ក្រសួងសេដ្ឋកិច្ចវាយតម្លៃកំណើនសេដ្ឋកិច្ចគិតត្រឹមពាក់កណ្តាលឆ្នាំនេះមានអត្រាត្រឹម ៥%

ក្រសួងសេដ្ឋកិច្ច និងហិរញ្ញវត្ថុ វាយតម្លៃសេដ្ឋកិច្ចកម្ពុជា គិតត្រឹមពាក់កណ្តាលឆ្នាំ២០២៥នេះ បានថមថយមកនៅត្រឹមអត្រា ៥%, ដោយសារផលប៉ះពាល់នៃការបិទខ្ទប់ព្រំដែនគោក បាន​បង្អាក់​សកម្មភាព​ផលិតកម្ម ដែលពឹងផ្អែកលើការដឹកជញ្ជូនវត្ថុធាតុដើម ការនាំចេញ និង​រំហូរ​ទេសចរ​ផង​ដែរ។

យោងតាមរបាយការណ៍ស្តីពីលទ្ធផលនៃការអនុវត្តឆមាសទី១ និង​ការ​វាយ​តម្លៃ​លើ​ការ​អនុវត្ត​ច្បាប់​ ស្តីពីហិរញ្ញវត្ថុសម្រាប់ការ គ្រប់គ្រងឆ្នាំ២០២៥ របស់ក្រសួងសេដ្ឋកិច្ច និងហិរញ្ញវត្ថុ បាន​បង្ហាញ​​ពី​ស្ថានភាពម៉ាក្រូសេដ្ឋកិច្ចនៅក្នុងឆមាសទី១ និងការវាយតម្លៃ សម្រាប់ឆ្នាំ២០២៥ ក្នុង​នោះ​មុន​ពេលការដាក់ពន្ធគយបដិកា និងការបិទខ្ទប់ព្រំដែនគោកកម្ពុជា-ថៃ, សេដ្ឋកិច្ច​កម្ពុជា​ត្រូវ​បា​​នប៉ាន់ស្មាន ថា នឹងមានកំណើនក្នុងអត្រាប្រមាណ ៦,៣% ដោយសារការបន្តចលនការរឹងមាំ នៃ​វិស័យបម្រើដល់ការនាំចេញ មានវិស័យកម្មន្ត សាលកាត់ដេរ និងមិនមែនកាត់ដេរ, វិស័យ​ទេសចរណ៍​នៅបន្តនិន្នាការកើនឡើង, និងវិស័យកសិកម្មក៏នៅបន្តរក្សាបានស្ថិរភាព នៃ កំណើន។ យ៉ាងណាមិញក្នុងអំឡុងខែមេសា ឆ្នាំ២០២៥ កន្លងទៅ, ការវាយតម្លៃស្ថានភាពសេដ្ឋកិច្ច ក្នុង​ក្រប​ខ័ណ្ឌ​ហិរញ្ញវត្ថុសាធារណៈ រយៈពេលមធ្យមឆ្នាំ២០២៦-២០២៨ បានរំពឹងថា កំណើន​សេដ្ឋកិច្ច​កម្ពុជា​ក្នុងឆ្នាំ២០២៥ នឹងថមថយមកក្នុងរង្វង់ ៥,២% ដោយសារ ការរំពឹងទុក​បច្ច័យ​អវិជ្ជមាន នៃ​ការអនុវត្តពន្ធគយបដិកា មកលើវិស័យបម្រើការនាំចេញ។

មកដល់​ពាក់កណ្ដាលឆ្នាំនេះ, ស្ថានការណ៍បានប្រែប្រួលក្នុងទិសដៅអវិជ្ជមានជាងការរំពឹងទុក ដែល​រួមមាន ការអនុវត្តពន្ធគយ បដិការក្នុងអត្រា ៣៦% និងការបិទខ្ទប់ព្រំដែនគោកកម្ពុជា-ថៃ ដែល​អាចនឹងបន្តអូសបន្លាយរហូតដល់ដំណាច់ឆ្នាំ។ ក្រោមមូលដ្ឋាន សម្មតិកម្ម និងសូច​នាករ​ម៉ាក្រូ​សេ​ដ្ឋកិច្ច គិតត្រឹម ៦ ខែ ដើមឆ្នាំ២០២៥ កំណើនសេដ្ឋកិច្ចកម្ពុជា នឹងបន្ត​ថម​ថយ​មក​ត្រឹម​អត្រា​ត្រឹម​តែ ៥,០%, ដោយសារផលប៉ះពាល់នៃការបិទខ្ទប់ព្រំដែនគោក បានបង្អាក់​សកម្មភាព​ផលិត​កម្ម ដែលពឹងផ្អែកលើការដឹកជញ្ជូនវត្ថុធាតុដើម និងការនាំចេញ ព្រមទាំងរំហូរទេសចរ ជា​ពិសេស​ទេសចរអន្តរជាតិ ដែលឆ្លងកាត់ច្រកព្រំដែនគោក និងមួយផ្នែកទៀត, ដោយសារការ អនុវត្ត​ពន្ធគយបដិការក្នុងអត្រា ៣៦% ដែលត្រូវបានកំណត់ថា នឹងចាប់អនុវត្តពីខែសីហា ឆ្នាំ​២០២៥តទៅ ដែលនឹងមានផលជះជា អវិជ្ជមានដល់ការបញ្ជាទិញពីទីផ្សារសហរដ្ឋអាម៉េរិក ក្នុង​ត្រីមាស​ទី៤ ឆ្នាំ២០២៥។

ឯកឧត្តម សួន ម៉ិ ប្រធានសមាគមសហគ្រិនវីម៉ូនៅកម្ពុជា លើកឡើងថា ជុំវិញសេដ្ឋកិច្ចកម្ពុជានេះ ទោះ​បីកម្ពុជាបានប៉ះពាល់ ព្រំដែនគោក ក៏កម្ពុជានៅមានសហរដ្ឋអាមេរិកជួយគាំទ្រផងដែរ ទោះ​បី​កន្លង​មកមានការបង្អាក់បន្ទិច ដោយការកំណត់អត្រាពន្ធបដិកា របស់សហរដ្ឋអាម៉េរិកខ្លះៗ ក៏​មិន​មែន​ជាឧបសគ្គធំសម្រាប់កម្ពុជានោះទេ។ ជាក់ស្តែងនៅក្នុងឆ្នាំ២០២០ នៅពេល​សហរដ្ឋ​អាម៉េរិកដ​ក GSP ការនាំចេញរបស់កម្ពុជារឹងតែបន្តកើនឡើង ជួយជ្រោមជ្រែង​ដល់​ការ​នាំ​ចេញ​របស់​កម្ពុជា​កាន់តែខ្លាំង ជាក់ស្តែងមកដល់ពេលនេះ ទោះកម្ពុជាជួបបញ្ហាខ្លះៗ តែបើក្រឡេក​មើល​ការ​វិនិយោគឃើញថា កម្ពុជាបានបន្តស្រូបយកការវិនិយោគកាន់តែខ្លាំង ដែលលទ្ធផល ទាំ​ង​នេះ ​នឹងអាចជួយគាំទ្រដល់ការនាំចេញទំនិញរបស់កម្ពុជាក្នុងរយៈពេលខ្លីខាងមុខ។

ជុំវិញវិធានការផ្នែកម៉ាក្រូសេដ្ឋកិច្ចនេះ ជាទិសដៅយុទ្ធសាស្ត្រ និងគោលនយោបាយអាទិភាព, រាជ​រដ្ឋាភិបាលនៅតែបន្តប្រកាន់ខ្ជាប់នូវ អភិក្រមចំនួន២នោះគឺ៖ (១). វិធានការ​គោល​នយោបាយ​ឆ្លើយតប​ទៅ​នឹងបញ្ហាបន្ទាន់ចំពោះមុខ និងក្នុងរយៈពេលខ្លី ដោយផ្តោតលើ ការរក្សាស្ថិរភាព​ម៉ាក្រូ​សេដ្ឋកិច្ច និងហិរញ្ញវត្ថុ និងការធានាលំនឹងជីវភាពរបស់ប្រជាជន; និង (២). ទិសដៅវិធាន​ការ​គោល​នយោបាយ​ រយៈពេលមធ្យម និងវែងខាងមុខ ដែលនឹងផ្តោតលើការ​ដោះ​ស្រាយ​បញ្ហា​ជា​រចនា​សម្ព័ន្ធ ក្នុងការជំរុញការធ្វើពិពិធកម្ម ការលើកកម្ពស់ ភាពប្រកួតប្រជែង និងការកសាង​ភាព​ធន់​សម្រាប់​សង្គម-សេដ្ឋកិច្ចកម្ពុជា៕ អត្ថបទ៖ សុន រ៉ាឌី