អភិបាលខណ្ឌបឹងកេងកង ជួបសំណេះសំណាល កម្លាំងសណ្តាប់ធ្នាប់ ដែលខិតខំបំពេញការងារ ក្នុងព្រះរាជពិធីបុណ្យអុំទូក

ភ្នំពេញ ៖ ដើម្បីជាការលើកទឹកចិត្ត ក្រោយពីព្រះរាជពិធីបុណ្យអុំទូក បណ្តែតប្រទីប និងសំពះព្រះខែអកអំបុក ត្រូវបានបញ្ចប់ដោយបរិយាកាសល្អប្រសើរហើយនោះ លោកសុខ សម្បត្តិ អភិបាលខណ្ឌបឹងកេងកង បានជួបសំណេះសំណាលជាមួយបងប្អូន ជាកងកម្លាំងសណ្តាប់ធ្នាប់ខណ្ឌ ដែលបានខិតខំប្រឹងប្រែង ក្នុងការយកចិត្តទុកដាក់ បម្រើ និងការពារ ជូនពលរដ្ឋ ក្នុងឱកាសព្រះរាជពិធីបុណ្យជាតិដ៏សម្ខាន់មួយនេះ ។

ពិធីជួបសំណេះសំណាលខាងលើនេះ ធ្វើឡើង កាលពីវេលារសៀលថ្ងៃទី១៨ ខែវិច្ឆិកា ឆ្នាំ២០២៤ ដោយមានការចូលរួមពីលោក-លោកស្រី អភិបាលរងខណ្ឌ លោកនាយក-លោកនាយករងរដ្ឋបាលខណ្ឌ និងកម្លាំងសណ្តាប់ធ្នាប់ខណ្ឌ ទាំងអស់ផងដែរ ។

ក្នុងឱកាសសំណេះសំណាលនោះដែរ លោកសុខ សម្បត្តិ អភិបាលខណ្ឌបឹងកេងកង បានធ្វើការកោតសរសើរ ចំពោះកម្លាំងសណ្តាប់ធ្នាប់ខណ្ឌ ដែលបានបំពេញនូវតួនាទី ភារកិច្ច របស់ខ្លួន និងការខិតខំប្រឹងប្រែង រក្សាសន្តិសុខ សុវត្ថិភាព រៀបចំសណ្ដាប់ធ្នាប់សាធារណៈ មិនថាតែមានរដូវបុណ្យទាន , បុណ្យជាតិប្រពៃណីធំៗ ឬថ្ងៃធម្មតានោះទេ ពោលគឺធ្វើយ៉ាងណា ដើម្បីអាចឱ្យងប្អូនប្រជាពលរដ្ឋក្នុងមូលដ្ឋានរស់នៅបានប្រកបដោយសេចក្តីសុខសប្បាយ ។

លោកអភិបាល បន្តថា ៖ កម្លាំងទាំងនេះ ក៏បានដើរតួសម្ខាន់ ក្នុងការជួយសម្រួលចរាចរណ៍ មិនថាយប់ថ្ងៃជូនប្រជាពលរដ្ឋ ពិសេសក្បួនធ្វើដំណើរពិសេសៗ របស់ថ្នាក់ដឹកនាំប្រទេសគ្រប់ជាន់ថ្នាក់ ក៏ដូចជាថ្នាក់ដឹកនាំកំពូលៗរបស់អន្តរជាតិ ដែលបានចូលមកកម្ពុជា ផងដែរ ។

ឈ្លៀតក្នុងឱកាសដដែលនោះ លោកអភិបាលខណ្ឌ ក៏បានធ្វើការឧបត្ថម្ភដល់កម្លាំងសណ្តាប់ធ្នាប់ខណ្ឌ ក្នុងម្នាក់ទទួលបាន ភេសជ្ជៈ១កេស , មី១កេស , ទឹកដោះគោ ២កំប៉ុង , អាវយឺត១ និងថវិកាមួយចំនួនផងដែរ ៕ លីហេង