ពិព័រណ៍«វារីវប្បកម្មកម្ពុជាលើកទី១» នឹងចាប់ផ្តើមនៅថ្ងៃស្អែកនេះ

ក្រសួងកសិកម្ម រុក្ខាប្រមាញ់ និងនេសាទ នឹងរៀបចំព្រឹត្តិការណ៍ «ពិព័រណ៍​វារីវប្បកម្ម​កម្ពុជា​លើក​ទី១» នៅថ្ងៃទី៦-៧ ខែធ្នូ ឆ្នាំ២០២៤នេះដើម្បីជំរុញការធ្វើទំនាក់ទំនង និងកិច្ច​សហការ​រវាង​ភាគី​ពាក់​ព័ន្ធ​ក្នុងខ្សែច្រវាក់តម្លៃវារីវប្បកម្ម។

លោកជំទាវ អ៊ឹម រចនា អនុរដ្ឋលេខាធិការ និងជាអ្នកនាំពាក្យក្រសួងកសិកម្ម រុក្ខាប្រមាញ់ និង​នេសាទ ​បានឲ្យដឹងថា ពិព័រណ៍នេះ ផ្ដួចផ្ដើមរៀបចំដោយក្រសួងកសិកម្ម ដើម្បីបង្កើន​ការ​យល់ដឹ​ង​ជា​សាធារណៈអំពីគុណភាពត្រីចិញ្ចឹមរបស់កម្ពុជា និងលើកកម្ពស់​ការ​យល់​ដឹង​របស់​ប្រជា​ពលរដ្ឋ​អំពី​វិស័យវារីវប្បកម្មនៅកម្ពុជា។ បន្ថែមពីនេះ គឺដើម្បីបញ្ជាក់ថាតើរហូតមកទល់ពេលនេះ វិស័យ​វារីវប្បកម្មនៅកម្ពុជាបានបើកដំណើរដល់ណាហើយ ដ្បិតកាលពីមុនប្រជាពលរដ្ឋទូទៅ ពុំ​សូវ​ទទួល​ទានត្រីចិញ្ចឹមដោយមានទស្សនៈថា ត្រីចិញ្ចឹមនេះមិន​ត្រូវ​តាម​គុណ​ភាព​ស្ដង់​ដារ​អនាម័យ ហើយអាចប៉ះពាល់ដល់សុខភាពនៅពេលដែលបរិភោគចូលទៅ។

លោកជំទាវ បានបញ្ជាក់ទៀតថា រហូតមកទល់ពេលនេះ វិស័យវារីវប្បកម្មនៅកម្ពុជា បាន​វិវត្ត​ទៅ​មុខ​​គួរ​ឱ្យកាត់សម្គាល់ ហើយមានសញ្ញាវិជ្ជមានជាច្រើន ដែល​ក្រសួង​ចាំ​បាច់​ត្រូវ​បង្ហាញ​ឱ្យ​សាធារណៈ​ជន​បានជ្រាបថា គុណភាពត្រីចិញ្ចឹមរបស់កម្ពុជាមានស្ដង់ដារ មានអនាម័យ ហើយ​អាច​ទទួល​ទានបានដោយមិនប៉ះពាល់ដល់សុខភាព។

លោកជំទាវ​បន្ថែមថា តាមរយៈពិពណ៌វារីវប្បកម្មនៅកម្ពុជា សាធារណជនទូទៅអាចជ្រាប អាច​ស្គាល់ អាចយល់កាន់តែច្បាស់ពីខ្សែច្រវាក់នៃវិស័យវារីវប្បកម្មទាំងមូល តាំង​ពី​ការ​ជ្រើស​រើស​ពូជ​ត្រី​យក​មក​ចិញ្ចឹម ការផ្ដល់ចំណីត្រី បច្ចេកទេស និងបច្ចេកវិទ្យាថ្មីៗ​ដែល​ប្រើប្រា​ស់​នៅ​ក្នុង​វារី​វប្បកម្ម​នេះ។​

សូមជម្រាបជូនថា ពិព័រណ៍ «វារីវប្បកម្មកម្ពុជាលើកទី១» នឹងរៀបចំឡើងនៅផ្សាររាត្រីសាន់សាញ បឹងកក់ រាជធានីភ្នំពេញក្នុងគោលបំណងជំរុញ និងលើកកម្ពស់ស្នាដៃរបស់វារីវប្បកម្មខ្មែរ ដើម្បី​បង្កើន​ការ​យល់ដឹងជាសាធារណៈ អំពីគុណ ភាពត្រីចិញ្ចឹមរបស់កម្ពុជា និងលើកកម្ពស់​ការ​យល់​ដឹង​អំពី​ចំណី ពូជ កា រផ្គត់ផ្គង់បច្ចេកវិទ្យាថ្មីៗដែលប្រើប្រាស់ក្នុងវារីវប្បកម្ម ជំរុញការ ទំនាក់​ទំនង​កិច្ច​សហការ​រវាងភាគីពាក់ព័ន្ធក្នុងខ្សែច្រវាក់តម្លៃវារីវប្បកម្ម ព្រមទាំងបង្កើតយន្តការផ្សព្វផ្សាយ ចែក​រំលែកចំណេះដឹង បទពិសោធន៍ និងមេរៀនក្នុងការអភិវឌ្ឍប្រព័ន្ធទីផ្សារវារីវប្បកម្មកម្ពុជា៕ អត្ថបទ៖ ឈិត បូរ៉ាវី