ធនាគារ ADB គាំទ្រវិទ្យាស្ថានជាតិពហុបច្ចេកទេសអង្គរក្នុងកសាងធនធានយុវជន

ភ្នំពេញ ៖ ធនាគារអភិវឌ្ឍន៍អាស៊ី (ADB) បានគាំទ្រវិទ្យាស្ថានពហុបច្ចេកទេសអង្គរ ក្នុងការកសាងធនធានយុវជនពង្រឹងសមត្ថភាពជំនាញ។

លោកស្រី Jyotsana Varma (ចូតសាណា វ៉ាម៉ា) នាយិកាធនាគារអភិវឌ្ឍន៍អាស៊ីប្រចាំកម្ពុជា (ADB) នៅថ្ងៃទី១១ ខែធ្នូ ឆ្នាំ២០២៤ បានដឹកនាំក្រុមការងារធនាគារ ADB និងក្រុមអ្នកសារព័ត៌មានចុះទស្សនកិច្ចនៅវិទ្យាស្ថានជាតិពហុបច្ចេកទេសអង្គរ ស្ថិតនៅក្រុងសៀមរាប ខេត្តសៀមរាប។

នៅក្នុងដំណើរទស្សនកិច្ច លោកស្រី Jyotsana Varma មានប្រសាសន៍ប្រាប់អ្នកសារព័ត៌មានថា ក្នុងការអនុវត្តគម្រោងជំនាញដើម្បីបង្កើនសមត្ថភាពប្រកួតប្រជែង ធនាគារ ADB បានគាំទ្រវិទ្យាស្ថានបណ្តុះបណ្តាលបច្ចេកទេសអង្គរ ដើម្បីបណ្តុះបណ្តាលអ្នកបច្ចេកទេស ដែលមានសមត្ថភាពដើម្បីសម្រេចបានអាត្រាទទួលបានការងារខ្ពស់ និងជំនាញបច្ចេកទេសស្របនឹងទីផ្សារ។ លើសពីនេះ លោកស្រី Jyotsana Varma បានលើកឡើងពីសារៈសំខាន់នៃតំរូវការអ្នកជំនាញក្នុងវិស័យឧស្សាហកម្មនៅក្នុងប្រទេសកម្ពុជាផងដែរ។

យុវជនឱ្យដឹងដែរថា បន្ទាប់ពីរៀនជំនាញចប់ នៅវិទ្យាស្ថានពហុបច្ចេកទេសអង្គរ ពួកគេទទួលបានការងារធ្វើ និងទទួលបានប្រាក់ខែរ្យអាចផ្គត់ផ្គង់ជីវភាពរស់នៅប្រចាំថ្ងៃបានធូរធារ។ បន្ថែមលើនេះ យុវជនបានអរគុណដល់ ធនាគារ ADB ដែលបានគាំទ្រដល់វិទ្យាស្ថានពហុបច្ចេកទេសអង្គរ និងបានផ្តល់ប្រាក់ឧបត្ថម្ភប្រចាំខែរហូតដល់ពួកគេរៀនជំនាញចប់។

គួរបញ្ជាក់ដែរថា គម្រោងជំនាញដើម្បីបង្កើនសមត្ថភាពប្រកួតប្រជែង បានវិនិយោគថវិការសរុបចំនួនប្រមាណ៨៨,២៣លាន ក្នុងនោះថវិការ៦០លានដុល្លាពីធនាគារ ADB ជិត២០លានដុល្លាជាសហហិរញ្ញប្បទានពីទីភ្នាក់ងារងារអភិវឌ្ឍន៍បារាំង និង៨,៣១លានដុល្លាពីរាជរដ្ឋាភិបាលកម្ពុជា។ គម្រោងបានដំណើរការចាប់តាំងពីខែមិថុនា ឆ្នាំ២០១៩ រហូតដល់ខែតុលា ឆ្នាំ២០២៦ ផ្តោតលើការអនុវត្តដូចជា៖ពង្រឹងគុណភាពកម្មវិធី TVET ក្រោយមធ្យមសិក្សានៅវិទ្យាស្ថានបណ្តុះបណ្តាលបច្ចេកទេសចំនួន ៥រួមមាន៖វិទ្យាស្ថានជាតិពហុបច្ចេកទេសអង្គរ (នៅខេត្តសៀមរាប) វិទ្យាស្ថានបច្ចេកវិទ្យាបាត់ដំបង (នៅខេត្តបាត់ដំបង) វិទ្យាស្ថានបច្ចេកវិទ្យាកម្ពុជា (ក្នុងរាជធានីភ្នំពេញ) សួនអប់រំបណ្តុះបណ្តាលបច្ចេកទេស និងវិជ្ជាជីវៈរាជធានីភ្នំពេញ (ក្នុងរាជធានីភ្នំពេញ) និង វិទ្យាស្ថានពហុបច្ចេកទេសភូមិភាគតេជោសែនស្វាយរៀង(នៅខេត្តស្វាយរៀង) ព្រមទាំងដោះស្រាយគម្លាតជំនាញ និងកង្វះជំនាញក្នុងវិស័យឧស្សាហកម្ម តាមរយៈកម្មវិធីសិក្សាផ្អែកលើការងារ និងពង្រីកមូលនិធិអភិវឌ្ឍន៍ជំនាញសាកល្បងជាដើម។ អត្ថបទ៖ទូច សោភ័ណ