កងទ័ព៖ ថ្ងៃកំណើតរណសិរ្ស ២ធ្នូ ជាគំរូវីរភាព ដើម្បីការពារសន្តិភាព និងប្រជាជន

នាយទាហាន-ពលទាហាន នៃកងពលតូចលេខ៧០ បានលើកឡើងថា ទិវាកំណើត​រណសិរ្ស​សាមគ្គី អភិវឌ្ឍន៍មាតុភូមិកម្ពុជា ២ ធ្នូ ១៩៧៨ ជាគំរូវីរភាពក្នុងការពលីរបស់ថ្នាក់ដឹកនាំ និង​ឥស្សរជន​ជាច្រើន ដើម្បីបន្តការពារសន្តិភាពដែលមាននាពេលបច្ចុប្បន្នសម្រាប់ជាតិ និងប្រជាជន ។

នៅថ្ងៃទី២ ខែធ្នូ ឆ្នាំ២០២៤ ដែលជាខួបអនុស្សាវរីយ៍លើកទី៤៦ ទិវាកំណើតរណសិរ្សសាមគ្គី អភិវឌ្ឍន៍​មាតុភូមិកម្ពុជា (២ ធ្នូ ១៩៧៨ – ២ ធ្នូ ២០២៤) មាននាយទាហាន និងពល​ទាហាន​នៃ​កង​ពល តូចលេខ៧០ បានបង្ហាញពីមោទនភាព និងភាពអង់អាចរបស់ថ្នាក់ដឹកនាំ និងឥស្សរជន​ច្រើន​រូប ទើបមានការប្រមូលផ្តុំកម្លាំងដែលមានសម្តេចពញាចក្រី ហេង សំរិន, សម្តេចពោធិសាល ជា ស៊ីម, សម្តេចតេជោ ហ៊ុន សែន និងវីរជនស្នេហាជាតិជាច្រើនរូបទៀត ក្នុងការរៀបចំ​កម្លាំង​ផ្ដួល​រំលំ​របបប្រល័យពូជសាសន៍ ប៉ុល ពត និងទទួលបានជ័យជម្នះលើរបបនេះ នៅថ្ងៃទី៧ មករា ឆ្នាំ១៩៧៩ ។

នាយទាហាន និងពលទាហាន លើកឡើងថា ការលះបង់ និងពលីរបស់ថ្នាក់ដឹកនាំទាំងអស់ជាគំរូ របស់​កងទ័ព ក្នុងការតថែរក្ាសុខសន្តិភាព និងស្ថិរភាពប្រទេសកម្ពុជា ដើម្បីផ្តល់នូវ​សេចក្តី​សុខសាន្ត និងការអភិវឌ្ឍន៍ដែលមាននាបច្ចុប្បន្នជូនប្រជាពលរដ្ឋ។

ទិវាកំណើត​រណសិរ្សសាមគ្គី អភិវឌ្ឍន៍មាតុភូមិកម្ពុជា ២ ធ្នូ ១៩៧៨ ផ្តើមចេញពី ចលនាតស៊ូ និង ការធ្វើ​ពលីកម្មគ្រប់សព្វបែបយ៉ាងទើបធ្វើឱ្យប្រជាពលរដ្ឋបានរួចផុតពីទុក្ខវេទនា រួចពីការ កាប់​សម្លាប់ វិលមកមានសិទ្ធិសេរីភាពពេញលេញក្នុងការរស់នៅ ប្រកបរបរចេញចិញ្ចឹមជីវិត ហើយ​ជីវភាព ត្រូវបាន លើកកម្ពស់ជាលំដាប់ពីមួយទៅមួយឆ្នាំ ក្រោមដំបូលនៃសុខសន្តិភាព ដែល​រក​បាន​មក​ដោយ​លំបាក ។

«រណសិរ្សសាមគ្គីសង្គ្រោះជាតិកម្ពុជា» បច្ចុប្បន្នត្រូវបានដូរឈ្មោះជា «រណសិរ្សសាមគ្គី អភិវឌ្ឍន៍ មាតុ​ភូមិកម្ពុជា» ចាត់តាំងឡើងដោយផ្អែកលើស្មារតីឯករាជ្យជាតិដ៏បរិសុទ្ធរបស់ប្រជាជនកម្ពុជា ដោយ មានការសាមគ្គីគ្រប់ជនជាតិទូទាំងប្រទេស ប្រមែប្រមូលរាល់កម្លាំងសង្គម ដោយមិន​ប្រកាន់និន្នាការ នយោបាយជំនឿ សាសនា វណ្ណភាព កម្មករ កសិករ បញ្ញាវ័ន្ដ និងព្រះសង្ឃ៕ អត្ថបទ៖ សេក ឧត្តម