សមរភូមិមុខអ៊ុយក្រែន និងក្នុងទីក្រុង Kyiv សង្ឃឹម ថាលោកTrump នឹងបន្តជួយរហូតចប់សង្រ្គាម

កងទ័ពនៃអង្គភាពកាំភ្លើងធំរបស់អ៊ុយក្រែននៅសមរភូមិជួរមុខនៃភាគខាងកើតរបស់ប្រទេសនេះ បានដឹងយ៉ាងច្បាស់អំពីលទ្ធផលបោះឆ្នោតអាមេរិកដែលចង្អុលទៅជ័យជម្នះរបស់លោក Donald Trump កាលពីថ្ងៃពុធ ប៉ុន្តែមានក្តីសង្ឃឹមយ៉ាងមុតមាំចំពោះប្រធានាធិបតីបន្ទាប់របស់សហរដ្ឋអាមេរិក។លោក Trumpធ្លាប់និយាយថាលោកនឹងបញ្ចប់សង្រ្គាមរុស្ស៊ី-អ៊ុយក្រែនត្រឹម២៤ម៉ោង។

ប៉ុន្មានម៉ោងក្រោយប្រកាសជ័យជម្នះរបស់លោក Trump មេបញ្ជាការវ័យ៣៩ឆ្នាំរបស់អង្គភាពនេះនិយាយថា ពួកគេសង្ឃឹមថាបរិមាណអាវុធ និងកាំភ្លើងសម្រាប់ជ័យជម្នះរបស់ពួកគេនឹងកើនឡើង។ យើងមិនខ្វល់ថានរណាជាប្រធានាធិបតីទេ ដរាបណាគេមិនកាត់ជំនួយចេញពីយើង ព្រោះយើងត្រូវការជំនួយ។

ទោះយ៉ាងណាក៏ដោយជ័យជម្នះរបស់លោក Trump បានបណ្ដាលឱ្យមានមន្ទិលជុំវិញការគាំទ្ររបស់អាមេរិកសម្រាប់អ៊ុយក្រែន ហើយនៅទីបំផុតថាតើទីក្រុង Kyiv អាចយកឈ្នះការឈ្លានពានរបស់រុស្ស៊ីបានដែរឬទេ។ ប្រជាជនអ៊ុយក្រែនជាច្រើនសង្ឃឹមថាលោក Trump នឹងប្រកាន់ខ្ជាប់នូវការគាំទ្ររបស់អាមេរិកសម្រាប់ប្រទេសរបស់ពួកគេ។

លោក Trump បានកោតសរសើរពីទំនាក់ទំនងល្អរបស់លោកជាមួយលោកប្រធានាធិបតី Vladimir Putin ហើយបានហៅមេដឹកនាំរុស្ស៊ីថាជាមនុស្សឆ្លាត។សម្រាប់ការឈ្លានពានអ៊ុយក្រែន លោកបានរិះគន់ម្តងហើយម្តងទៀតនូវការគាំទ្ររបស់អាមេរិកចំពោះអ៊ុយក្រែន។ លោកបានចាត់ទុកប្រធានាធិបតីអ៊ុយក្រែន Volodymyr Zelensky ថាជា “អ្នកលក់ដ៏អស្ចារ្យបំផុតនៅលើផែនដី” សម្រាប់ការឈ្នះជំនួយពីអាមេរិក។

លោក Zelensky ស្ថិតក្នុងចំណោមមេដឹកនាំពិភពលោកដំបូងដែលអបអរសាទរលោក Trump ជាសាធារណៈនិងនិយាយថាលោកទាំងពីរបានពិភាក្សាអំពីរបៀបបញ្ចប់ការឈ្លានពានរបស់រុស្ស៊ី អំឡុងជំនួបកាលពីខែកញ្ញានៅអាមេរិក។លោកថាខ្ញុំសូមសរសើរចំពោះការប្តេជ្ញាចិត្តរបស់ប្រធានាធិបតី Trumpលើវិធីសាស្រ្ត “សន្តិភាពតាមរយៈកម្លាំង” នៅក្នុងកិច្ចការពិភពលោក។ នេះគឺពិតជាគោលការណ៍ដែលអាចនាំមកនូវសន្តិភាពក្នុងប្រទេសអ៊ុយក្រែនកាន់តែជិត។ នៅទីក្រុង Kyiv ដែលរងការវាយប្រហារពីយានដ្រូនរបស់រុស្សី ជារៀងរាល់ថ្ងៃ ប្រជាជនមានការប្រុងប្រយ័ត្នចំពោះការរំពឹងទុករបស់ពួកគេលើប្រធានាធិបតីអាមេរិកបន្ទាប់។ ពួកគេគិតថា អ៊ុយក្រែននឹងត្រូវបង្ខំចិត្តបោះបង់ទឹកដីជាថ្នូរនឹងសន្តិភាពក្រោមអាណត្តិប្រធានាធិបតី Trump។ ប៉ុន្តែពួកគេពេញចិត្តចំពោះអ្វីហៅថាថាក្តីសង្ឃឹមក្លែងក្លាយដែលរដ្ឋបាល Biden ផ្តល់ជូន៕