វៀតណាម និងឥណ្ឌូណេស៊ី បើកការប្រកួតពានរង្វាន់អាស៊ាន២០២៤ សុទ្ធតែឈ្នះរៀងៗខ្លួន

ក្រុមបាល់ទាត់ជម្រើសជាតិឥណ្ឌូណេស៊ី បើកការប្រកួតបាល់ទាត់ពានរង្វាន់តំបន់អាស៊ីអាគ្នេយ៍ ក្នុងពូលB ដោយបានយកឈ្នះសហភាពមីយ៉ាន់ម៉ា ១ទល់នឹង០ នៅពហុកីឡដ្ឋាន Thuwunna ទីក្រុង​យ៉ាងហ្គួន យប់ថ្ងៃទី៩ ខែធ្នូ ឆ្នាំ២០២៤ ពីមុខអ្នកគាទ្រ១២ ៥០០នាក់។

វគ្គទី​មួយ​ក្រុមទាំងពីរគ្មានក្រុមណាមួយទាត់បញ្ចូលទីគ្នាបាននោះទេ។ តែកីឡាករ​ម្ចាស់​ផ្ទះ​បី​រូប​ត្រូវ​ពិន័យ​កាតលឿង ក្រោយបង្ករកំហុស។

វគ្គទី២ទាំងម្ចាស់ផ្ទះ និងភ្ញៀវ បង្កើនការដាក់សម្ពាធទៅវិញទៅមក។ រហូតដល់នាទីទី៧៧ ទើប​មាន​គ្រាប់​បាល់កើតឡើងពេលដែលកីឡាករ Asnawi Mangkualam Bahar ទាត់បញ្ចូល​ទី​បាន​សម្រេច​ឱ្យក្រុម។ នាទីនៅសេសសល់គ្មានគ្រាប់បាល់កើតឡើងបន្ថែមទៀតទេ។ ចប់ការប្រកួត ឥណ្ឌូណេស៊ី​ទទួលបានបីពិន្ទុ ពីការប្រកួតនេះ។

ប្រកួតបន្ទាប់ថ្ងៃ​ទី១២ ខែធ្នូ គ្រុឌឥណ្ឌូណេស៊ី ទទួលឡាវ នៅពហុកីឡដ្ឋាន ម៉ាណាហាន ខេត្តជ្វា​កណ្តាល ឥណ្ឌូណេស៊ី វេលាម៉ោង២០និង០០នាទី។ ឯសហភាព​ម៉ាន់​ម៉ា​ត្រូវ​្វើ​ដំណើរ​ទៅ​ជួប​ហ្វីលីពីន​នៅ​ទីក្រុងម៉ានីល។

ថ្ងៃជាមួយគ្នា ក្នុងពូលជាមួយគ្នា ជើងឯកពីរដងវៀតណាម បានយកឈ្នះម្ចាស់ផ្ទះឡាវ ៤ទល់​នឹង១ នៅពហុកីឡដ្ឋានជាតិឡាវ ទីក្រុងវៀងចន្ទន៍ ដោយមានអ្នកគាំទ្រចូលរួម១០៦៨៥នាក់។ វគ្គទី១ គ្មានគ្រាប់បាល់កើតឡើងនោះទេ។

លេងវគ្គទី២បាន១៣នាទី វៀតណាមបើកការនាំមុខមុនដោយគ្រាប់បាល់របស់កីឡាករ Nguyễn Hai Long ពេលដែលកីឡាករ Bui Tiem Dung បញ្ជួនបាល់ឱ្យ។ ១៥នាទីក្រោយមក វៀតណាម​បន្ថែម​មួយ​គ្រាប់ទៀត ធ្វើបានសម្រេចដោយកីឡាករ Nguyễn Tien Linh បន្ទាប់ពីបញ្ជួន​បាល់​ចេញ​ពី​កីឡាករ Nguyen Quang Hai។ ការប្រកួតដំណើរការដល់នាទីទី៦៩ កីឡាករ Nguyen Van Toan ដោយសហការពីកីឡាករ Nguyen Quang Hai ក៏បានទាត់​បញ្ចូល​ទីគ្រាប់​ទី៣​ឱ្យ​វៀតណាម មុនពេលដែលកីឡាករ Van Vi Nguyen បន្ថែមគ្រាប់ទី៤ឱ្យក្រុមនៅនាទីទី៨២។ ជិតចប់ការប្រកួតឡាវ វាយបកបានមួយគ្រាប់វិញដោយកីឡាករក្លឹបព្រះខ័នរាជស្វាយរៀង Bounphachan Bounkong ទាត់បាល់ពិន័យ១១ម៉ែត្រ។

ប្រកួតបន្ទាប់ថ្ងៃទី១២ ខែធ្នូ ឡាវ ជួបឥណ្ឌូណេស៊ី និងវៀតណាមត្រូវសម្រាកត្រៀមជួបឥណ្ឌូណេស៊ីថ្ងៃទី១៥ ខែធ្នូខាងមុខ៕