អ៊ីរ៉ង់បដិសេធបទចោទរបស់អាមេរិក លើបុរសអ៊ីរ៉ង់ម្នាក់ ដែលរៀបផែនការសម្លាប់លោក Trump

ក្រសួងយុត្តិធម៌បាននិយាយថា សហរដ្ឋអាមេរិក បានចោទប្រកាន់បុរសជនជាតិអ៊ីរ៉ង់ម្នាក់កាលពីថ្ងៃសុក្រ (០៨ វិច្ឆិកា) ពាក់ព័ន្ធនឹងការចោទប្រកាន់ថា បុរសនោះត្រូវបានបញ្ជាដោយកងឆ្មាំបដិវត្តន៍ឥស្សរជនរបស់អ៊ីរ៉ង់ IRGC ដើម្បីធ្វើឃាតប្រធានាធិបតីជាប់ឆ្នោត លោក Donald Trump ប៉ុន្តែអ៊ីរ៉ង់ បានបដិសេធ។

ក្រសួងបាននិយាយនៅក្នុងសេចក្តីថ្លែងការណ៍មួយថា ជនជាប់ចោទឈ្មោះ ហ្វាហាដ ស្ហាគឺរី (Farhad Shakeri) បានជូនដំណឹងដល់សមត្ថកិច្ចថា គេបានប្រគល់ភារកិច្ចនោះឱ្យលោកនៅថ្ងៃទី០៧ ខែតុលា ឆ្នាំ២០២៤ ដោយផ្តល់នូវផែនការសម្លាប់លោក Trump។ ក្រសួងបន្តថា Shakeri បានប្រាប់ថា រូបគេមិនមានបំណងបង្កើតផែនការបែបនេះនៅក្នុងពេលវេលាដែលបញ្ចាដោយកងឆ្មាំបដិវត្តន៍ IRGC នោះទេ។

អ្នកនាំពាក្យក្រសួងការបរេស៊ីរ៉ង់ លោក អ៊ីស្មែល បាហ្កាអ៊ី (Esmail Baghaei) បាននិយាយនៅក្នុងសេចក្តីថ្លែងការណ៍មួយ ដែលធ្វើឡើងដោយប្រព័ន្ធផ្សព្វផ្សាយអ៊ីរ៉ង់ កាលពីថ្ងៃសៅរ៍ថា ការអះអាងនេះគឺជាផែនការ “គួរឱ្យស្អប់ខ្ពើម” ដោយអ៊ីស្រាអែល និងក្រុមប្រឆាំងអ៊ីរ៉ង់នៅក្រៅប្រទេស ដើម្បី “ធ្វើឱ្យមានភាពស្មុគស្មាញដល់បញ្ហារវាងអាមេរិក និងអ៊ីរ៉ង់” ។

ក្រសួងយុត្តិធម៌អាមេរិក បានពិពណ៌នាជនសង្ស័យ Shakeri វ័យ ៥១ឆ្នាំនេះថា ជាគ្នីគ្នារបស់ឆ្មាំបដិវត្ត ដែលរស់នៅក្នុងទីក្រុងតេអេរ៉ង់ ហើយបានធ្វើអន្តោប្រវេសន៍ទៅសហរដ្ឋអាមេរិក កាលពីនៅក្មេង និងត្រូវបាននិរទេសនៅប្រហែលឆ្នាំ២០០៨ បន្ទាប់ពីកាត់ទោសពីបទប្លន់ទ្រព្យ។

គួររម្លឹកថា លោក Trump បានរួចផុតពីការប៉ុនប៉ងធ្វើឃាតចំនួនពីរលើករួចមកហើយនៅឆ្នាំនេះ នៅក្នុងអំឡុងដំណើរយុទ្ធនាការបោះឆ្នោតរបស់ខ្លួន៕