មនុស្សរាប់ម៉ឺននាក់ ចេញតវ៉ាប្រឆាំងនឹងច្បាប់ជនជាតិដើមភាគតិចនៅនូវែលសេឡង់

ប្រជាជននូវែលសេឡង់ រាប់ម៉ឺននាក់បានប្រមូលផ្តុំគ្នានៅមុខសភាក្នុងថ្ងៃអង្គារ (១៩ វិច្ឆិកា) នេះដើម្បីធ្វើការតវ៉ាដ៏ធំបំផុតមួយមិនធ្លាប់មានរបស់ប្រទេស ប្រឆាំងនឹងសេចក្ដីស្នើច្បាប់ដែលក្រុមប្រឆាំងនិយាយថា ស្វែងរកការបន្ថយសិទ្ធិរបស់ជនជាតិដើមភាគតិចម៉ៅរី (Maori) និងគំរាមកំហែងកំណត់ឡើងវិញនៃទំនាក់ទំនងពូជសាសន៍អាយុកាលជាច្រើនទសវត្សរ៍។

ហ្វូងមនុស្សដ៏ច្រើន ដែលនគរបាលប៉ាន់ប្រមាណថាចំនួន ៣៥.០០០នាក់ បានប្រមូលផ្តុំគ្នានៅសភា ជាទីដែលសំណើច្បាប់គោលការណ៍នៃសន្ធិសញ្ញា ត្រូវដាក់ចេញដោយសមាជិកសភានៅដើមខែនេះ ដែលចង់បកស្រាយឡើងវិញនូវសន្ធិសញ្ញាដែលមានអាយុកាល ១៨៤ឆ្នាំ ដែលបានចុះហត្ថលេខារវាងជនជាតិអង់គ្លេស និងជនជាតិដើមភាគតិចម៉ៅរី។

មនុស្សម្នាប្រមូលផ្តុំគ្នាដោយកាន់ទង់ជាតិជាច្រើន ចាក់តន្ត្រី និងបង្កើតបរិយាកាសស្ទើរតែដូចក្នុងពិធីបុណ្យ។ បាតុកម្ម ដែលមានការហែក្បួនតវ៉ារយៈពេល ៩ថ្ងៃ ឬហៅថា ហ៊ីកួយ (Hikoi) នេះបានចាប់ផ្តើមកាលពីសប្តាហ៍មុន នៅចុងភាគខាងជើងរបស់ប្រទេសនេះ ដោយមានមនុស្សរាប់ពាន់នាក់បានចូលរួមការប្រមូលផ្តុំគ្នានៅក្នុងទីក្រុងនានា ខណៈអ្នកដើរក្បួនតវ៉ាបានធ្វើដំណើរទៅភាគខាងត្បូងដោយថ្មើរជើង និងតាមរថយន្តទៅកាន់ទីក្រុងវែលីងតោន។

ទោះសេចក្ដីស្នើច្បាប់នេះខ្វះការគាំទ្រគ្រប់គ្រាន់ដើម្បីឆ្លងសភាក្ដី ប៉ុន្តែការដាក់ចេញរបស់វាបានបង្កឱ្យមានការតវ៉ានៅក្នុងប្រទេស និងក្នុងសភា ដោយអ្នកដែលឃើញថា នៅក្នុងនោះមានបំណងដើម្បីបញ្ច្រាសគោលនយោបាយជាច្រើនទសវត្សរ៍ដែលបង្កើតឡើងដើម្បីផ្តល់អំណាចដល់ជនជាតិម៉ៅរី៕