អគ្គនាយករដ្ឋាករទឹកបាត់ដំបងចុះដោះស្រាយបញ្ហាពលរដ្ឋជាង៧០គ្រួសារគ្មានទឹកស្អាតប្រើប្រាស់ដោយសារម្ចាស់បុរីគ្មានលទ្ធភាពភ្ជាប់បណ្តាញទឹកស្អាតតាមកិច្ចសន្យា

ឯកឧត្តម អ៊ុត ក្លឹង អគ្គនាយករដ្ឋាករទឹកបាត់ដំបង និងអាជ្ញាធរមូលដ្ឋាននៅថ្ងៃទី៣ ខែធ្នូ ឆ្នាំ​២០២៤ បានចុះជួបជាមួយប្រជាពលរដ្ឋជាង ៧០គ្រួសាររស់នៅក្នុងបុរីដឹស្តារវីឡា ស្ថិត​នៅ​ភូមិ​តំណាក់​ហ្លួង សង្កាត់វត្តគរ ក្រុងបាត់ដំបងដែលមានបញ្ហាប្រឈម មិនទទួលបាន​ទឹកស្អាត​ប្រើ​ប្រាស់ ដោយសារក្រុមហ៊ុនគ្មានលទ្ធភាពដោះស្រាយភ្ជាប់បណ្តាញទឹកស្អាតតាមកិច្ចសន្យា ក៏​ព្រោះតែ​ក្រុមហ៊ុនមានវិបត្តិថវិកាគម្រោងធ្ងន់ធ្ងរ។

ឯកឧត្តម អ៊ុត ក្លឹង អគ្គនាយករដ្ឋាករទឹកបាត់ដំបង ថ្លែងឱ្យដឹងថា ដើម្បីឆ្លើយតប​នូវ​សំណូមពរ​ដ៏​ទទូច​របស់​ប្រជាពលរដ្ឋរស់នៅក្នុងបុរី ក៏ដូចជាសំណូមពររបស់អាជ្ញាធរសង្កាត់ផងនោះ រដ្ឋាករ​ទឹក​បាត់​ដំបង​បាន​សម្រេច​ធ្វើ​ការ​តភ្ជាប់​បណ្តាញ​ទឹក​ស្អាត​ជូន​ប្រជាពលរដ្ឋ​ដែល​បាន​ចូល​ទៅ​រស់​នៅ​ជាក់​ស្តែង ដើម្បីរួមចំណែកលើកកម្ពស់សុខុមាលភាពសាធារណៈ និងជីវភាពរស់​នៅ​របស់​ប្រជាជន​ឱ្យ​បានល្រសើរ

តាមការបញ្ជាក់ពីប្រជាពលរដ្ឋនៅទីនោះ បានឱ្យដឹងថា កន្លងពួកគាត់ប្រើប្រាស់ទឹក ដោយការ​ទិញ​​ទឹកតាមឡាន មានតម្លៃថ្លៃ ការដឹកជញ្ជូនមិនទាន់ពេល ទឹកមានប្រភពមកពីទឹកស្រះ អណ្តូង ត្រពាំង ដែលមិនបានស្អាតល្អ ខ្វះអនាម័យ ធ្វើឱ្យប៉ះពាល់ដល់សុខភាពយ៉ាងខ្លាំង ។

កា​រ​សម្រេច​ចិត្តរបស់អគ្គនាយករដ្ឋាករ​ទឹកបាត់ដំបង​ក្នុង​ការ​ភ្ជាប់​បណ្តាញ​ទឹកស្អាត​ចូល​ក្នុង​ទីតាំង​បុរី​ដែល​គ្មានទឹកស្អាតមួយនេះ ត្រូវបានប្រជាពលរដ្ឋក្នុងបុរីទាំងមូលសប្បាយចិត្ត និងអបអរ​សាទរ​យ៉ាង​ខ្លាំ​ងក្លា ពិសេសក្នុង​ពេល​រដូវ​ប្រាំង​អាកាស​ធាតុ​ក្តៅ​ហួត​ហែង​ពិតជាត​ម្រូវ​ការ​ទឹក​យ៉ាង​ចាំបាច់ និងអាទិភាពបំផុត ។

ប្រជាពលរដ្ឋ ថ្លែងអំណរគុណដល់ឯកឧត្តម អ៊ុត ក្លឹង អគ្គនាយករដ្ឋាករ​ទឹកបាត់​ដំប​ង​ដែ​ល​បាន​យក​ចិត្ត​ទុកដាក់​ដោះ​ស្រាយ​បញ្ហា​គ្មាន​ទឹក​ស្អាត​ប្រើប្រាស់​ដោយ​សង្ឃឹម​ថា​នឹង​ទទួល​បាន​ទឹក​ស្អាត​ប្រើ​ប្រាស់​ក្នុងពេលឆាប់ៗខាងមុខនេះ។

សូមបញ្ជាក់ថា ក្រៅពីបញ្ហាគ្មានទឹកស្អាតប្រើប្រាស់ ប្រជាពលរដ្ឋដែលរស់នៅក្នុងបុរីដឹស្តារវីឡា ស្ថិត​នៅ​ភូមិតំណាក់ហ្លួង សង្កាត់វត្តគរ ក្រុងបាត់ដំបង ក៏បាននិង​កំពុង​ជួប​បញ្ហា​ប្រឈម​ខ្វះ​អគ្គិសនី ផ្លូវមិនរៀបរយ ហើយគម្រោងខ្លះមានភាពមិនច្បាស់លាស់ជាដើម៕