មេដឹកនាំបក្សកាន់អំណាចកូរ៉េខាងត្បូង៖ លោក Yoon ត្រូវតែផ្អាកតួនាទីឱ្យបានឆាប់បំផុត

មេដឹកនាំគណបក្សកាន់អំណាចរបស់ប្រទេសកូរ៉េខាងត្បូង បាននិយាយនៅថ្ងៃសុក្រ (០៦ ធ្នូ) នេះថា លោកប្រធានាធិបតី Yoon Suk Yeol ចាំបាច់ត្រូវតែដកចេញពីអំណាចដើម្បីសុវត្ថិភាពរបស់ប្រទេស ដោយសារតែលោកព្យាយាមដាក់ច្បាប់អាជ្ញាសឹកដែលក្រោយមកត្រូវលុបចោលវិញ ប៉ុន្តែមិនបានជំរុញសមាជិកបក្សឱ្យបោះឆ្នោតចោទប្រកាន់ទម្លាក់តំណែងលោក Yoon នោះទេ។

លោក Yoon បានធ្វើឱ្យប្រទេសជាតិ និងបក្សអំណាចប្រជាជន ដែលកំពុងកាន់អំណាចរបស់លោកផ្ទាល់ មានការភ្ញាក់ផ្អើលយ៉ាងខ្លាំងកាលពីថ្ងៃអង្គារ នៅពេលលោកប្រកាសដាក់ច្បាប់អាជ្ញាសឹកដើម្បីលុបបំបាត់ “កងកម្លាំងប្រឆាំងរដ្ឋ” និងយកឈ្នះលើគូប្រជែងនយោបាយរបស់ខ្លួន។ ប្រធានាធិបតីរូបនេះបានដកច្បាប់នោះចេញវិញ ប្រហែលប្រាំមួយម៉ោងក្រោយមក បន្ទាប់ពីសភា រួមទាងជិកួយចំនួននៃបក្សរបស់លោក បានបោះឆ្នោតប្រឆាំងនឹងក្រឹត្យនេះ។

ថ្លែងបន្ទាប់ពីកិច្ចប្រជុំបក្សនៅសភាក្នុងថ្ងៃសុក្រនេះ មេដឹកនាំបក្ស លោក ហាន ដុងហ៊ូន (Han Dong-hoon) បាននិយាយថា លោក Yoon បានបញ្ជាឱ្យចាប់ខ្លួនអ្នកនយោបាយលេចធ្លោ ដោយសារហេតុផលថាពួកគេស្ថិតក្នុងចំណោម “កងកម្លាំងប្រឆាំងរដ្ឋ” ក្នុងអំឡុងពេលច្បាប់អាជ្ញាសឹកនោះ ហើយលោកត្រូវតែដកពីតំណែងឱ្យបានឆាប់ដើម្បីសុវត្ថិភាពប្រទេសទាំងមូល។

គណបក្សប្រជាធិបតេយ្យ ដែលជាបក្សប្រឆាំងដ៏សំខាន់ បានកំណត់ពេលបោះឆ្នោតចោទប្រកាន់ទម្លាក់តំណែងនៅល្ងាចថ្ងៃសៅរ៍ស្អែកនេះ ហើយនគរបាលជាតិបានបើកការស៊ើបអង្កេតលើលោក Yoon ជុំវិញការអះអាងពីការបះបោរ ដែលប្តឹងដោយគណបក្សប្រឆាំង និងក្រុមសកម្មជន៕