រដ្ឋមន្រ្តីបរិស្ថាន៖ ក្រសួងបានធ្វើទំនើបកម្មការតាមដាន និងត្រួតពិនិត្យការបំពុល​បរិស្ថានពីចម្ងាយ ទៅលើទីតាំងក្រុមហ៊ុន ឬរោងចក្រដែលមានហានិភ័យខ្ពស់

«យើងសុខចិត្តឱ្យមានការបិទរោងចក្រ សហគ្រាសណា ដែលបំពុល​បរិស្ថាន និង​ប៉ះពាល់​សុខភាព​សារធារណៈ ជាជាងអនុញ្ញាតឱ្យរោងចក្រសហគ្រាសនោះ បំផ្លាញបរិស្ថាន និង​ប៉ះពាល់​អាយុ​ជីវិត​កម្មករ និងប្រជាពលរដ្ឋរបស់យើង» នេះជាការលើកឡើងរបស់ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន នៅក្នុង​ឱកាស​អញ្ជើញ​បើក​សន្និបាត​បូក​សរុប​ការងារ​បរិស្ថាន​ឆ្នាំ​២០២៤ និង​ទិសដៅការងារ២០២៥ នាទីស្តីការក្រសួងបរិស្ថាននាថ្ងៃទី១៦ ខែធ្នូ ឆ្នាំ២០២៤។

ឯកឧត្តមរដ្ឋមន្រ្តី បានថ្លែងថា ក្រសួងបរិស្ថានបានធ្វើទំនើបកម្ម ការតាមដាន និង​ត្រួតពិនិត្យ​ការ​បំពុល​បរិស្ថាន​ពីចម្ងាយ ទៅលើទីតាំងក្រុមហ៊ុន ឬរោងចក្រ ដែលជាប្រភព​នៃកា​រ​បញ្ចេញ​សំណល់ ដែលមានហានិភ័យខ្ពស់ ដល់បរិស្ថាន សំដៅពង្រឹងការអនុវត្តច្បាប់ កាត់បន្ថយពេលវាលា និង​សកម្ម​ភាពចុះផ្ទាល់របស់ន្រ្តីជំនាញ  ដែលអាចបង្កការរំខានដល់វិនិយោគគិន និងកាត់​បន្ថយ​ការ​បំពុល​បរិស្ថាន តាមរយៈ ការតម្រូវឱ្យបំពាក់ឧបករណ៍ស្វ័យត្រួតពិនិត្យ នៅត្រង់ចំណុច​បញ្ចេញ​សំណល់ នៅតាមប្រភពបំពុល សក្ដានុពលទាំងអស់ ដើម្បីធ្វើការវាស់ស្ទង់​បរិមាណ និង​កម្រិត​សារធាតុបំពុលបញ្ចេញ និងបញ្ជូនទិន្នន័យមកក្រសួងបរិស្ថាន តាមប្រព័ន្ធអនឡាញ (Online) ដោយស្វ័យប្រវត្តិ។

សូមបញ្ជាក់ថា រោងចក្រសហគ្រាស ចំនួន៣៦ គិតត្រឹមខែធ្នូ ឆ្នាំ២០២៤ បាននិងកំពុង​បំពាក់​ឧបករណ៍​ស្វ័យត្រួតពិនិត្យ និងប្រព័ន្ធគ្រប់គ្រងទិន្នន័យបញ្ចេញសំណល់រាវ នៅតាមទីតាំង​របស់​ខ្លួន ក្នុងចំណោមរោងចក្រ សហគ្រាសសរុបចំនួន ១២២កន្លែង ដែលត្រូវ​បំពាក់​ឧបករណ៍​ស្វ័យ​ត្រួត​ពិនិត្យ និងប្រព័ន្ធគ្រប់គ្រងទិន្នន័យការបញ្ចេញសំណល់រាវ តាមច្បាប់៕