យោធាអាមេរិក ថាខ្លួនត្រៀមរួចរាល់ដើម្បីអនុវត្តបទបញ្ជាស្របច្បាប់នៃរដ្ឋបាលលោក ត្រាំ

រដ្ឋមន្ត្រីការពារជាតិអាមេរិក លោក ឡយ អូស្ទីន (Lloyd Austin) បានប្រាប់កងទ័ពនៅក្នុងអនុស្សរណៈមួយដែលបានចេញផ្សាយកាលពីថ្ងៃព្រហស្បតិ៍ (០៧ វិច្ឆិកា) ថា មន្ទីរបញ្ចកោណបានប្តេជ្ញាចិត្តចំពោះការផ្ទេរអំណាចប្រកបដោយសណ្តាប់ធ្នាប់ទៅកាន់រដ្ឋបាលថ្មីរបស់លោក ដូណាល់ ត្រាំ (Donald Trump) ហើយថា យោធានឹងមិនចូលប្រឡូកក្នុងនយោបាយឡើយ និងបានត្រៀមខ្លួនជាស្រេចដើម្បីអនុវត្ត “រាល់បទបញ្ជាដែលស្របច្បាប់”។

លោក ត្រាំ បានជាប់ឆ្នោតជាប្រធានាធិបតីនៅថ្ងៃអង្គារសប្ដាហ៍នេះ ដែលជាការត្រលប់មកវិញដ៏គួរឱ្យភ្ញាក់ផ្អើល និងជំរុញការដឹកនាំថ្មីរបស់សហរដ្ឋអាមេរិក ដែលទំនងជានឹងសាកល្បងភាពធន់នៃស្ថាប័នប្រជាធិបតេយ្យនៅក្នុងប្រទេស និងទំនាក់ទំនងនៅបរទេស។

ក្នុងអំឡុងពេលបទសម្ភាសន៍មួយកាលពីខែមុន នៅពេលត្រូវសាកសួរថាតើលោករំពឹងថានឹងមាន “ភាពវឹកវរ” នៅថ្ងៃបោះឆ្នោតដែរឬទេ លោក ត្រាំ ហាក់បង្ហើបថា យោធាអាចត្រូវបានដាក់ពង្រាយប្រឆាំងនឹងពលរដ្ឋដែលជំទាស់នឹងលោក។

នៅក្នុងអនុស្សរណៈមួយទៅកាន់កងទ័ពអាមេរិក លោក អូស្ទីន បាននិយាយថា “យោធាអាមេរិកនឹងបន្តឈរនៅដាច់ឆ្ងាយពីឆាកនយោបាយ ហើយការពារប្រទេសប្រកបដោយគោលការណ៍ និងវិជ្ជាជីវៈ”។ ថ្លែងជាមួយអ្នកសារព័ត៌មាននៅល្ងាចថ្ងៃពុធក្នុងទីក្រុងម៉ៃអាមី (Miami) លោក អូស្ទីន បានបញ្ជាក់ថា លោកជឿថាបណ្ដាមេដឹកនាំជាន់ខ្ពស់នៅមន្ទីរបញ្ចកោណនឹងបន្តធ្វើរឿងដែលត្រឹមត្រូវ៕