ព្យុះទីហ្វុងធំៗចំនួន៣បានបំផ្លិចបំផ្លាញហ្វីលីពីនក្នុងទំហំទឹកប្រាក់៤៧៨លានប៉េសូ ខណៈមនុស្សមួយចំនួនស្លាប់

ក្រុមប្រឹក្សាកាត់បន្ថយ និងគ្រប់គ្រងគ្រោះមហន្តរាយជាតិហ្វីលីពីន (NDRRMC) បាននិយាយកាលពីថ្ងៃអង្គារសប្ដាហ៍នេះថា ព្យុះទីហ្វុងដ៏មហន្តរាយចំនួនបីក្នុងខែនេះ បានបំផ្លិចបំផ្លាញធ្វើឱ្យខាតបង់ថវិកាដល់ទៅ ៤៧៨ លានប៉េសូ ឬស្មើ៨,១២លានដុល្លារអាមេរិក នៅក្នុងវិស័យកសិកម្ម និងហេដ្ឋារចនាសម្ព័ន្ធ។

NDRRMC បាននិយាយនៅក្នុងរបាយការណ៍របស់ខ្លួនថា ព្យុះទីហ្វុង Nika, Ofel និង Pepito បានបំផ្លាញហេដ្ឋារចនាសម្ព័ន្ធមួយចំនួននៅក្នុងតំបន់ Cagayan Valley តំបន់រដ្ឋបាល Central Luzon និង តំបន់ Cordilleras ។

ប្រភពខាងលើបាននិយាយថា រលកនៃព្យុះស៊ីក្លូនក៏បានបំផ្លិចបំផ្លាញដំណាំ សត្វពាហនៈ និងសម្ភារៈកសិកម្ម ក្នុងទំហំទឹកប្រាក់ខាតបង់ចំនួន៨,៦លានប៉េសូ ផងដែរ។

គ្រោះមហន្តរាយអាកាសធាតុបានប៉ះពាល់ដល់មនុស្សប្រមាណ ១,៨លាននាក់ ក្នុងនោះ ប្រហែល ៤៥៣,០០០នាក់ បានទៅស្នាក់នៅមជ្ឈមណ្ឌលជម្លៀសនានា។

ក្រុមប្រឹក្សាកាត់បន្ថយ និងគ្រប់គ្រងគ្រោះមហន្តរាយជាតិហ្វីលីពីន ពុំទាន់បញ្ជាក់ថាមានអ្នកស្លាប់ដោយសារព្យុះទីហ្វុងទាំងបីនោះប៉ុន្មានអ្នកាទេ ប៉ុន្តែបាននិយាយថាមនុស្សយ៉ាងហោចណាស់២៥នាក់បានរងរបួស។ ជាមួយគ្នានេះ ក្រុមមន្ត្រីក្នុងតំបន់បានរាយការណ៍ថា Pepito ឬព្យុះម៉ាន-យី ( Man-Yi) បានសម្លាប់មនុស្សយ៉ាងហោចណាស់ ៨ នាក់។

ព្យុះស៊ីក្លូនទាំងនោះបានបង្កការជន់លិចក្នុងតំបន់ចំនួន៦ កាត់ផ្តាច់ចរន្តអគ្គិសនីនៅតំបន់ជុំវិញប្រហែល១០០ទីតាំង និងបានបំផ្លាញផ្ទះសម្បែងប្រជាពលរដ្ឋប្រហែល១.៥០០ខ្នង។

NDRRMC បាននិយាយថា យ៉ាងហោចណាស់ទីក្រុង និងទីប្រជុំជនចំនួន ២០បានប្រកាសដាក់ក្នុងគ្រាអាសន្នដោយសារគ្រោះមហន្តរាយទាំងនោះ។រដ្ឋាភិបាលបានផ្តល់ជំនួយក្នុងទំហំទឹកប្រាក់ ៥៤ លានប៉េសូ មកទល់ពេលនេះ៕