លោក ពូទីន៖ មីស៊ីលបាលីស្ទីកថ្មី អាចនឹងត្រូវដាក់ពង្រាយនៅប្រទេសបេឡារុស នៅឆ្នាំក្រោយ

ប្រធានាធិបតីរុស្ស៊ី លោក វ្ល៉ាឌីមៀ ពូទីន បាននិយាយបង្ហើបពីផែនការរបស់លោក សម្រាប់មីស៊ីលបាលីស្ទីករយៈចម្ងាយមធ្យមថ្មី ដែលបានបាញ់កាលពីខែមុនទៅលើប្រទេសអ៊ុយក្រែន។ លោក និយាយថា អាវុធដែលមានឈ្មោះថា Oreshnik អាចនឹងត្រូវបានដាក់ពង្រាយនៅក្នុងប្រទេសបេឡារុស ក្នុងឆមាសទីពីរ នៅឆ្នាំក្រោយ។

លោកពូទីន កំពុងឆ្លើយតបទៅនឹងសំណើពីប្រធានាធិបតីប្រទេសបេឡារុស លោក Alexander Lukashenko បន្ទាប់ពីបានចុះហត្ថលេខាលើសន្ធិសញ្ញាការពារទៅវិញទៅមក កាលពីថ្ងៃសុក្រ នៅទីក្រុង Minsk ។

លោក ពូទីន និយាយថា ប្រសិនបើមីស៊ីល Oreshnik ត្រូវបានប្រើប្រាស់ជាក្រុមមួយ នោះកងកម្លាំងវាយប្រហារ នឹងអាចប្រៀបធៀបវាបានទៅនឹងអាវុធនុយក្លេអ៊ែរ។ ការលើកឡើងបែបនេះត្រូវបានគេមើលឃើញថា ជាការព្រមានដល់ប្រទេសអ៊ុយក្រែន សហរដ្ឋអាមេរិក និងអឺរ៉ុប។

អ្នកនាំពាក្យវិមានក្រឹមឡាំង លោក Dmitry Peskov បាននិយាយទៅកាន់អ្នកសារព័ត៌មានកាលពីថ្ងៃសុក្រថា លោក ពូទីន នឹងធ្វើសន្និសព័ត៌មានប្រចាំឆ្នាំនៅចុងឆ្ាំរបស់លោក នៅថ្ងៃទី ១៩ ខែធ្នូ។ លោកពូទីន ត្រូវបានគេរំពឹងថានឹងឆ្លើយសំណួរពីសាធារណជនក្នុងអំឡុងពេលព្រឹត្តិការណ៍នោះ។

ការយកចិត្តទុកដាក់គឺផ្តោតសំខាន់លើអ្វីដែលលោក អាចនិយាយអំពីប្រធានាធិបតីជាប់ឆ្នោតរបស់សហរដ្ឋអាមេរិក លោក Donald Trump ដែលនឹងចូលកាន់តំណែងនៅ ខែ មករា ខាងមុខ និងការវាយលុកលើអ៊ុយក្រែន។ ជម្លោះ នឹងឈានចូលដល់ឆ្នាំទីបួន នៅក្នុងខែកុម្ភៈ ខាងមុខ។