ក្រុមហាម៉ាស គំរាម “សម្លាប់” ចំណាប់ខ្មាំង បើអ៊ីស្រាអែល បើកប្រតិបត្តិការជួយសង្គ្រោះ

ក្រុមហាម៉ាស បាននិយាយថា ខ្លួនទទួលបានព័ត៌មានថា អ៊ីស្រាអែលមានបំណងធ្វើប្រតិបត្តិរំដោះចំណាប់ខ្មាំង ដែលស្រដៀងនឹងប្រតិបត្តិការដែលបានធ្វើឡើងនៅក្នុងជំរំ នូសៃរ៉ាត់ (Nuseirat) នៃតំបន់ហ្កាហ្សា កាលពីខែមិថុនា ហើយបានគំរាមថានឹង “សម្លាប់” អ្នកជាប់ឃុំខ្លួនទាំងនោះ ប្រសិនបើសកម្មភាពបែបនេះបានកើតឡើង នេះបើយោងតាមសេចក្តីថ្លែងការណ៍ផ្ទៃក្នុងមួយមើលឃើញដោយសារព័ត៌មានរ៉យទ័រ កាលពីថ្ងៃពុធ (០៤ ធ្នូ)។

នៅក្នុងសេចក្តីថ្លែងការណ៍ចុះថ្ងៃទី២២ ខែវិច្ឆិកា នោះ ក្រុមហាម៉ាស បានប្រាប់ប្រតិបត្តិកររបស់ខ្លួនថាមិនបាច់ខ្វល់ពីផលប៉ះពាល់នៃការធ្វើតាមការណែនាំនោះទេ ហើយថា ខ្លួនបានចាត់ទុកអ៊ីស្រាអែល ជាអ្នកទទួលខុសត្រូវចំពោះជោគវាសនារបស់ចំណាប់ខ្មាំង។

សេចក្តីថ្លែងការណ៍ ដែលប្រភពជាន់ខ្ពស់របស់ហាម៉ាសបានប្រាប់រ៉យទ័រដោយសម្អាដ់ង្គភាពស៊ើបការណ៍សម្ងាត់របស់ខ្លួននោះ មិនបានបញ្ជាក់ថានៅពេលណាដែលប្រតិបត្តិការរំដោះរបស់អ៊ីស្រាអែល ត្រូវបានគេរំពឹងថានឹងកើតឡើងឡើយ។

មិនមានការឆ្លើយតបភ្លាមៗរបស់អ៊ីស្រាអែល ចំពោះសេចក្តីថ្លែងការណ៍នោះទេ ប៉ុន្តែកាលពីថ្ងៃពុធ ប្រព័ន្ធផ្សព្វផ្សាយអ៊ីស្រាអែល បានដកស្រង់សម្តីរដ្ឋមន្ត្រីការពារជាតិ លោក Israel Katz ដោយនិយាយថា សម្ពាធលើក្រុមហាម៉ាស កំពុងកើនឡើង ហើយនៅពេលនេះ “យើងនឹងពិតជាអាចឈានទៅរកកិច្ចព្រមព្រៀងចំណាប់ថ្នូរបានហើយ”៕