នាយករដ្ឋមន្ត្រីអ៊ីស្រាអែល បណ្តេញរដ្ឋមន្ត្រីការពារជាតិ ជុំវិញ «វិបត្តិនៃសេចក្តីទុកចិត្ត»

នាយករដ្ឋមន្ត្រីអ៊ីស្រាអែល លោក Benjamin Netanyahu បានបណ្តេញរដ្ឋមន្ត្រីការពារជាតិ លោក យ៉ូអាវ ហ្កាលែន (Yoav Gallant) កាលពីថ្ងៃអង្គារ ទី៥ ខែវិច្ឆិកា ដោយលើកឡើងពី «វិបត្តិនៃសេចក្តីទុកចិត្ត» ហើយជំនួសដោយលោក Israel Katz ដែលពីមុនជារដ្ឋមន្ត្រីការបរទេស។

ការិយាល័យរបស់លោក Netanyahu បាននិយាយនៅក្នុងសេចក្តីថ្លែងការណ៍ថា លោកនាយករដ្ឋមន្ត្រី បានតែងតាំងលោក Gideon Saar ជារដ្ឋមន្ត្រីការបរទេសថ្មី។ លោក Gallant និងលោក Netanyahu ទាំងពីរនាក់ស្ថិតនៅក្នុងគណបក្សស្តាំនិយម Likud មិនចុះសម្រុងគ្នាជាច្រើនខែមកហើយ ជុំវិញគោលដៅនៃសង្រ្គាមរយៈពេល១៣ ខែមកនេះ របស់អ៊ីស្រាអែលនៅតំបន់ហ្កាហ្សា ប្រឆាំងនឹងក្រុមសកម្មប្រយុទ្ធហាម៉ាសប៉ាឡេស្ទីន។

លោក Netanyahu បាននិយាយថា លោក Gallant បានធ្វើសេចក្តីថ្លែងការណ៍ដែល «ផ្ទុយទៅនឹងការសម្រេចចិត្តរបស់រដ្ឋាភិបាល និងការសម្រេចចិត្តរបស់គណៈរដ្ឋមន្ត្រី»។ ក្នុងការ្លើយតប លោក Gallant បាននិយាយថា «សន្តិសុខនៃរដ្ឋអ៊ីស្រាអែលតែងតែមាន ហើយនឹងនៅតែជាបេសកកម្មនៃជីវិតរបស់ខ្ញុំជានិច្ច»។

របាយការណ៍ បានលេចឡើងកាលពីខែកញ្ញាថា លោក Netanyahu ស្ថិតក្រោមសម្ពាធពីដៃគូចម្រុះស្តាំនិយម ដែលកំពុងពិចារណាពីការបណ្តេញលោក Gallant ចេញ។

កាលពីថ្ងៃអង្គារ កងកម្លាំងអ៊ីស្រាអែល បានចេញបទបញ្ជាជម្លៀសថ្មីនៅភាគខាងជើងតំបន់ហ្កាហ្សាស្ទ្រីប និងបានធ្វើការវាយប្រហារដោយយោធា ដែលគ្រូពេទ្យសង្គ្រោះបឋម និងប្រព័ន្ធផ្សព្វផ្សាយ ប៉ាឡេស្ទីន បាននិយាយថា បានសម្លាប់មនុស្សយ៉ាងហោចណាស់៣៥នាក់ចាប់តាំងពីយប់ថ្ងៃចន្ទ។