មណ្ឌលសុខភាព អូរអំបិល ក្រុងសិរីសោភ័ណ បេីកយុទ្ធនាការ ស្តីពីការផ្តល់បន្ថែមថ្នាំបង្ការជម្ងឺ​កញ្ជ្រឹល​ ស្អូច ដល់កុមារអាយុ៩ខែ ដល់ក្រោម៥ឆ្នាំ

បន្ទាយមានជ័យ៖ នៅព្រឹកថ្ងៃទី៣១ ខែតុលា ឆ្នាំ២០២៤ មណ្ឌលសុខភាព អូរអំបិល ស្ថិតនៅសង្កាត់អូរអំបិល ក្រុងសិរីសោភ័ណ បានរៀបចំបេីកយុទ្ធនាការ ស្តីពីការផ្តល់បន្ថែមថ្នាំបង្ការជម្ងឺកញ្ជ្រឹល ស្អូច ដល់កុមារអាយុ៩ខែ ដល់ក្រោម៥ឆ្នាំ ដោយចាប់ពីថ្ងៃទី០១ ដល់ថ្ងៃទី១៣ ខែ វិច្ឆិកា ឆ្នាំ ២០២៤ ។

លោក គុណ ណាវុធ ប្រធាន OD សិរីសោភ័ណ ក៏បានបញ្ជាក់ថា ​ជំងឺ កញ្ជ្រឹល គឺជាជំងឺធ្ងន់ធ្ងរ​ដែល​បង្កឱ្យមានស្នាមកន្ទួលរមាស់ ​និងគ្រុនក្តៅជំងឺ ហេីយវាគឺជាជំងឺឆ្លង។ ហេីយវាឆ្លង​រីករាលដាល​នៅពេលដែលមនុស្សម្នាក់កើតជំងឺកញ្ជ្រឹល​បញ្ចេញខ្យល់ដង្ហើម ក្អក ឬកណ្តាស់។ អ្នកដែលមិនបានចាក់វ៉ាក់សាំងបង្ការ​ គឺអាចនឹងងាយឆ្លងជំងឺកញ្ជ្រឹល​ជាងមនុស្សធម្មតា។ លោកបញ្ជាក់ ទៀតថា ជំងឺកញ្ជ្រឹលអាចនឹងមានគ្រោះថ្នាក់ជាពិសេសសម្រាប់ទារក និងកុមារតូចៗ។ ករណីខ្លះ ជំងឺនេះអាចនឹងបង្កគ្រោះថ្នាក់ដល់អាយុជីវិតបាន។

លោកក៏បានអំពាវនាវ ដល់ពលរដ្ឋ អាណាព្យាបាល​គ្រប់រូប​ ដែលមានកនចា់ពីអាយុ៩ខែ ដល់៥ឆ្នាំ មក​ទទួលថ្នាំបង្ការជំងឺ​កញ្ជ្រឹល​ ស្អូច​ ឱ្យបានទាំងអស់គ្នា ​និង​បន្តផ្សព្វផ្សាយពីយុទ្ធានាការនេះ​ដល់​អាណាព្យាបាលគ្រប់​ដែលមានកូនតូច​ ឱ្យមកទទួលបានថ្នាំបង្ការឱ្យបានគ្រប់ៗគ្នានៅ​តាមមណ្ឌលសុខភាព។

ក្នុងនោះ លោកក៏បានណែនាំបន្ថែមដល់អាណាព្យាបាល ប្រសិនបេីជាកូនចៅ មាន​អាការៈគ្រុន​ក្តៅខ្លាំង ក្អក ហៀរសំបោរ ភ្នែកឡើងក្រហម ​និងហូរទឹកភ្នែក ​បន្ទាប់ពីរយៈពេល ៣-៤ ថ្ងៃក្រោយមក មានស្នាម​កន្ទួល​រមាស់ចាប់ផ្តើមកើត​មាននៅលើផ្ទៃមុខ​ និងរាលដាលទៅ ផ្នែកដទៃផ្សេងទៀត​នៃរាងកាយ​ត្រូវប្រញាប់រួសរាន់​នាំកូនចៅទៅមន្ទីរពេទ្យ​ដើម្បីធ្វើការពិនិត្យ ​និងព្យាបាល​ឱ្យបាន​ទាន់ពេលវេលា៕