យុវជនអាស៊ាន ទទួលការបណ្ដុះបណ្ដាលការគ្រប់គ្រងស្វ័យប្រវត្តិកម្ម ពីវិទ្យាស្ថានពហុបច្ចេកទេសព្រះកុសុមៈ

យុវជន នៃប្រទេសក្នុងតំបន់អាស៊ានចំនួន៦ រួមមាន ប្រទេសឥណ្ឌូនេស៊ី ព្រុយណេ ម៉ាឡេស៊ី មីយ៉ាន់ម៉ា ហ្វីលីពីន និងប្រទេសកម្ពុជា ចំនួន១៥រូប បានចូលរួមក្នុងវគ្គបណ្ដុះបណ្ដាលស្តីពី “Sequence Control” ពាក់ព័ន្ធនឹងការគ្រប់គ្រងស្វ័យប្រវត្តិកម្ម ក្នុងគម្រោងឧស្សាហកម្ម ឬខ្សែសង្វាក់ផលិតកម្ម ប្រកបដោយប្រសិទ្ធភាព ចំណេញពេលវេលា និងសន្សំសំចៃ ។

នៅក្នុងពិធីបិទវគ្គបណ្តុះបណ្តាលស្តីពី “Sequence Control” សម្រាប់ជំនាន់ទី៣ ក្រោមគម្រោង ASEAN-ROK TVET Mobility Programmes កាលពីរសៀលថ្ងៃទី៨ ខែវិច្ឆិកា ឆ្នាំ២០២៤ ឯកឧត្តមបណ្ឌិត ហ៊ីង ស៊ីដេត អគ្គនាយកនៃអគ្គនាយកដ្ឋានអប់រំបណ្តុះបណ្តាលបច្ចេកទេស និងវិជ្ជាជីវៈ មានប្រសាសន៍ថា វគ្គបណ្តុះបណ្តាលនេះមានរយៈពេល ៣ខែ ដោយ២ខែ សិក្សានៅវិទ្យាស្ថានពហុបច្ចេកទេសព្រះកុសុមៈ និង១ខែ ត្រូវអនុវត្តការងារជាក់ស្តែង នៅតាមរោងចក្រ/សហគ្រាស) ហើយនេះជាជំនាន់ទី៣ ដែលគ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈ នៃក្រសួងការងារ និងប្តុះបណ្តាលវិជ្ជាជីវៈ ត្រូវានជ្រើសរើសជាដៃគូក្នុងក្របខណ្ឌអាស៊ាន-កូរ៉េ ក្នុងការបណ្តុះបណ្តាលសិស្ស សិក្ខាកាមមកពីបណ្តាប្រទេសអាស៊ាន ។

ឯកឧត្តមបន្តថា គោលបំណងនៃវគ្គបណ្តុះបណ្តាលដើម្បីផ្តល់នូវចំណេះដឹង និងជំនាញក្នុងការសរសេរកម្មវិធី PLC program ដើម្បីធ្វើឱ្យប្រតិបត្តិការនៃប្រព័ន្ធគ្រប់គ្រងស្វ័យប្រវត្តិកម្មនៅក្នុងគម្រោងឧស្សាហកម្ម ឬខ្សែសង្វាក់ផលិតកម្មប្រកបដោយប្រសិទ្ធភាព ចំណេញពេលវេលា និងសន្សំសំចៃ ជាពិសេសលើកកម្ពស់ជំនាញបច្ចេកទេសឱ្យដើរទាន់ឧស្សាហ៍កម្ម ៤.០ ។

សិក្ខាកាមជានិស្សិតកម្ពុជា និងហ្វីលីពីន ដែលបានចូលរួមក្នុងវគ្គបណ្ដុះបណ្ដាល បានលើកឡើងថា កម្មវិធីនេះ ពិតជាមានសារសំខាន់ខ្លាំងណាស់ សម្រាប់ពួកគេជាយុវជន ក្នុងការពង្រឹងសមត្ថភាព លើជំនាញបច្ចេកវិទ្យានេះ ហើយគ្រូបង្រៀន ក៏មានជំនាញច្បាស់លាស់ ក្នុងការបណ្ដុះបណ្ដាលពួកគេផងដែរ ។

គួរបញ្ជាក់ថា វគ្គបណ្តុះបណ្តាលមានរយៈពេល៣ខែ ចាប់ពីថ្ងៃទី១៩ ខែសីហា ឆ្នាំ២០២៤ ដល់ថ្ងៃទី១១ ខែវិច្ឆិកា ឆ្នាំ២០២៤ សិក្ខាកាមទាំង ១៥នាក់ គឺសិក្ខាកាមកម្ពុជា ៤នាក់, ហ្វីលីពីន ៣នាក់, ព្រុយណេ១នាក់, ឥណ្ឌូនេស៊ី២នាក់, ម៉ាឡេស៊ី២នាក់ និងមីយ៉ាន់ម៉ា៣នាក់ ។ គម្រោង “ASEAN-ROK TVET Mobility Programmes” ត្រូវបានរៀបចំឡើងដើម្បីពង្រឹងកម្មវិធី TVET ក្នុងបណ្តាលប្រទេសជាសមាជិកអាស៊ាន និងកាត់បន្ថយនូវគម្លាត នៃសមត្ថភាពការងារក្នុងចំណោមប្រទេសនានា នៃតំបន់អាស៊ាន តាមរយៈការអនុវត្តគម្រោង ASEAN-ROK TVET Mobility Programmes ឧបត្ថម្ភថវិកាដោយ ASEAN-ROK cooperation Fund ៕អត្ថបទ បាន សុខរិទ្ធិ