ឯកឧត្តម គីម រិទ្ធី ជួបសំណេះសំណាលជាមួយកងរាជអាវុធហត្ថថ្មី មុខចូលហ្វឹកហ្វឺន នៅមជ្ឈមណ្ឌលហ្វឹកហ្វឺនកងរាជអាវុធហត្ថ ភ្នំជុំសែនរីករាយ

ព្រះវិហារ៖ នៅព្រឹកថ្ងៃទី៤ ខែធ្នូ ឆ្នាំ២០២៤ នៅទីបញ្ជាការដ្ឋានកងអនុសេនាធំកងរាជអាវុធ​ហត្ថ​ចល័ត​ ស្ថិតក្នុងភូមិមហាផល ​ឃុំឈានមុខ ស្រុកត្បែងមានជ័យ ​ខេត្តព្រះវិហារ មានរៀបចំពិធីសំណេះសំណាល និងជូនដំណើរយោធិន នៃកងរាជអាវុធហត្ថ ទើបជ្រើសរើសថ្មី(ជាប់ជាស្ថាពរ) ចូលហ្វឹកហ្វឺន នៅមជ្ឈមណ្ឌលហ្វឹកហ្វឺនកងរាជអាវុធហត្ថ (ភ្នំជុំសែនរីករាយ) ខេត្តកំពង់ឆ្នាំង ក្រោមអធិបតីភាព ឯកឧត្តម គីម រិទ្ធី អភិបាលខេត្តព្រះវិហារ។​ពិធីនេះ ក៏មានការអញ្ជើញចូលចូលពីសំណាក់ មេបញ្ជាការ មេបញ្ជាការរង ប្រធានមន្ទីរអង្គភាព​ពាក់ព័ន្ធ នាយទាហាន នាយទាហានរង នៃកងរាជអាវុធហត្ថខេត្ត ប្អូនៗយោធិន នៃកងរាជអាវុធហត្ថ​ទើបជ្រើសរើសថ្មី មាតាបិតា និងអាណាព្យាបាល ជាច្រើនរូបទៀត។

ឯកឧត្តម គីម រិទ្ធី អភិបាលខេត្ត បានសម្ដែងនូវសេចក្តីសោមនស្សរីករាយយ៉ាងក្រៃលែង ដែលបាន​ជួប​សំណេះសំណាល ​និងជូនដំណើរប្អូនៗយោធិន ​នៃកងរាជអាវុធហត្ថ ទើបជ្រើសរើសថ្មី ដើម្បីទៅ​ចូលរួមហ្វឹកហ្វឺន នៅមជ្ឈមណ្ឌលហ្វឹកហ្វឺនកងរាជអាវុធហត្ថ (ភ្នំជុំសែនរីករាយ) ​ដែលមានរយៈ ១២ខែ ​និងសូមអបអរសាទរចំពោះប្អូនៗ ​យុវជនស្ម័គ្រចិត្តចូលបម្រើកងយោធពលខេមរភូមិន្ទ ក្នុង​ក្របខ័ណ្ឌកងរាជអាវុធហត្ថ ខេត្តព្រះវិហារ ដែលទើបនឹងជាប់ថ្មីទាំង ២៥នាក់ និងសូមជូនពរដល់​ប្អូនៗ សូមសម្រេចបានលទ្ធផលជោគជ័យក្នុងការហ្វឹកហ្វឺន។

ជាមួយគ្នានេះក្នុងនាមជាថ្នាក់ដឹកនាំ នៃរដ្ឋបាលខេត្ត សូមថ្លែងអំណគុណ និងកោតសរសើរ​ចំពោះ​ទឹក​ចិត្តរបស់ក្រុមគ្រួសារ មាតាបិតា អាណាព្យាបាលរបស់ប្អូនៗ ដែលបានអនុញ្ញាត ​លើកទឹកចិត្ត និងគាំទ្រឱ្យកូនចៅ ចូលបម្រើកងយោធពលខេមរភូមិន្ទ បំពេញក្របខណ្ឌឱ្យកងរាជអាវុធហត្ថខេត្ត ដើម្បីចូលរួមបម្រើប្រទេសជាតិមាតុភូមិ និងប្រជាជននៃយើងទាំងអស់គ្នា។

ឯកឧត្តម បន្តថា បើទោះបីជាប្រទេសកម្ពុជាយើងបច្ចុប្បន្ននេះ ​មានសុខសន្តិភាពពេញបរិបូរ ស្ថិរភាព​នយោបាយ និងការអភិវឌ្ឍរីកចម្រើនលើគ្រប់វិស័យក៏ដោយ​ ក៏ប៉ុន្តែការកំណែទម្រង់ និងធ្វើ​ទំនើបកម្ម​កងកម្លាំងប្រដាប់អាវុធ ការ ហ្វឹកហ្វឺនរៀនសូត្រ ​ការកសាងហេដ្ឋារចនាសម្ព័ន្ធយោធា ការ​ថែរក្សាសុខុមាលភាពកង កម្លាំង ​ការបណ្តុះមនសិការស្នេហាជាតិ និងវិជ្ជាជីវៈកងកម្លាំងផ្សារភ្ជាប់​ទៅ​នឹងសីលធម៌ គុណធម៌ និងវិន័យ គឺជាការងារជាអាទិភាព ដើម្បីបន្តថែរក្សានូវសុខសន្តិភាព អធិបតេយ្យ ភាពជាតិ បូរណភាពទឹកដី និងសន្តិសុខសុវត្ថិភាពសណ្តាប់ធ្នាប់សាធារណៈ ឱ្យបានគង់ វង្សស្ថិតស្ថេរយូរអង្វែង។

ទន្ទឹមនេះ ដើម្បីធានាថា កងកម្លាំងរបស់យើងមានសមត្ថភាពពេញលេញ មានឆន្ទៈមោះមុត មនសិការ​ការពារបានរឹងមាំនូវឯករាជ្យជាតិ អធិបតេយ្យ បូរណភាពទឹកដី សន្តិសុខសណ្តាប់ធ្នាប់​សង្គមនៅគ្រប់កាលៈទេសៈ ​សូមប្អូនៗយោធិន នៃកងរាជអាវុធហត្ថថ្មីទាំងអស់ យកចិត្តទុកដាក់​ខិតខំរៀនសូត្រ និងបំពេញតួនាទីភារកិច្ច និងបេសកកម្មកងរាជអាវុធហត្ថឱ្យទទួលបានជោគជ័យ ហើយត្រូវគោរពច្បាប់លក្ខន្តិកៈ នៃកងយោធពលខេមរភូមិន្ទ, បទវិន័យទូទៅសម្រាប់​កងយោធពល​ខេមរភូមិន្ទ បទបញ្ជានៅក្នុងវគ្គហ្វឹកហ្វឺន ថែទាំសុខភាព និងជឿជាក់លើរាជរដ្ឋាភិបាល រក្សាស្មារតី​ស្នេហាជាតិ និងប្រជាជន៕