លោក Trump វិលមកកាន់ឆាកអន្តរជាតិវិញ នៅឯកម្មវិធីបើកសម្ពោធវិហារ Notre-Dame ឡើងវិញ នៅទីក្រុងប៉ារីស

ប្រធានាធិបតីជាប់ឆ្នោតរបស់សហរដ្ឋអាមេរិក លោក Donald Trump បានវិលត្រលប់មកកាន់ឆាកអន្តរជាតិវិញហើយ នៅថ្ងៃសៅរ៍ (ទី៧ ខែធ្នូ) នេះ ដោយត្រូវចូលរួមជាមួយបណ្ដាមេដឹកនាំផ្សេងទៀត ក្នុងកម្មវិធីបើកសម្ពោធឡើងវិញនូវវិហារ Notre-Dame ក្នុងទីក្រុងប៉ារីស ប្រទេសបារាំង ហើយបើទោះបីត្រឹមតែជាភ្ញៀវឯកជនក៏ដោយ ក៏លោកកំពុងត្រៀមរួចរាល់ហើយ ដើម្បីដោះស្រាយវិបត្តិអន្តរជាតិនានា។

នេះនឹងក្លាយជាដំណើរក្រៅប្រទេសលើកដំបូងរបស់លោក Trump គិតចាប់តាំងពីលោកបានឈ្នះការបោះឆ្នោតប្រធានាធិបតី កាលពីមួយខែមុន ហើយវាអាចផ្តល់ឱកាសឲ្យប្រធានាធិបតីបារាំង លោក Emmanuel Macron ដើរតួជាអ្នកសម្របសម្រួល រវាងអឺរ៉ុប និងអ្នកនយោបាយអាមេរិកដែលមិនអាចទាយទុកមុនបាន ពោលគឺជាតួនាទីដែលមេដឹកនាំបារាំងធ្លាប់ពេញចិត្ត នាពេលកន្លងមក។

ឥស្សរជនទាំង ២ ត្រូវបានគេរំពឹងថា នឹងជួបគ្នានៅខាងក្រៅនៃដំណើរទស្សនកិច្ចថ្ងៃសៅរ៍នេះ។ ខណៈពេលដែលមិនមានរបៀបារ សម្រាប់ិច្ចពិភាក្សាត្រូវបានប្រកាសឲ្យដឹង បណ្ដាមេដឹកនាំអឺរ៉ុប មានការព្រួយបារម្ភថា លោក Trump អាចដកជំនួយយោធារបស់សហរដ្ឋអាមេរិក សម្រាប់ប្រទេសអ៊ុយក្រែន នៅក្នុងដំណាក់ដ៏សំខាន់នៃសង្រ្គាម ដែលប្រទេសនេះប្រឹងប្រែងទប់ទល់នឹងការលុកលុយរបស់រុស្ស៊ី។

លោក Macron គឺជាអ្នកគាំទ្រដ៏រឹងមាំនៃសម្ព័ន្ធភាពណាតូ និងការប្រយុទ្ធរបស់អ៊ុយក្រែន ខណៈដែលលោក Trump មានអារម្មណ៍ថា បណ្តាប្រទេស នៅអឺរ៉ុប ត្រូវចំណាយបន្ថែមទៀត សម្រាប់ការការពាររួមរបស់ពួកគេ ហើយថា ដំណោះស្រាយចរចា គឺចាំបាច់ ដើម្បីបញ្ចប់សង្គ្រាមអ៊ុយក្រែន។

គួរបញ្ជាក់ថា លោក Trump នឹងចូលរួមជាមួយមេដឹកនាំពិភពលោក និងឥស្សរជនបរទេសរាប់សិបនាក់ ក្នុងពិធីបើកសម្ពោធឡើងវិញនូវវិហារ Notre-Dame ដែលត្រូវបានបិទរយៈពេល ៥ឆ្នាំកន្លះ បន្ទាប់ពីត្រូវបានបំផ្លិចបំផ្លាញ ដោយសារអគ្គិភ័យ។ គេមិនច្បាស់ទេថា តើលោក Trump នឹងជួបមេដឹកនាំផ្សេងទៀតក្រៅពីលោក Macron ដែរ ឬទេ។ ក្រុមការងារអន្តរកាលរបស់លោក Trump មិនឆ្លើយតបនោះឡើយទៅនឹងសំណើសុំព័ត៌មានលម្អិត៕