កូរ៉េខាងជើង ផ្សព្វផ្សាយពីវិបត្តិច្បាប់អាជ្ញាសឹករបស់កូរ៉េខាងត្បូង ជាលើកដំបូង

ប្រព័ន្ធផ្សព្វផ្សាយរដ្ឋកូរ៉េខាងជើង KCNA នៅថ្ងៃពុធ (១១ ធ្នូ) នេះ បានរាយការណ៍ជាលើកដំបូងអំពីភាពចលាចលនយោបាយដែលកំពុងបន្តរបស់កូរ៉េខាងត្បូង ចាប់តាំងពីការប៉ុនប៉ងដាក់ច្បាប់អាជ្ញាសឹកដ៏ចម្រូងចម្រាសរបស់លោកប្រធានាធិបតី Yoon Suk Yeol មក។

បទបញ្ជាច្បាប់អាជ្ញាសឹកដ៏គួរឱ្យភ្ញាក់ផ្អើលកាលពីសប្តាហ៍មុន បានបង្កឱ្យមានការព្រួយបារម្ភអំពីភាពខ្វះចន្លោះនៃអំណាច ព្រមទាំងធ្វើឱ្យប្រទេសសេដ្ឋកិច្ចធំបំផុតទី៤ របស់អាស៊ី និងជាសម្ព័ន្ធមិត្តដ៏សំខាន់របស់សហរដ្ឋអាមេរិកមួយនេះ ធ្លាក់ចូលទៅក្នុងវិបត្តិរដ្ឋធម្មនុញ្ញ ដោយបានបញ្ជូនរលកភ្ញាក់ផ្អើលតាមរយៈផ្នែកការទូត និងសេដ្ឋកិច្ច។

បន្ទាប់ពីស្ងប់ស្ងាត់អស់រយៈពេលមួយសប្តាហ៍ ប្រព័ន្ធផ្សព្វផ្សាយ KCNA បានបោះពុម្ពអត្ថបទមួយស្តីពីីដែលខ្លួនបានិពណ៌នាថាជា “ភាពចលាចលសង្គម” ដែលកំពុងកើនឡើងនៅកូរ៉េខាងត្បូង ដោយសារតែវិបត្តិច្បាប់អាជ្ញាសឹក។

KCNA បាននិយាយថា “លោក Yoon Suk Yeol ដែលបានប្រឈមមុខនឹងវិបត្តិធ្ងន់ធ្ងរនៃអភិបាលកិច្ច និងការចោទប្រកាន់ទម្លាក់តំណែងរួចទៅហើយនោះ បានប្រកាសច្បាប់អាជ្ញាសឹកដោយមិននឹកស្មានដល់ និងបានបញ្ចេញគ្រាប់កាំភ្លើងនៃរបបផ្តាច់ការហ្វាស៊ីសលើប្រជាជន”។

អត្ថបទនោះមិនបានផ្តល់ការអត្ថាធិប្បាយអ្វីច្រើនទេ ប៉ុន្តែភាគច្រើនបានយករបាយការណ៍ប្រព័ន្ធផ្សព្វផ្សាយកូរ៉េខាងត្បូង និងអន្តរជាតិ ដោយផ្តោតលើការតវ៉ាជាបន្តបន្ទាប់ ដែលចូលរួមដោយហ្វូងមនុស្សជាងមួយលាននាក់ និងការអំពាវនាវឱ្យមានការចោទប្រកាន់ទម្លាក់តំណែងលើលោក Yoon៕