អាស៊ីអាគ្នេយ៍ ប្រឈមការប្រកួតប្រជែងតម្លៃទំនិញ ខណៈពន្ធរបស់អាមេរិកលើចិន ខិតកាន់តែជិត

ក្នុងពេលដែលប្រធានាធិបតីជាប់ឆ្នោតរបស់សហរដ្ឋអាមេរិក លោក Donald Trump បានគំរាមដាក់ពន្ធកាន់តែខ្ពស់ពន្ធលើទំនិញនាំចូល ក្រុមអ្នកវិភាគនិយាយថា ស្ថានភាពនោះមានគ្រោះថ្នាក់កាន់តែខ្លាំងសម្រាប់បណ្តាប្រទេសអាស៊ីអាគ្នេយ៍ ជុំវិញហានិភ័យនៃទីផ្សារពោរពេញដោយទំនិញតម្លៃថោករបស់ប្រទេសចិន ដែលបង្វែរទិសដៅចេញពីទីផ្សារអាមេរិក។

ខណៈពេលដែលនេះអាចជាដំណឹងដ៏ល្អសម្រាប់អ្នកប្រើប្រាស់ ប៉ុន្តែវាក៏មានន័យថា ការនាំចេញផ្ទាល់របស់តំបន់នឹងកាន់តែមានការប្រកួតប្រជែងខ្លាំង ដែលប៉ះពាល់ដល់កំណើនសេដ្ឋកិច្ច និងការងារ។

ក្នុងអំឡុងយុទ្ធនាការបោះឆ្នោត លោក Trump ដែលទើបតែឈ្នះអាណត្តិទីពីរជាប្រធានាធិបតីអាមេរិក បានប្តេជ្ញាថានឹងយកពន្ធរហូតដល់ ៦០% លើការនាំចូលរបស់ចិន និងយ៉ាងហោចណាស់ ១០% លើទំនិញពី្រទេសផ្សេងទៀតទាំងអស់។

ប្រសិនបើលោក Trump ធ្វើតាមការគំរាមកំហែងពន្ធរបស់ខ្លួនមែន សេដ្ឋកិច្ចអាស៊ីអាគ្នេយ៍ប្រឈមមុខនឹងការហូរហៀរដោយទំនិញរបស់ចិន ដែលមានតម្លៃថោកជាងដៃគូប្រកួតប្រជែង ដោយសារតែការឧបត្ថម្ភធនរបស់រដ្ឋ និងទំហំដ៏ធំនៃសេដ្ឋកិច្ចប្រទេសនេះ។

លោកស្រី ទ្រីញ ង្វៀន (Trinh Nguyen) សេដ្ឋវិទូជាន់ខ្ពស់ដែលមានមូលដ្ឋាននៅទីក្រុងហុងកុង របស់ក្រុមហ៊ុនប្រឹក្សា ណាធីស៊ីស (Natixis) បាននិយាយថា បណ្ដាប្រទេសក្នុងតំបន់ដែលកំពុងស្វះស្វែងរកការអភិវឌ្ឍសេដ្ឋកិច្ចរបស់ពួកគេ នឹងត្រូវមានយុទ្ធសាស្ត្រខ្លាំងក្លាជាងមុន ប្រសិនបើពួកគេចង់ប្រកួតប្រជែងជាមួយនឹងទំនិញរបស់ចិន ដែលលក់ក្នុងតម្លៃទាប៕