UNIFIL ជំរុញឱ្យអ៊ីស្រាអែលដកទ័ពតាមការសន្យាពីលីបង់ភាគខាងត្បូង ក្រោមកិច្ចព្រមព្រៀងបទឈប់បាញ់អាយុកាលមួយខែ

កងកម្លាំងរក្សាសន្តិភាពរបស់អង្គការសហប្រជាជាតិនៅក្នុងប្រទេសលីបង់ (UNIFIL) បានអំពាវនាវដល់អ៊ីស្រាអែលកាលពីថ្ងៃព្រហស្បតិ៍សប្ដាហ៍នេះឲ្យដកទ័ពតាមការការសន្យាដែលបានកំណត់ចេញពីទឹកដីលីបង់ភាគខាងត្បូង ដោយលើកឡើងនូវអ្វីដែលខ្លួនហៅថាការរំលោភលើកិច្ចព្រមព្រៀងឈប់បាញ់កាលពីថ្ងៃទី ២៧ ខែវិច្ឆិកាជាមួយក្រុមប្រដាប់អាវុធលីបង់គាំទ្រដោយអ៊ីរ៉ង់។

អ៊ីស្រាអែល និងក្រុមហេសបូឡា បានយល់ព្រមលើបទឈប់បាញ់រយៈពេល ៦០ ថ្ងៃក្រោមការសម្របសម្រួលដោយសហរដ្ឋអាមេរិក ដែលអំពាវនាវឱ្យមានការដកទ័ពអ៊ីស្រាអែលជាដំណាក់កាលបន្ទាប់ពីសង្រ្គាមអស់រយៈពេលជាងមួយឆ្នាំ ស្របតាមសេចក្ដីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិឆ្នាំ ២០០៦ ដែលបានបញ្ចប់ជម្លោះដ៏ធំចុងក្រោយរបស់ពួកគេ។

នៅក្រោមកិច្ចព្រមព្រៀងនេះ ក្រុមុ្នហេសបូឡា ត្រូវែចាកចេញពីទីតាំងនៅភាគខាងត្បូងលីបង់ទៅភាគខាងជើងនៃទន្លេ Litani ដែលលាតសន្ធឹងចម្ងាយប្រហែល៣០គីឡូម៉ែត្រ ភាគខាងជើងនៃព្រំដែនជាមួយអ៊ីស្រាអែល រួមទាំងការដកទ័ពអ៊ីស្រាអែលទាំងស្រុងពីភាគខាងត្បូង។

នៅក្នុងសេចក្តីថ្លែងការណ៍មួយUNIFIL បានសម្តែងការព្រួយបារម្ភចំពោះអ្វីដែលខ្លួនបាននិយាយថា ជាការបន្តការបំផ្លិចបំផ្លាញដោយកងកម្លាំងអ៊ីស្រាអែលនៃតំបន់លំនៅដ្ឋាន ដីស្រែចម្ការ និងហេដ្ឋារចនាសម្ព័ន្ធនៅភាគខាងត្បូងប្រទេសលីបង់ ដោយចាត់ទុកថានេះគឺជាការរំលោភលើសេចក្តីសម្រេច១៧០១ របស់អង្គការសហប្រជាជាតិ។

សេចក្តីថ្លែងការណ៍បាននិយាយថា កងកម្លាំងរក្សាសន្តិភាពរបស់អង្គការសហប្រជាជាតិនៅក្នុងប្រទេសលីបង់ បន្តជំរុញឱ្យមានការដកចេញទាន់ពេលវេលានៃកងកម្លាំងការពារអ៊ីស្រាអែល និងការដាក់ពង្រាយកងកម្លាំងប្រដាប់អាវុធលីបង់ តាមទីតាំងរបស់ក្រុមហេសបូឡា នៅភាគខាងត្បូងប្រទេសលីបង់ រួមទាំងការអនុវត្តពេញលេញនៃសេចក្ដីសម្រេច១៧០១ ជាមាគ៌ាគ្រប់ជ្រុងជ្រោយឆ្ពោះទៅរកសន្តិភាព៕