កីឡដ្ឋានថ្មីរបស់ក្លឹបអង្គរថាយហ្គឺរ នឹងប្រើសម្រាប់ការប្រកួតលីគកំពូលចុងសប្តាហ៍

ការទន្ទឹងរង់ចាំបានមកដល់! ក្លឹបបាល់ទាត់ដែលម្ចាស់ជាជនជាតិជប៉ុន អង្គរថាយហ្គឺរ នឹង​ប្រើ​ប្រាស់​កីឡដ្ឋានថ្មីរបស់ខ្លួនដែលដាក់ឈ្មោះតាមម្ចាស់ក្លឹបថាកីឡដ្ឋាន អាគីហ៊ីរ៉ូ កាតូ នឹងត្រូវប្រាស់​សម្រាប់​ការប្រកួតលីគកំពូលកម្ពុជា ទល់នឹងក្លឹបមកពីរាជធានីភ្នំពេញ សមាគមកីឡាបាល់​ទាត់​ក្រសួង​មហាផ្ទៃ ថ្ងៃទី១០ ខែវិច្ឆិកា ឆ្នាំ២០២៤ ម៉ោង ៦និង០០នាទីល្ងាច។

ម្សិលមិញមន្ត្រីខេមបូឌានព្រីមៀរលីគដឹកនាំដោយនាយកប្រតិបត្តិ Peter Koo បានចុះត្រួត​ពិនិត្យ​កីឡដ្ឋាន​នេះ​ដើម្បីសម្រេចថាតើអាចលេងបានរឺអត់។ ជាលទ្ធផលតំណាងក្លឹបអង្គរថាយហ្គឺរ បញ្ជាក់ថា CPL សម្រេចឱ្យប្រើប្រាស់ និងប្រកួតផ្លូវការហើយ។

សូមរំលឹកថា ក្នុងកច្សម្ភាសន៍ជាមួយ BTV Newsថ្មីៗនេះ ជាមួយការសាងសង់កីឡដ្ឋានផ្លូវការ ក្រោយបង្កើតក្លិបជិត ១០ឆ្នាំនៅកម្ពុជា លោក Akihiro Kato ប្រធានក្លិបអង្គរថាយហ្គឺរ បាន​បង្ហាញនូវចក្ខុវិស័យដ៏វែងឆ្ងាយលើសពីបាល់ទាត់ ដោយលោករំពឹងថា សមិទ្ធផលថ្មីមួយនេះ នឹង​រួម​ចំណែកអភិវឌ្ឍវិស័យកីឡាកម្ពុជា ក៏ដូចជាលើកកម្ពស់សេដ្ឋកិច្ច និងទេសចរណ៍​នៅ​ខេត្ត​សៀមរាប​ទៀតផង ។

លោក Akihiro Katoបន្តថា ការសាងសង់កីឡដ្ឋាននេះ ធ្វើតាមលទ្ធភាព ទៅតាមកម្រិតធនធាន ដោយជំហានដំបូងក្រៅពីទីលានប្រកួត គឺធ្វើកន្លែងអង្គុយត្រឹម ២,០០០កៅអី ។ តែអ្វីដែល​សំខាន់ គឺការសាងសង់ស្របតាមស្ដង់ដារអន្ដរជាតិ ក៏ដូចជា AFC ហើយបើ​មាន​ការ​ចូល​រួម​គាំទ្រ​កាន់​តែ​ច្រើន លោកនឹងពង្រីកសាងសង់កាន់តែធំ ។

រហូតដល់លក់ក្រុមហ៊ុននៅជប៉ុន ដើម្បីដំណើរការក្លិប និងសាងសង់កីឡដ្ឋាននេះ ហេតុ​ផល​សំខាន់​បំផុត គឺដោយសារលោកស្រាលាញ់ប្រទេសកម្ពុជាខ្លាំង ។ ហេតុនេះ លោកសុទិដ្ឋិនិយ​ម​ក្រោយ​វត្តមានកីឡដ្ឋានរបស់ក្លិប មិនត្រឹមតែជួយការអភិវឌ្ឍកីឡាបាល់ទាត់នោះទេ នឹងអាច​ជួយ​ដល់សេដ្ឋកិច្ច និងទេសចរណ៍នៅសៀមរាប ។ ម្យ៉ាងក៏ជា​គំរូ​ស​ម្រាប់ក្លិ​ប​តំណាង​ឲ្យ​ខេត្ត​មួយ​ផង​ដែរ​ ។

លោក Akihiro Kato បានបន្ថែមថា ដីដែលលោកបានវិនិយោគ សម្រាប់សាងសង់កីឡដ្ឋាននេះ មានទំហំសរុប ៦ហិចតា ក្នុងនោះ ៣ហិចតាសម្រាប់ធ្វើកីឡដ្ឋាន ហើយសល់ប៉ុន្មាន លោក​នឹង​កៀគ​រវិនិយោគិនមកវិនិយោគធ្វើជាក្រុងមួយ ដែលមានមន្ទីរពេទ្យ និងសាលារៀនជាដើម ។ លោក​សង្ឃឹមថា ៥ ឬ ១០ឆ្នាំទៀត ទីតាំងនេះ មិនត្រឹមតែជាកីឡដ្ឋាននោះទេ តែនឹង​ក្លាយ​ជា​ទី​ប្រជុំ​ជន​មួយ ដែលផ្ដល់លើសពីកីឡាបាល់ទាត់ដល់ប្រជាពលរដ្ឋ និងទេសចរណ៍ ។

សូមបញ្ជាក់ថា កីឡដ្ឋានរបស់ក្លិបអង្គរថាយហ្គឺរស្ថិតនៅភូមិបឹង សង្កាត់ក្របីរៀ ក្រុង និងខេត្តសៀមរាប៕