អង្គភាពប្រឆាំងអំពើពុករលួយរៀបចំការប្រគំតន្រ្តីអបអរសាទរទិវាជាតិ-អន្តរជាតិប្រយុទ្ធប្រឆាំង​អំពើពុករលួយ

អង្គភាពប្រឆាំងអំពើពុករលួយ នៅរសៀលថ្ងៃទី០៣ខែធ្នូនេះ សហការ​ជាមួយក្រុមហ៊ុនថោនគ្រុប បាន​រៀបចំ «ការប្រគំតន្រ្តីអបអរសាទរទិវាជាតិ-អន្តរជាតិប្រយុទ្ធប្រឆាំងអំពើពុករលួយ ០៩ធ្នូ» ក្រោម​ប្រធានបទ «សេវាសាធារណៈល្អ រាស្រ្ដស្រលាញ់គាំទ្រ» ស្ថិតនៅស្ថានីយទូរទស្សន៍ថោន រាជ​ធានីភ្នំពេញ។ ពិធីនេះប្រព្រឹត្តិទៅក្រោមអធិបតីភាពឯកឧត្តម តុប សំ ប្រធាន​ក្រុម​ប្រឹក្សា​ជាតិ​ប្រឆាំង​អំពើ​ពុករលួយ និងកិត្តិនីតិកោសលបណ្ឌិត ឱម យ៉ិនទៀង ទេសរដ្ឋមន្រ្តី ប្រធានអង្គភាព​ប្រឆាំង​អំពើ​ពុករលួយ។

នៅក្នុងអង្គពិធី កិត្តិនីតិកោសលបណ្ឌិត ឱម យ៉ិនទៀង បានអានសារលិខិត​អបអរ​សាទរ​របស់​សម្តេច​ធិបតី ហ៊ុន ម៉ាណែត នាយករដ្ឋមន្រ្តីកម្ពុជា យ៉ាងដូច្នេះថា នៅដើមអាណត្តិទី៧ នេះ រាជ​រដ្ឋាភិបាល​កម្ពុជា សម្រេចបាននូវលទ្ធផលធំៗ ដូចជា ការរក្សាបាននូវកំណើនសេដ្ឋកិច្ច ការជំរុញ និង​កៀរគរធុរជន និងការវិនិយោគ ការើកម្ព់សុខុមាលភាពរបស់ប្រជាពលរដ្ឋ និង​មន្ត្រី​រាជការព្រមទាំងការធ្វើ កំណែទម្រង់គ្រប់វិស័យរួមមាន៖ការគ្រប់គ្រងហិរញ្ញវត្ថុសាធារណៈ យុត្តិធម៌ និងតុលាការ និងការគ្រប់គ្រងរដ្ឋបាលសាធារណៈ ដែលផ្តោត​សំខាន់​លើ​ការ​ចាក់​គ្រឹះ​ឱ្យ​កាន់​តែ​រឹង​មាំ​នៃគុណភាព ប្រសិទ្ធភាព ទំនើបកម្ម និងការអភិវឌ្ឍដោយចីរភាពយូរអង្វែង។ បន្ថែមពីនេះ រាជរដ្ឋាភិបាលក៏បានពង្រឹងការអនុវត្ត និងពង្រីកក្របខ័ណ្ឌច្បាប់ រួមមានការ​ពង្រឹង​ការ​ប្រយុទ្ធ​ប្រឆាំងអំពើពុករលួយ ដោយឆន្ទៈមុតស្រួច និងការប្តេជ្ញាខ្ពស់​តាមរយៈវិ​ធាន​ការ​ស្នូល​ទាំង៣ គឺការអប់រំ បង្ការទប់ស្កាត់ និងការអនុវត្តច្បាប់ប្រឆាំងអំពើ ពុករលួយ ការ​លើក​កម្ពស់​អភិបាល​កិច្ច​ល្អ និងការត្រួតពិនិត្យផ្ទៃក្នុង ព្រមទាំងការចូលរួមជាមួយសហគមន៍អន្តរជាតិ បំពេញ​កាតព្វ​កិច្ច​ដែលកម្ពុជាមានប្រកបដោយការទទួលខុសត្រូវ និងមោទនៈ។ ក្រៅពីនេះ ក្នុងសារ​លិខិត​អបអរសាទររបស់សម្តេចធិបតី បានអំពាវនាវដល់អង្គភាពប្រឆាំងអំពើពុករលួយ និង​ស្ថាន​ប័ន​ពាក់​ព័ន្ធបន្តចូលរួមប្រយុទ្ឋប្រឆាំងអំពើពុករលួយនៅក្នុងប្រទេសកម្ពុជា។

តារាចម្រៀង និងប្រជាពលរដ្ឋ បានបង្ហាញរម្មណ៍រីករាយ ដែលបានចូលរួមអបអរសាទរទិវាជាតិ-អន្តរជាតិ​ប្រយុទ្ធប្រឆាំងអំពើពុករលួយ ០៩ធ្នូ» និងប្តេជ្ញាថា ចូលរួមផ្សព្វផ្សាយ និងប្រឆាំងអំពើរ​ពុក​រលួយ​មិន​ឱ្យកើតមាននៅក្នុងសង្គមជាតិ។

គួរបញ្ជាក់ដែរថា ដើម្បីចូលរួមប្រឆាំងអំពើពុករលួយប្រជាពលរដ្ឋ ត្រូវចូលរួមដូចជា កុំចូល​រួម​ក្នុង​សកម្មភាពអំពើពុករលួយ,ជួយគាំទ្រដល់សកម្មភាពទាំងឡាយណាដែលប្រឆាំងអំពើពុករលួយ,ណែនាំ​ដល់សមាជិកគ្រួសារពីផលវិបាកនិងកុំឱ្យប្រព្រឹត្តអំពើពុករលួយ និងចូលរួមឃ្លាំមើល និង​រាយការណ៍អំពីអំពើពុករលួយទៅអង្គភាពពាក់ព័ន្ធនានា៕ អត្ថបទ៖ទូច សោភ័ណ