ក្រសួងសាធារណការ រដ្ឋបាលរាជធានី និង JICA បន្តបើកកិច្ចប្រជុំលើការគ្រប់គ្រងប្រព័ន្ធ​ទឹកកខ្វក់ ជំហានទី២

ក្រសួងសាធារណការ និងដឹកជញ្ជូន រដ្ឋបាលរាជធានីភ្នំពេញ និង JICA បន្តបើក​កិច្ច​ប្រជុំ​លើ​ការ​គ្រប់​គ្រងប្រព័ន្ធទឹកកខ្វក់ ជំហានទី២ ខណៈដែលការគ្រប់គ្រងប្រព័ន្ធទឹកកខ្វក់ ក្នុងជំហានទី១ រដ្ឋបាល​រាជធានីភ្នំពេញ និងក្រសួងសាធារណការ បានអនុវត្ត​បញ្ចប់​ទៅ​ដោយ​ជោគ​ជ័យ​កាល​ពី​ឆ្នាំ​២០២៣ ហើយពេលនេះ បានបន្តបើកកិច្ចប្រជុំលើការគ្រប់គ្រងប្រព័ន្ធទឹកកខ្វក់ ជំហានទី២ បន្ត​ទៀត។

កិច្ចប្រជុំគណៈកម្មការសម្របសម្រួលរួមលើកទី១ នៃគម្រោង​អភិវឌ្ឍន៍​សមត្ថភាព​រដ្ឋបាល​រាជ​ធានី​ភ្នំពេញ និងក្រសួងសាធារណការ និងដឹកជញ្ជូន លើការគ្រប់គ្រងប្រព័ន្ធទឹកកខ្វក់ ជំហានទី២ បាន​ធ្វើ​ឡើងនាព្រឹកថ្ងៃទី០៤ ខែវិច្ឆិកា ឆ្នាំ២០២៤ នៅសណ្ឋាគារកាំបូឌីយ៉ាណា ក្រោម​អធីបតី​ភាព​ឯកឧត្ដម រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន លោក ឯក ឃុនដឿន អភិបាលរងរាជធានីភ្នំពេញ លោក គូរីបាយ៉ាស៊ី តាកាណូរី លេខាទូតទី១ នៃស្ថន​តន​ប្រចាំព្រះរាជាណាចក្រកម្ពុជា លោក ចៅ សុភៈភិបាល អគ្គនាយក នៃអគ្គ​នាយក​ដ្ឋាន​ប្រព័ន្ធ​ចម្លោះទឹកកខ្វក់ នៃក្រសួងសាធារណការ និងដឹកជញ្ជូន និងលោកស្រី មីអូរ៉ា យូស្ស៊ីកូ តំណាង​ទីភ្នាក់ងារសហប្រតិបត្តិការអន្តរជាតិជប៉ុន JICA ប្រចាំកម្ពុជា។

លោក ឯក ឃុនដឿន អភិបាលរងរាជធានីភ្នំពេញមានប្រសាសន៍ថា រាជរដ្ឋាភិបាលកម្ពុជា និង​រដ្ឋាភិបាលជប៉ុន បានបន្តពង្រឹង និងពង្រីកកិច្ច​សហ​ប្រតិបត្តិការ​ឈានដ​ល់​កម្រិត​ជា​ដៃ​​គូ​យុទ្ធ​សាស្ត្រគ្រ​ប់ជ្រុងជ្រោយ ដែលអនុញ្ញាតឱ្យប្រទេសទាំងពីរពង្រឹងកិច្ចសហការលើគ្រប់វិស័យដូចជា កិច្ច​សហប្រតិបត្តិការរវាងប្រជាជន និងប្រជាជន វិស័យសេដ្ឋកិច្ច វិស័យហេដ្ឋារចនាសម្ព័ន្ធ វិស័យ​សុខាភិបាល វិស័យសន្តិសុខ សុវត្ថិភាពសង្គម ដូចជាការការពារទឹកជំនន់ និង​កែ​លម្អ​ប្រព័ន្ធ​ប្រឡា​យ​លូ ចាប់ពីជំហានទី១ រហូតដល់ ជំហានទី៤ ដែលជាជំនួយឥតសំណង ព្រម​ទាំង​បាន​ផ្តល់​ការ​សិក្សា​​​លទ្ធភាពជំហានទី៥ ដែលទើប​នឹង​បញ្ចប់​សេចក្តី​ព្រាង​របាយកា​រណ៍ចុ​ងក្រោ​យ​នា​ពេល​ថ្មី​ៗ​នេះ​។

លោក ឯក ឃុនដឿន បន្តថា រាជរដ្ឋាភិបាលកម្ពុជា និងរដ្ឋាភិបាលជប៉ុន តាម​រយៈ​ទីភ្នាក់​ងារ​សហ​ប្រតិបត្តិការអន្តរជាតិជប៉ុន ហៅកាត់ថា JICA បានអនុវត្ត គម្រោងអភិវឌ្ឍន៍សមត្ថភាព រដ្ឋបាល​រាជ​ធានី​ភ្នំពេញ និងក្រសួងសាធារណការ និងដឹកជញ្ជូន លើការគ្រប់គ្រងប្រព័ន្ធទឹកកខ្វក់ ជំហាន​ទី២ គឺជាគម្រោងកិច្ចសហប្រតិបត្តិការបច្ចេកទេស ដើម្បីគាំទ្រប្រតិបត្តិការបច្ចេកទេស ជំរុញ​ដល់​ការ​រៀបចំ និងការប្រព្រឹត្តទៅនៃការគ្រប់គ្រងប្រព័ន្ធលូទឹកកខ្វក់ប្រកបដោយប្រសិទ្ធភាពខ្ពស់។ គម្រោងអភិវឌ្ឍន៍សមត្ថភាពរដ្ឋបាលរាជធានីភ្នំពេញ និងក្រសួងសាធារណការ និងដឹកជញ្ជូន លើ​ការគ្រប់គ្រងប្រព័ន្ធទឹកកខ្វក់នេះ គឺបានអនុវត្តប្រកបដោយជោគជ័យជាផ្លែផ្កាកាលពីជំហានទី១ ដែល​បាន​អនុវត្តកាលពីឆ្នាំ២០១៩ ដល់ឆ្នាំ២០២៣។ ក្រោមជំនួយឥតសំណង “គម្រោង​អភិវឌ្ឍន៍​ប្រព័ន្ធ​លូក្នុងរាជធានីភ្នំពេញ” គាំទ្រដោយ JICA បានជួយកសាង​ស្ថានីយ​ប្រព្រឹត្ត​កម្ម​ទឹក​កខ្វក់​ជើង​ឯក ដែលបានសម្ពោធដាក់ឱ្យប្រើប្រាស់កាលពីចុងឆ្នាំ២០២៣កន្លងទៅ ដែលមាន​សមត្ថ​ភាព​សម្អាតទឹកកខ្វក់ ៥០០០ម៉ែត្រគូបក្នុងមួយថ្ងៃ និងចំណាទឹក្រាក់ប្រមាណ ២៥​លាន​ដុល្លារ​សហរដ្ឋអាមេរិក។

លោក ឯក ឃុនដឿន បានបញ្ជាក់ថា គោលបំណងសំខាន់ៗនៃគម្រោងនេះ គឺដើម្បីបង្កើត​គណៈ​កម្មការ​សម្របសម្រួលរួម និងគណៈកម្មការបច្ចេកទេស បញ្ជាក់ និងអនុម័ត​លើកា​រ​រច​នា​គម្រោង​លម្អិត និងដើម្បីអនុម័តលើផែនការអនុវត្តការងាររយៈពេលមួយឆ្នាំ ហើយកិច្ចប្រជុំ​នេះ​ធ្វើ​ឡើង​ដើម្បី​ឱ្យ​ក្រុមការងារគម្រោងចូលរួមជាមតិយោបល់ បានជាធាតុចូល និងចំណេះដឹង ដល់​រដ្ឋបាល​រាជ​ធានី​ភ្នំពេញ និងក្រសួងសាធារណការ និងដឹកជញ្ជូន ក្នុងការ​អនុវត្ត​គម្រោង​ឱ្យ​បាន​កា​ន់​តែ​ប្រសើរ និងទទួលបានផ្លែផ្កា។

ឯកឧត្ដម រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន មានប្រសាសន៍ថា កិច្ច​ប្រជុំ​នេះ គឺដើម្បីបណ្តុះបណ្តាលធនធានមនុស្សក្នុងការគ្រប់គ្រងអនាម័យ ពិសេសការ​គ្រប់​គ្រង​ប្រព័ន្ធ​ទឹក​កខ្វក់ ដើរឱ្យទាន់កាលៈទេសៈបច្ចុប្បន្ន។ ដូចដឹងហើយថា ក្រោយបញ្ចប់សង្រ្គាម ប្រទេស​កម្ពុជាបានអភិវឌ្ឍន៍យ៉ាងឆាប់រហ័សនៅផ្នែកលើដី ហើយការអភិវឌ្ឍនៅក្រោមដី ដូច​ជា​ប្រព័ន្ធ​លូ ស្ថានីយប្រព្រឹត្តកម្មទឹកកខ្វក់ បាននឹងកំពុងអភិវឌ្ឍន៍ ប៉ុន្តែអ្វីដែលជាបញ្ហា គឺ​ធនធាន​មនុស្ស​ក្នុងការគ្រប់គ្រងនៅមានកម្រិត ដែលទៀមទារឱ្យមានការបណ្តុះបណ្តាល ពិសេស​គឺ​ការ​ពង្រឹង​សមត្ថភាពលើការគ្រប់គ្រងប្រព័ន្ធអនាម័យឱ្យត្រូវតាមលក្ខណបច្ចេកទេស៕ អត្ថបទ ៖ ប្រាក់ វ៉ាន់ដា