អភិបាលខេត្ត និងព្រះរាជអាជ្ញា សហការចុះដោះស្រាយបញ្ចប់វិវាទដីធ្លីប្រជាពលរដ្ឋក្រៅប្រព័ន្ធតុលាការ បាន១ករណីទៀតតាមយុទ្ធសាស្ត្រឈ្នះឈ្នះ

កំពង់ឆ្នាំង៖ ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង ឯកឧត្តម ឯក ស៊ុនរស្មី ព្រះរាជអាជ្ញាអមសាលាដំបូងខេត្តកំពង់ឆ្នាំង លោកអភិបាលរងខេត្ត លោកព្រះរាជអាជ្ញារងខេត្ត និងក្រុមការងារតាមមន្ទីរជំនាញបានអញ្ជើញចុះដោះស្រាយបញ្ជប់វិវាទដីធ្លីក្រៅប្រព័ន្ធតុលាការរបស់ប្រជាពលរដ្ឋខ្មែរឥស្លាម បាន១ករណីទៀតតាមយុទ្ធសាស្ត្រឈ្នះឈ្នះ និងទទួលបានជោគជ័យជាទីគាប់ចិត្ត។ ការដោះស្រាយបញ្ចប់វិវាទនេះ បានធ្វើឡើងនៅក្នុងឃុំតាជេស ស្រុកកំពង់ត្រឡាច ខេត្តកំពង់ឆ្នាំង នារសៀលថ្ងៃទី០៤ ខែធ្នូ ឆ្នាំ២០២៤នេះ។

ប្រជាពលរដ្ឋជាភាគីទំនាស់បានអោយដឹងថា៖ ពួកគាត់មានទីលំនៅបច្ចុប្បន្ននៅភូមិស្វាយក្រោម ឃុំតាជេស ស្រុកកំពង់ត្រឡាច ខេត្តកំពង់ឆ្នាំង និងមានវិវាទដីធ្លីនឹងគ្នាជាច្រើនឆ្នាំមកហើយ ។ នៅថ្ងៃនេះ ឯកឧត្តម ស៊ុន សុវណ្ណារិទ្ធិ អភិបាលខេត្ត និងឯកឧត្តម ឯក ស៊ុនរស្មី ព្រះរាជអាជ្ញាអមសាលាដំបូងខេត្ត រួមនិងក្រុមការងារមន្ទីរជំនាញ បានចុះមកដោះស្រាយវិវាទដីធ្លីពួកគាត់នៅសាលាឃុំតាជេសតែម្តង និងបានពន្យល់ណែនាំពួកគាត់ជាភាគីទំនាស់ទាំងសងខាងអោយឈប់ទាស់ទែងគ្នាតទៅទៀត ។ ឯកឧត្តមទាំង២នាក់ និងក្រុមការងារមន្ទីរជំនាញ បានយកយុទ្ធសាស្ត្រឈ្នះឈ្នះរបស់សម្តេចតេជោ ហ៊ុន សែន មកដោះស្រាយ ធ្វើអោយភាគីទាំងសងខាងពេចិត្ត និងទទួលយកដោយបានផ្តិតមេដៃបញ្ចប់វិវាទតែម្តង។

ក្នុងឱកាសចុះដោះបញ្ចប់វិវាទដីធ្លីប្រជាពលរដ្ឋនោះ ឯកឧត្តម ស៊ុន សុវណ្ណារិទ្ធិ បានថ្លែងបញ្ជាក់ថា៖ ចាប់តាំងពីឯកឧត្តមឡើងកាន់តំណែងជាអភិបាលខេត្តកំពង់ឆ្នាំងមកដល់ថ្ងៃនេះ គឺមានសំណុំរឿងប្រមាណជាង១៦០០សំណុំរឿង ហើយឯកឧត្តម និងក្រុមការងារបានដោះស្រាយវិវាទដីធ្លី និងវិវាទផ្សេងៗទៀតបានប្រមាណជាង១៥០០សំណុំរឿង និងនៅសល់ជាង១០០សំណុំរឿងទៀតកំពុងអោយក្រុមការងារខេត្តស្រុកឃុំ និងមន្ទីរជំនាញចុះដោះស្រាយជាបន្តបន្ទាប់ ហើយសង្ឃឹមថាបងប្អូននឹងស្ម័គចិត្តចូលរួមដោះស្រាយបញ្ចប់សំណុំរឿងទាំងអស់នោះនៅក្រៅប្រព័ន្ធតុលាការទាំងអស់គ្នា។

ការចុះដោះស្រាយបញ្ចប់វិវាទក្រៅប្រព័ន្ធតុលាការក្នុងពេលនេះ ក្នុងគោលបំណងបង្ខិតសេវាដោះស្រាយវិវាទឱ្យកាន់តែខិតទៅជិតប្រជាពលរដ្ឋនៅតាមមូលដ្ឋាន ធ្វើការសម្រុះសម្រួលដោះស្រាយវិវាទដែលអាចធានាបាននូវបរិយាកាសសន្តិភាពនិយម និងភាពសុខដុមរមនាក្នុងសង្គមជាតិ និងរួមចំណែកក្នុងការកាត់បន្ថយការកកស្ទះសំណុំរឿងនៅតាមតុលាការផងដែរ ៕ កាំង ហុងវាស្នា