំណងដើម្បីអបអរសាទរសមិទ្ធិផល និងការចែករំលែកការអនុវត្តល្អរបស់អ្នកពាក់ព័ន្ធសំខាន់ៗពីរដ្ឋាភិបាល ក្រុមហ៊ុននានា ដែលបានដំណើរការល្អប្រសើរ ក្នុងការផ្តល់ការគាំពារដល់កសិករ និងកម្មករ, ដើម្បីលើកកំពស់វប្បធម៍កិច្ចសន្ធានាពហុភាគីដើម្បីដោះជ្រាយញ្ហាប្រកបដោយប្រសិទ្ធិភាព និងបង្កើតបរិយាកាសសម្រាប់កសិករផលិតកៅស៊ូ កម្មករកសិកម្ម ជាពិសេសស្ត្រី ដើម្បីបានសន្ទនាដោយផ្ទាល់ពីបញ្ហារបស់ពួកគេ និងបង្កើតបណ្តាញជាមួយគ្នា៕ អត្ថបទ៖ ឈិត បូរ៉ាវី