កិច្ចប្រជុំក្រុមប្រឹក្សានៃមន្ទីរពេទ្យព្រះអង្គឌួង លើកទី៣ ឆ្នាំ២០២៤ អាណត្តិទី២

ភ្នំពេញ ៖ មន្ទីរពេទ្យព្រះអង្គឌួង បានបើកកិច្ចប្រជុំក្រុមប្រឹក្សាលើកទី៣ ឆ្នាំ២០២៤ អាណត្តិទី២ ដែលដឹកនាំដោយលោកជំទាវសាស្ត្រាចារ្យ អ៊ឹម សិទ្ធិការ្យ រដ្ឋលេខាធិការក្រសួងសុខាភិបាល និងជាប្រធានក្រុមប្រឹក្សាភិបាលមន្ទីរពេទ្យព្រះអង្គឌួង, នាព្រឹកថ្ងៃទី៣១ ខែតុលា ឆ្នាំ២០២៤នេះ។

ក្នុងកិច្ចប្រជុំនេះមានរបៀបវារៈដូចខាងក្រោម៖

១- សំណើសុំពិនិត្យ និងអនុម័តលើរបាយការណ៍ចំណូលចំណាយប្រចាំត្រីមាសទី៣ ឆ្នាំ២០២៤

២- សំណើសុំពិនិត្យ និងអនុម័តលើរបាយការណ៍អនុវត្តកិច្ចលទ្ធកម្មសាធារណៈប្រចាំត្រីមាសទី៣ ឆ្នាំ២០២៤

៣- សំណើសុំពិនិត្យសេវាមួយចំនួន

៤- ផ្សេងៗ។

លោកជំទាវសាស្ត្រាចារ្យប្រធានបានអនុញ្ញាតឱ្យលោកសាស្ត្រាចារ្យ លូ លីឃាង នាយកមន្ទីរពេទ្យព្រះអង្គឌួង ជម្រាបអង្គប្រជុំនូវរបៀបវារៈខាងលើ ដើម្បីពិនិត្យ និងអនុម័ត។ បន្ទាប់មកលោកជំទាវសាស្ត្រាចារ្យប្រធានបានអនុញ្ញាតឱ្យអង្គប្រជុំពិនិត្យ និងអនុម័តនូវរបៀបវារៈដែលបានជម្រាបជូនខាងលើ។

ជាកិច្ចបន្ត លោកជំទាវសាស្ត្រាចារ្យប្រធាន បានផ្តល់អនុសាសន៍ណែនាំដូចខាងក្រោម៖

– ត្រូវជូនដំណឹងដល់ប្រជាពលរដ្ឋទាំងអស់ដែលមកទទួលសេវាសុខាភិបាលនៅមន្ទីរពេទ្យព្រះអង្គឌួង អំពីការសាងសង់អគារ ១៥ជាន់ ក្នុងរយៈេល ២-៣ឆ្នាំ ដើម្បីសុំការយោគយល់ពីការរំខានផ្សេងៗ ក៏ដូចជាពុំមានទីធ្លាគ្រប់គ្រាន់សម្រាប់ការរង់ចាំ

– ត្រូវរៀបលំហូរនៃការផ្តល់សេវាឱ្យបានច្បាល់លាស់ ដើម្បីឱ្យទាំងបុគ្គលិក និងប្រជាពលរដ្ឋបានយល់ច្បាស់ ក្នុងអំឡុងពេលសាងសង់អគារ

– ត្រូវរៀបចំពង្រឹងបន្ថែមនូវរចនាសម្ព័ន្ធ ឧបករណ៍សម្ភារៈផ្សេងៗ និងធនធានមនុស្ស ដើម្បីផ្តល់សេវាសុខាភិបាលឱ្យកាន់តែមានប្រសិទ្ធភាពខ្ពស់

– ត្រូវតាមដាន និងឆ្លើយតបនូវរាល់ព័ត៌មាន ក៏ដូចជាមតិផ្សេងៗនូវលើបណ្តាញសង្គមនានា។

ជាចុងក្រោយ លោកជំទាវសាស្ត្រាចារ្យប្រធាន បានមានប្រសាសន៍បិទអង្គប្រជុំ និងថ្លែងអំណរគុណម្តងទៀត ដល់សមាជិក សមាជិកាអង្គប្រជុំទាំងមូលដែលបានចំណាយពេលវេលាអញ្ជើញចូលរួម៕

អត្ថបទ រដ្ឋា