ឧត្តមសេនីយ៍ឯក ហួត ឈាងអន រំលឹកដល់យោធិន នៃនាយកទីចាត់ការ​ចលនូប្បត្ថម្ភ​ទាំង​អស់​ត្រូវ​បង្កើន ស្មារតីស្នេហាជាតិ

ឧត្តមសេនីយ៍ឯក ហួត ឈាងអន នាយរងសេនាធិការចម្រុះ នាយកទីចាត់ការចលនូប្បត្ថម្ភ អគ្គ​បញ្ជាការ បានក្រើនរំលឹកដល់នាយទាហាន នាយទាហានរង ពល​ទាហាន​ទាំងអស់ នៃ​នាយក​ទីចាត់​ការ​ចលនូប្បត្ថម្ភ អគ្គបញ្ជាការត្រូវបង្កើនស្មារតី មនសិការស្នេហាជាតិ ប្តេជ្ញា​ការពារ​បូរណ​ភាព​ទឹកដី ការពារជាតិមាតុភូមិ ការពារសុខសន្តិភាព ការពាររដ្ឋធម្មនុញ្ញា ការពាររាជ​រដ្ឋាភិបាល​ស្រប​ច្បាប់ ការពារផលប្រយោជន៍ជាតិ និងការពារផលប្រយោជន៍ប្រជាជន ហើយត្រូវទប់​ស្កាត់​នូវ​រាល់​ឧបាយកលញុះញង់ទាំងឡាយណា ដែលនាំឲ្យ មាននូវអសន្តិសុខជាតិនោះ។

ក្នុងឱកាសអញ្ជើញជាអធិបតីក្នុងពិធីប្រកាសមុខតំណែង ផ្ទេរភារកិច្ច និងដំឡើង​ឋានន្តរសក្តិ​ជូន​នាយ​ទាហាន នាយទាហានរង និងពលទាហាន ទីចាត់ការចលនូប្បត្ថម្ភ អគ្គបញ្ជាការ​ជា​ច្រើន​នាក់​នូវ​ថ្ងៃទី៤ ខែវិច្ឆិកា ឆ្នាំ២៤នេះ ឧត្តមសេនីយ៍ឯក ហួត ឈាងអន បានលើកឡើងថា ក្នុងនាម​ជា​កង​ទ័ព​ត្រូវ លើកកម្ពស់ស្មារតីទទួលខុសត្រូវក្នុងការបំពេញ និងសម្រេចគ្រប់ភារកិច្ច ដែលបាន​ប្រគល់​ឲ្យ​ជានិច្ចកាលធ្វើជាគំរូក្នុងការគោរពឲ្យបានម៉ឺងម៉ាត់នូវច្បាប់របស់រដ្ឋ ក្រឹត្យវិន័យ​របស់​កង​ទ័ព និងអនុវត្តន៍ត្រឹមត្រូវ ប្រកបដោយប្រសិទ្ធភាពខ្ពស់តាមបទបញ្ជារបស់អគ្គបញ្ជាការ។

ជាមួយគ្នានោះដែរលោកឧត្តមសេនីយ៍ឯក ហួត ឈាងអន ក៏បានណែនាំឲ្យនាយទាហាន និង​ពល​ទាហាន​ទាំង​អស់ នៃនាយកទីចាត់ការចលនូប្បត្ថម្ភ អគ្គបញ្ជាការ ត្រូវរក្សាសាមគ្គីភាពផ្ទៃ​ក្នុង​ឲ្យ​បាន​រឹងមាំ ទប់ស្កាត់នូវរាល់ឧបាយកលញុះញង់ បំបែកបំបាក់របស់ពួកអមិត្ត, ប្រឆាំងតប​ចំពោះ​សង្គ្រាម​ចិត្ត​សាស្ត្រ តាមរយៈគ្រប់រូបភាព, និងត្រូវចេះជួយឧបត្ថម្ភ​គ្នា​ទៅ​វិញ​ទៅ​មក​នៅគ្រា​មាន​ការ​ពឹង​ពាក់​ចាំបាច់ ,លើកកម្ពស់សីលធម៌រស់នៅ និងការពង្រឹងកាយសម្បទា និងចៀសឲ្យឆ្ងាយ​ពី​គ្រឿង​ញៀន គ្រប់ប្រភេទ មិនត្រូវល្មើសច្បាប់ចរាចរណ៍ មិនប្រើប្រាស់អាវុធខុសច្បាប់ មិនប្រព្រឹត្ត​អំពើ​ឆបោក និងអំពើដែលច្បាប់ហាមឃាត់ និងសង្គមស្អប់ខ្ពើមជាដើម។

យ៉ាងណាក៏ដោយនៅក្នុងពិធីបំពាក់ឋានន្តរសក្តិនោះ លោកឧត្តមសេនីយ៍ឯក ហួត ឈាងអន ក៏​បាន​ថ្លែង​កោត​សរសើរ និងវាយតម្លៃខ្ពស់ចំពោះថ្នាក់ដឹកនាំ នាយទាហាន នាយទាហានរង និង​ពល​ទាហានទាំងអស់នៃទីចាត់ការចលនូប្បត្ថម្ភដែលបានគោរពវិន័យ បទបញ្ជាផ្ទៃក្នុង និង​មាន​សាមគ្គីភាព​ផ្ទៃ​ក្នុង ព្រមទាំងបានខិតខំប្រឹងប្រែងបំពេញតួនាទីភារកិច្ចរបស់ខ្លួន ប្រកបដោយ​ឆន្ទៈ​ស្មោះត្រ​ង់ តស៊ូពុះពារគ្រប់ឧបសគ្គ និងមានសេចក្ដីក្លាហាន ហ៊ានលះបង់​គ្រប់​បែប​យ៉ាង​ក្នុង​ការ​ចូល​រួម​ថែ​រក្សាការពារសន្តិសុខ សណ្ដាប់ធ្នាប់សង្គម និងត្រៀម​ខ្លួន​គ្រប់​ពេល​វេលា​ចូល​រួម​ជួយ​អន្ត​រាគមន៍​ សង្គ្រោះ្រជាពលរដ្ឋ ែលរងគ្រោះ​ដោយ​គ្រោះម​ហន្ត​រាយ​ផ្សេង​ៗ​នា​ពេល​កន្លង​មក​ផង​ដែរ​។

ទាក់ទងនឹងកិច្ចការបំពាក់ឋានន្តរសក្តិនេះលោកឧត្តមសេនីយ៍ គូសបញ្ជាក់​ផង​ដែរ​អំពី​ការ​តែង​តាំង​មុខ​តំណែង និងដំឡើងឋានន្តរសក្តិជូនយោធិនទីចាត់ការចលនូប្បត្ថម្ភនាពេលនេះ គឺបាន​ប្រព្រឹត្តិ​ទៅ​ដោយ​មានយន្តការត្រួតពិនិត្យវាយតម្លៃច្បាស់លាស់លើសីលធម៌ គុណធម៌ សមត្ថភាព គុណភាព និងលទ្ធផលការងារ ជាពិសេសគោលការណ៍ដែលមានចែងក្នុងច្បាប់ ស្តីពីលក្ខ​ន្តិកៈ​ទូទៅ​ចំពោះ​យោធិននៃកងយោធពលខេមរភូមិន្ទ និងបទវិន័យទូទៅ​សម្រា​ប់កង​យោធ​ពល​ខេមរ​ភូមិន្ទ​។ ម្យ៉ាងវិញទៀតកិច្ចការនេះ ទីចាត់ការចលនូប្បត្ថម្ភបាន​អនុវត្ត​ត្រឹម​ត្រូវ​តាម​លក្ខ​ខណ្ឌ​កំណត់​របស់​ទីចាត់ការបុគ្គលិក និងគោលការណ៍ដឹកនាំរបស់អគ្គបញ្ជាការ៕ អត្ថបទ៖ បាន ចក់