ឯកឧត្តម ឌិត ទីណា ណែនាំប្រធានមន្ទីរកសិកម្មខេត្តកំពង់ស្ពឺថ្មី ត្រូវខិតខំផ្ដល់ចំណេះដឹងដល់កសិករ ដើម្បីបង្កបង្កើនផលកាន់តែល្អ

កំពង់ស្ពឺ៖ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានជំរុញលោក យឹម ណន ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ស្ពឺថ្មី ជំនួសអ្នកចាស់ត្រូវចូលនិវត្តន៍ ត្រូវខិតខំដោះស្រាយសំណូមពរ និងផ្ដល់ចំណេះដឹងផ្នែកកសិកម្ម ដល់ប្រជាពលរដ្ឋ ដើម្បីឲ្យពួកគាត់បង្កបង្កើនផល កាន់តែទទួលបានទិន្នផលល្អ ។

ក្នុងពិធីប្រកាសតែងតាំងប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ស្ពឺថ្មី នៅថ្ងៃទី៣ ខែធ្នូ ឆ្នាំ២០២៤ ឯកឧត្តម ឌិត ឌីណា មានប្រសាសន៍ថា ប្រធានមន្ទីរថ្មី ត្រូវខិតខំបំពេញតួនាទីឱ្យបានល្អប្រសើរ ដើម្បីឆ្លើយតបនឹងជំនឿទុកចិត្តរបស់រាជរដ្ឋាភិបាល និងប្រជាកសិករនៅថ្នាក់មូលដ្ឋាន តាមរយៈការបំពេញការងារឱ្យបានល្អប្រសើរ ដោយអនុវត្តន៍ទៅតាមគោលនយោបាយដែលបានដាក់ចេញ ហើយដើម្បីអនុវត្តការងារ ឲ្យសម្រេចទៅតាមគោលការណ៍បាន គឺទាមទារផងដែរ ទាំងថ្នាក់ជាតិ និងថ្នាក់ក្រោមជាតិ បានបន្ស៊ីការងារគ្នា និងដាក់ទិសដៅតែមួយ ហើយជំរុញដល់មន្ត្រីក្រោមឱវាទបន្តអនុវត្តន៍ ។

ឯកឧត្តមរដ្ឋមន្ត្រី បានគូសបញ្ជាក់ថា ប្រធានមន្ទីរថ្មី ត្រូវមានស្មារតីយកចិត្តទុកក្នុងការងារ មានទំនួលខុសត្រូវខ្ពស់ បង្ហាញចំណេះជំនាញទាក់ទងនឹងវិស័យកសិកម្ម និងឆ្លើយតបទៅតាមតម្រូវការរបស់ប្រជាជន គឺធ្វើការតាមខ្សែបណ្តោយ ផ្តល់ផលប្រយោជន៍ដល់អង្គភាពនិងផ្តល់ផលចំណេញជាឧត្តមប្រយោជន៍ ដល់ប្រជាកសិករ ពិសេសត្រូវមានសាមគ្គីភាព និងប្រសិទ្ធភាពការងារធានាឱ្យបាននូវសន្តិសុខស្បៀង និរន្តរភាពសេដ្ឋកិច្ច និងបរិស្ថាន ។

ឯកឧត្តម ឌិត ទីណា បានបន្ថែមថា ត្រូវធ្វើយ៉ាងណាឱ្យប្រជាពលរដ្ឋមានហូប មានប្រើ មានបាន និងមានរហូត ហើយក៏ត្រូវយកចិត្តទុកដាក់ និងកំណត់អាទិភាពឱ្យចំគោលដៅ ដើម្បីអនុវត្តការងារឲ្យមានប្រសិទ្ធភាព និងប្រសិទ្ធផលខ្ពស់ គឺត្រូវមានសហការឱ្យបានល្អជាមួយមន្ត្រី ក៏ដូចជាអាជ្ញាធរដែនដី លើវិស័យកសិកម្មនេះ ហើយការងារទាំងអស់នេះ មន្ទីរកសិកម្មគ្រប់រាជធានីខេត្ត ក៏ត្រូវខិតខំអនុវត្តន៍ឲ្យបានគ្រប់ៗគ្នា ៕ អត្ថបទ បាន សុខរិទ្ធិ