ការវាយប្រហាររបស់អ៊ីស្រាអែលលើទីក្រុង Palmyra របស់ស៊ីរី សម្លាប់អ្នកប្រយុទ្ធគាំទ្រអ៊ីរ៉ង់៨២នាក់

អង្គការឃ្លាំមើល បាននិយាយកាលពីថ្ងៃព្រហស្បតិ៍ថា ការវាយប្រហាររបស់អ៊ីស្រាអែល បានសម្លាប់អ្នកប្រយុទ្ធគាំទ្រអ៊ីរ៉ង់ចំនួន៨២នាក់ក្នុងទីក្រុង Palmyra របស់ប្រទេសស៊ីរី ដែលមួយចំនួនមកពីប្រទេសអ៊ីរ៉ាក់ និងលីបង់។

ប្រធានអង្គការឃ្លាំមើលសិទ្ធិមនុស្សប្រទេសស៊ីរី លោក Rami Abdel Rahman បាននិយាយថា ចំនួនអ្នកស្លាប់កាលពីថ្ងៃពុធ គឺជាចំនួន «ច្រើនបំផុត ដោយសារតែការវាយឆ្មក់របស់អ៊ីស្រាអែល ទៅលើក្រុមគាំទ្រអ៊ីរ៉ង់នៅក្នុងប្រទេសស៊ីរី» ចាប់តាំងពីសង្គ្រាមស៊ីវិលបានផ្ទុះឡើង ក្នុងឆ្នាំ២០១១។

អង្គការឃ្លាំមើល ដែលមានមូលដ្ឋាននៅចក្រភពអង់គ្លេស បាននិយាយថា ការវាយប្រហារ បានដាក់គោលដៅទៅលើទីតាំងចំនួនបីកន្លែងនៅទីក្រុង Palmyra។ ការវាយប្រហារមួយបានធ្លាក់ទៅលើការជួបជុំមួយរបស់ក្រុមអ្នកគាំទ្រអ៊ីរ៉ង់ដែលបានចូលរួមពីមេដឹកនាំមកពីក្រុម Al-Nujaba របស់អ៊ីរ៉ាក់ និងក្រុម ហេសបូឡា របស់លីបង់។

ក្រុមង្កេតការណ៍ និយាយថា ចំនួនអ្នកស្លាប់បានកើនឡើងដល់ ៨២នាក់ ជាអ្នកប្រយុទ្ធគាំទ្រអ៊ីរ៉ង់ ក្នុងនោះមានជនបរទេស ២២ នាក់ ភាគច្រើនមកពីចលនា អាល់-នូចាបា(Al-Nujaba) របស់អ៊ីរ៉ាក់ ប៉ុន្តែក៏រួមមាន បួននាក់មកពីក្រុមហេសបូឡា ផងដែរ។

បេសកជនរងពិសេសរបស់អង្គការសហប្រជាជាតិប្រចាំប្រទេសស៊ីរី លោក Najat Rochdi បានប្រាប់ក្រុមប្រឹក្សាសន្តិសុខ កាលពីថ្ងៃព្រហស្បតិ៍ថា ការទម្លាក់គ្រាប់បែកនេះ «ទំនងជាការវាយប្រហាររបស់អ៊ីស្រាអែលដ៏បង្ហូរឈាមបំផុតនៅក្នុងប្រទេសស៊ីរី»។