នគរបាលរាជធានីនឹងបង្រាយកម្លាំងជិត ៥ពាន់នាក់ការពាសន្តិសុខក្នុងព្រះរាជពិធីបុណ្យអុំទូក

នគរបាលរាជធានីភ្នំពេញ នឹងប្រើប្រាស់កម្លាំងជិត៥ពាន់នាក់ ត្រៀមការពារសន្តិសុខ និងរបៀប​រៀបរយ​សាធារណៈ ជូនប្រជាពលរដ្ឋ នៅក្នុងព្រះរាជពីធីបុណ្យអុំទូក ខាងមុខ ។

ឯកឧត្ដម​ឧត្តមសេនីយ៍ឯក ជួន ណារិន្ទ អគ្គស្នងការរងនគរបាលជាតិ និង​ជាស្នងការ​នគរបាល​រាជ​ធានី​ភ្នំពេញ​បានប្រាប់ឱ្យដឹងថា កិច្ច​ការងារ​ការពារសន្តិសុខ និងរក្សាបាន​របៀប​រៀប​រយ​សាធារណៈ ​គឺជាកាតព្វកិច្ចរបស់សមត្ថកិច្ច ក៏​ដូច​ជា​កម្លាំងគណៈបញ្ជាការឯកភាពថ្នាក់រាជធានី និងថ្នាក់ជាតិ ត្រូវសហការ ដើម្បី​ថែ​រក្សា​ឱ្យ​បាន​ល្អ​ប្រសើរ ក្នុងឱកាស នៃព្រះរាជពិធីបុណ្យអុំទូក ដែលនឹងកាន់តែគៀកខិតមកដល់ ។

ឯកឧត្តមស្នងការបញ្ជាក់ថា ឆ្នាំនេះ នគរបាលបង្កើនគោលដៅបញ្ចៀសចរាចរណ៍ច្រើនជាងមុន ដើម្បី​បញ្ចៀសយានយន្តផ្សេងៗ មិនឱ្យចូលទៅក្នុងរង្វង់ទីតាំងប្រារព្ធពិធីនោះឡើយ ក្នុង​ការ​ទុក​លទ្ធភាព ឱ្យបងប្អូនប្រជាពលរដ្ឋ អាចដើរដោយថ្មើរជើង លេងកម្សាន្តដោយភាពសប្បាយរីករាយ ។

សូមបញ្ជាក់ថា ព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំុក នឹងប្រារព្ធឡើង​រយៈ​ពេល​០៣ថ្ងៃ គឺនៅថ្ងៃទី១៤ , ១៥ , ១៦ ខែវិច្ឆិកា ឆ្នាំ២០២៤ខាងមុខនេះ៕ អត្ថបទ ៖ លីហេង