រដ្ឋបាលខណ្ឌបឹងកេងកង នាំយកទេយ្យទាន និងបច្ច័យ ចូលរួមបុណ្យកឋិនទានសាមគ្គីវត្តលង្កា

ភ្នំពេញ ៖ នារសៀលថ្ងៃទី០៧ ខែវិច្ឆិកា ឆ្នាំ២០២៤នេះ រដ្ឋបាលខណ្ឌបឹងកេងកង បាននាំយកទេយ្យទាន និងបច្ច័យ ចូលរួមជាមួយ ពិធីបុណ្យកឋិនទានសាមគ្គីវត្តលង្កា ដែលប្រព្រឹត្តិទៅនៅក្នុងវត្តលង្កាព្រះកុសុមារាម ស្ថិតក្នុងសង្កាត់បឹងកេងកងទី១ ខណ្ឌបឹងកេង រាជធានីភ្នំពេញ ។

ការចូលរួមជាមួយបុណ្យកឋិនទាននេះ ដឹកនាំដោយលោកសុខ សម្បត្តិ អភិបាលខណ្ឌបឹងកេងកង និងមានការអមចូលរួមពីសំណាក់មន្ត្រីចំណុះរដ្ឋបាលសង្កាត់ ខណ្ឌ ជាច្រើនរូបទៀតផងដែរ ។

ក្រៅពីមន្ត្រីរដ្ឋបាលខណ្ឌ គេក៏សង្កេតឃើញមានប្រជាពុទ្ធបរិស័ទជាច្រើនកុះករ ក៏បានចូលរួមជាមួយបុណ្យកឋិនទានខាងលើនេះដែរ ដែលកឋិនទានសាមគ្គីនេះ ផ្តើមរៀបចំពិធីបុណ្យឡើងដោយ សម្តេចព្រះធម្មលិខិតបណ្ឌិតសៅចន្ទថុល្លព្រះចៅអធិការវត្តលង្កាព្រះកុសុមារាមព្រមទាំងព្រះសង្ឃទាំងអស់នៅក្នុងវត្ត ។

ក្នុងនាមថ្នាក់ដឹកនាំ នៃរដ្ឋបាលខណ្ឌ លោកសុខ សម្បត្តិ ក៏បាននាំយកទេយ្យទាន មានគ្រឿងឧបភោគបរិភោគ , ទឹកសុទ្ធ ភេសជ្ជះ និងគ្រឿងទេសនានាជាច្រើនទៀត រួមជាមួយបច្ច័យមួយចំនួនធំផងដែរ ប្រគេនដល់អង្គកឋិនទានខាងលើនេះ ដើម្បីជារចូលរួមចំណែកសាងកុសលផលបុណ្យជាមួយព្រះពុទ្ធសាសនា ក្នុងនាមជាពុទ្ធបរិស័ទ ដែលគោរព និងដើរតាមគន្លងរបស់ព្រះពុទ្ធជាអង្គម្ចាស់ ។

កឋិនទានសាមគ្គី នៅវត្តលង្កាខាងលើនេះដែរ ក៏មានរៀបចំជាភោជនីយ៍អាហារ ជាច្រើនតុផងដែរ សម្រាប់ទទួលភ្ញៀវជាពុទ្ធស័ទ ដែលបានចូលរួមកម្មវិធីបុណ្យ ក្រោយពីស្តាប់ព្រះសង្ឃសូត្រមន្តចប់ អាចចូលរួមទទួលទានបាន មុនពេលត្រឡប់ទៅកាន់គេហដ្ឋានវិញ ៕ ដោយ ÷ លីហេង