រដ្ឋមន្រ្តីការងារជំរុញឱ្យសហជីពរួមគ្នាជាធ្លុងមួយដើម្បីផ្តល់ការធានាដល់វិយោគិនទាំងជាតិនិងបរទេស

ភ្នំពេញ ៖ ឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ បានអំពាវនាវដល់សហជីពទាំងអស់នៅកម្ពុជា ត្រូវគោរពឆន្ទៈគ្នាទៅវិញទៅមក និងត្រូវបន្តកិច្ចខិតខំប្រឹងប្រែងសាមគ្គីគ្នាជាធ្លុងមួយ ដើម្បីផ្តល់ការធានាដល់វិយោគិនជាតិ និងវិនិយោគិនផ្ទាល់ពីក្រៅប្រទេស។

​ក្នុងពិធីបិទសមាជវិសាមញ្ញក្រុមប្រឹក្សាសហជីពជាតិកម្ពុជា (CCNU) នាព្រឹកថ្ងៃទី២ ខែធ្នូ ឆ្នាំ២០២៤នេះ ឯកឧត្តមរដ្ឋមន្រ្តី បានក្រើនរំលឹកឱ្យសហជីពទាំងអស់ កុំយករោងចក្រ សហគ្រាស ធ្វើជាទីលាននៃការប្រកួតប្រជែងដណ្តើមសមាជិកគ្នា ដែលនាំឱ្យប៉ះពាល់ដល់ដំណើរការផលិតកម្មរបស់វិនិយោគិន និងជាពិសេសប៉ះពាល់ដល់ការងារ និងប្រាក់ចំណូលរបស់កម្មករនិយោជិតផ្ទាល់។ ទន្ទឹមនេះ

ឯកឧត្តមរដ្ឋមន្រ្តី ហេង សួរ បានបញ្ជាក់ជូនអង្គពិធីទៀតថា ការបង្រួបបង្រួមអង្គការវិជ្ជាជីវៈ ដែលលើកឡើងនាពេលនេះ មិនមែនជាការដាក់កំត ឬបបិទសិទ្ធិសេរីភាពសហជីពណាមួយនោះទេ។ ផ្ទុយទៅវិញ គឺជាការជំរុញឱ្យសហជីពទាំងអស់ ខិតខំធ្វើឯកភាពកម្មរវាងគ្នា ដើម្បីពង្រឹងបាននូវសាមគ្គីភាព កិច្ចសហប្រតិបត្តិការល្អ ព្រមទាំងបង្កើននូវសមត្ថភាព និងប្រសិទ្ធភាពរបស់សហជីព ដែលជាអ្នកតំណាងសំឡេងនៃកម្មករនិយោជិត និងរួមចំណែកកាន់តែសំខាន់បន្ថែមទៀត ជំរុញការធ្វើឱ្យប្រសើរឡើងនៃទំនាក់ទំនងវិជ្ជាជីវៈនៅកម្ពុជា។

លោក មុំ សៀក ប្រធានក្រុមប្រឹក្សាសហជីពជាតិកម្ពុជា អាណត្តិទី៩ បានប្ដេជ្ញាខិតខំប្រឹងប្រែងដឹកនាំការងារសហជីពនេះឱ្យកាន់តែរីកចម្រើន និងមានការឯកភាពផ្ទៃក្នុងឱ្យក្លាយជាធ្លុងមួយ ដើម្បីពង្រឹងគុណភាព និងសំឡេងកាន់តែក្លាបន្ថែមទៀត។លោកបានបន្តថា ក្រុមប្រឹក្សាសហជីពជាតិកម្ពុជា បានរៀបចំផែនការ និងទិសដៅយន្ដការដោះស្រាយច្បាស់លាស់ ដើម្បីធានាការពារផលប្រយោជន៍ និងដោះស្រាយបញ្ហាជូនកម្មករកម្មការនីឱ្យបានទាន់ពេលវេលាផងដែរ។

គិតមកដល់ពេលនេះ ក្រុមប្រឹក្សាសហជីពជាតិកម្ពុជា (CCNU) មានសហព័ន្ធសហជីព ចំនួន៨៦ និងសហជីពមូលដ្ឋាន សរុបចំនួនជាង ៨០០៕

អត្ថបទ ឈិត បូរ៉ាវី