ទឹកស្អាតនៅភ្នំពេញនឹងមានសម្ពាធទឹកប្រកបដោយស្ថិរភាពនៅដើមឆ្នាំក្រោយ បន្ទាប់ពីដាក់ដំណើរការបំពង់មេនាំទឹក

រដ្ឋាករទឹកស្វយ័តក្រុងភ្នំពេញ បានតភ្ជាប់បំពង់មេនាំទឹកស្អាតគម្រោងបាក់ខែងជំហានទី២, ទំហំ ២ ម៉ែត្របានរួចរាល់ នឹងគ្រោង ដាក់ឱ្យដំណើរការនៅចុងខែនេះ ដើម្បីជំរុញទឹកទៅកាន់ប៉ែកខាងលិច និងខាងត្បូងរាជធានីភ្នំពេញ ដែលនឹងធ្វើឱ្យសម្ពោធទឹកនៅ រាជធានីភ្នំពេញនឹងមានស្ថិរភាពនូវគ្រប់ទីតាំងទាំងអស់។

ឯកឧត្តម ឡុង ណារ៉ូ ប្រតិភូរាជរដ្ឋាភិបាលកម្ពុជាទទួលបន្ទុក ជាអគ្គនាយកនៃរដ្ឋាករទឹកស្វយ័តក្រុងភ្នំពេញ លើកឡើងនៅ ក្នុងការតភ្ជាប់បំពង់មេនាំទឹកស្អាតគម្រោងបាក់ខែងជំហានទី២ នៅថ្ងៃទី ៥ ខែ ធ្នូ ឆ្នាំ ២០២៤ នេះថា នៅក្នុងផែនការមេរបស់រដ្ឋាករ ទឹកស្វយ័តក្រុងភ្នំពេញជំហានទី២ ក្នុងនោះរដ្ឋាករទឹកមានគម្រោងមួយ នៃការសាងសង់បំពង់មេនាំទឹក ដែលមានប្រវែងសរុប ១០០ គីឡូម៉ែត្រ ដោយរដ្ឋាករទឹកស្វយ័តក្រុងភ្នំពេញ បានចាប់ផ្តើមអនុវត្តតាំងពីឆ្នាំ ២០២២ ជាពិសេសបំពង់មេនាំទឹកខ្នាតធំជាងគេ និងជាប្រវត្តិសាស្រ្តរបស់ក្រុងភ្នំពេញនេះ គឺជាបណ្តញសា់នៃការតភ្ជាប់នៃបំពង់មេនាំដែលទទួលទឹកពីបាក់ខែងជំហានទី១ និងទី២ នៅប៉ែកខាងលិចនៃស្ពានព្រែកព្នៅ តាមបណ្តោយមហាវិថីឈ្នះឈ្នះ តភ្ជាប់ទៅបំពង់មេនាំទឹកទៅកាន់ផ្លូវជាតិលេខ ៤, សរុប ទាំងអស់ បំពង់នៅតាមបណ្តោយផ្លូវនេះ មានប្រវែង ១៥ គីឡូម៉ែត្រ និងបានភ្ជាប់ចេញទៅកាន់តំបន់ផ្សេងៗទៀតនៅទីក្រុងភ្នំពេញ។

ឯកឧត្តម បន្តឱ្យដឹងថា ជាក់ស្តែងបំពង់ដែលមានទំហំ ២ ម៉ែត្រ ត្រូវបានចាប់ផ្តើមសាងសង់ចាប់ពីខែ មករា ឆ្នាំ ២០២៤ នឹង ត្រូវបញ្ចប់ ហើយបានតភ្ជាប់គ្នារួចជាស្រាច់ នៅក្នុងថ្ងៃទី៥ ខែធ្នូនេះ ដោយក្នុងនោះរដ្ឋាករទឹកស្វយ័តក្រុងភ្នំពេញ បានចំណាយពេល លើសាងសង់ប្រមាណ ៣២៨ ថ្ងៃ។ ដោយឡែកសំណង់សិល្បការ្យដែលនៅសេសសល់បន្តិចបន្តិច និងត្រូវអនុវត្តបន្ត ព្រមទាំងការធ្វើ តេស្តសម្ពោធទឹកផងដែរ ធ្វើយ៉ាងណាជំរុញការតភ្ជាប់បំពង់មេនេះឱ្យចប់សព្វគ្រប់ទាំងអស់នៅចុងឆ្នាំ ២០២៤ នេះ ហើយចាប់ពីឆ្នាំ ២០២៥ តទៅ បំពងមេនេះនឹងមានតួនាទីសំខាន់ បញ្ជូនទឹកទៅកាន់ភាគខាងលិច និងខាងត្បូងនៃរាជធានីភ្នំពេញ ដែលមានសម្ពោធ ទឹកខ្ពស់ នឹងមានស្ថិរភាពគ្រប់ទីតាំងទាំងអស់នៅក្នុងរាជធានីភ្នំពេញ។

ឯកឧត្តម ឡុង ណារ៉ូ បន្តលើកឡើងឱ្យដឹងថា ជុំវិញការផ្គត់ផ្គង់ទឹកស្អាតនេះ បច្ចុប្បន្នរដ្ឋាករទឹកស្វយ័តក្រុងភ្នំពេញ មានសមត្ថ ភាពផលិតទឹកស្អាតសរុប មានចំនួន ១ លានម៉ែត្រគីបក្នុងមួយថ្ងៃ ប៉ុន្តែការចែកចាយទឹកស្អាតជាក់ស្តែង បានចំនួនត្រឹម ៨២០ ពាន់ ម៉ែត្រគីប ទៅ ៨៥០ ពាន់ម៉ែត្រគីបក្នុងមួយថ្ងៃប៉ុណ្ណោះ ដោយសារការដាក់បំពង់មេនាំទឹកមិនទាន់បានសាងសង់រួចរាល់ ។ ឯកឧត្តម បញ្ជាក់ឱ្យដឹងបន្ថែមថា ជុំវិញបញ្ហាទឹកស្អាតនេះ រដ្ឋាករទឹកស្វយ័តក្រុងភ្នំពេញមានសមត្ថភាពផលិតគ្រប់គ្រាន់ ហើយបន្ទាប់ពីការតភ្ជាប់ បំពង់មេដ៏ធំនេះរួចចាល់ ក្នុងនោះចាប់ពីឆ្នាំ ២០២៥ តទៅ ប្រជាពលរដ្ឋលែងជួបប្រទះលើបញ្ហាទឹកស្អាតនេះតទៅទៀតហើយ៕ អត្ថបទ៖ សុន រ៉ាឌី