ការបង់ពន្ធជាការផ្ដល់នូវធនធានដ៏ចាំបាច់ ដើម្បីគាំទ្រដល់ការអភិវឌ្ឍសង្គម-សេដ្ឋកិច្ច

ការបង់ពន្ធគឺជាកាតព្វកិច្ច ហើយការយកពន្ធ គឺជាការផ្ដល់នូវធនធានដ៏ចាំបាច់ដល់រាជរដ្ឋាភិបាល ក្នុង​ការ​ផ្តល់សេវាសាធារណៈ និងអភិវឌ្ឍហេដ្ឋារចនាសម្ព័ន្ធសំខាន់ៗ ដើម្បីគាំទ្រ​ដល់​ការ​អភិវឌ្ឍ​សង្គម និងសេដ្ឋកិច្ចកម្ពុជា។

នេះជា​ប្រសាសន៍លើកឡើងរបស់ឯកឧត្តមបណ្ឌិត កន សម្បត្តិ អគ្គនាយករង នៃ​អគ្គនាយកដ្ឋាន​ពន្ធដារ​ នៅក្នុងសិក្ខាសាលា ស្តីពី «ពន្ធលើប្រាក់ចំណូល និងប្រព័ន្ធគ្រប់គ្រងការដាក់​លិខិត​ប្រកាស​ពន្ធ​​លើប្រាក់ចំណូលប្រចាំឆ្នាំតាមអនឡាញ (Tol e-Filing)»​ នៅខេត្តកំពត នា​ចុង​សប្តាហ៍​កន្លង​មកនេះ។

ឯកឧត្តមបណ្ឌិត លើកឡើងបន្តថា អគ្គនាយកដ្ឋានពន្ធដារ បានរៀបចំ និង​អនុវត្ត​ការ​ផ្តល់​សេវា​ជូន​អ្នក​ជាប់​ពន្ធ តាមរយៈ សកម្មភាពជាច្រើន និងគ្រប់មធ្យោបាយ ដោយអនុលោមតាមមាត្រា ១៩៣ នៃច្បាប់ស្តីពីសារពើន្ធ ដែលបានែងអំពីសិទ្ធិ និងកាតព្វ កិច្ចរបស់អ្នកជាប់ពន្ធ។ មាត្រា ១៩៣ នេះ, ចែងថា “អ្នកជាប់ពន្ធមានសិទ្ធិទទួលព័ត៌មានជាប្រចាំអំពីដំណើរការនៃប្រព័ន្ធពន្ធដារ និង នីតិវិធីនៃការកំណត់ពន្ធ ដូចមានចែងក្នុងច្បាប់ស្តីពីសារពើពន្ធ ត្រង់មាត្រា ១៩៩ អំពី​ការ​ផ្សព្វផ្សាយ និងការពន្យល់ណែនាំបទប្បញ្ញត្តិ ស្តីពីពន្ធដារ និងត្រង់មាត្រា ២១១​អំពី​នីតិ​វិធី​នៃ​ការ​កំណត់​ពន្ធ​ឡើង​វិញ”។

ឯកឧត្តមបណ្ឌិត កន សម្បត្តិ បានគូសរំលេចថា ការបង់ពន្ធគឺជាកាតព្វកិច្ច ហើយការយកពន្ធ គឺ​ជា​ការផ្ដល់នូវធនធានដ៏ចាំបាច់ដល់រាជរដ្ឋាភិបាលក្នុងការផ្តល់សេវាសាធារណៈ និងអភិវឌ្ឍ​ហេដ្ឋា​រចនា​សម្ព័ន្ធ​សំខាន់ៗ ដើម្បីគាំទ្រដល់ការអភិវឌ្ឍសង្គម និង សេដ្ឋកិច្ចកម្ពុជា។ ឯកឧត្តម​ក៏​បាន​លើក​ឡើង​ដែរថា ទំនាក់ទំនងរវាងអ្នកជាប់ពន្ធ និងរដ្ឋបាលសារពើពន្ធ គឺមិនត្រឹមតែជាការបំពេញ កាតព្វកិច្ចសារពើពន្ធ និងការផ្តល់សេវាពន្ធដារប៉ុណ្ណោះទេ ប៉ុន្តែជាដៃគូសហការល្អ ក្នុង​ការ​ចូល​រួម​ចំណែក​កសាង និងអភិវឌ្ឍប្រទេស ជាតិឱ្យកាន់តែរីកចម្រើនទៅមុខបន្ថែមទៀត។

ដើម្បីចូលរួមនិងគាំទ្រ ការអនុវត្តកម្មវិធីនយោបាយរបស់រាជរដ្ឋាភិបាល នីតិកាលទី៧ ឆ្នាំ​២០២៣​-​២០២៨ យុទ្ធសាស្ត្របញ្ច កោណដំណាក់កាលទី១ និងយុទ្ធសាស្ត្រ​កៀរគរ​ចំណូល​របស់​រាជ​រដ្ឋាភិបាល អគ្គនាយកដ្ឋានពន្ធដារ បាននិងកំពុងធ្វើទំនើបកម្មប្រព័ន្ធ គ្រប់គ្រង និង​ប្រតិបត្តិ​ជា​បន្ត​បន្ទាប់ និងព្យាយាមវិវត្តទៅជារដ្ឋបាលសារពើពន្ធទំនើប ស្របតាមឧត្តមានុវត្តន៍តំបន់ និង​អន្តរជាតិ និងបរិការណ៍សង្គម-សេដ្ឋកិច្ចឌីជីថល ដើម្បីកែលម្អសេវាអ្នកជាប់ពន្ធ និងលើក​កម្ពស់​វប្បធម៌​ការ​បង់ពន្ធ និងពង្រឹងអនុលោមភាពសារ ពើពន្ធ ព្រមទាំងចូល​រួម​ចំណែក​លើក​កម្ពស់​ការ​ប្រកួត​ប្រជែងដោយស្មើភាពជូនវិស័យឯកជន។ ជាក់ស្ដែង អគ្គនាយកដ្ឋានពន្ធដារ បាន រៀបចំ​ដាក់​ឱ្យ​អ្នក​ជាប់ពន្ធអនុវត្តនូវប្រព័ន្ធបច្ចេកវិទ្យាព័ត៌មានជាច្រើន ដើម្បីសម្រួលដល់ការបង់ពន្ធ និង​ពង្រឹងការគ្រប់គ្រងទិន្នន័យ ពន្ធ សំដៅធានានូវតម្លាភាព គណនេយ្យភាព សមធម៌នៃការង់ពន្ធ និង​ជំរុញអនុលោមភាពសារពើពន្ធួមមានដូចជា៖ e-Register, e-Filing, Tol e-Filing, e-Payment, e-Tax Service, GDT Taxpayer App, GDT Live Chat, Call Center 1277, GDTe-Administration និងប្រព័ន្ធកម្មវិធីបច្ចេកវិទ្យាព័ត៌មានគាំទ្រជាច្រើនទៀត៕ អត្ថបទ៖ សុន រ៉ាឌី