ប្រធានគណៈកម្មការទី៨រដ្ឋសភា៖«សន្តិភាព គឺជាស្នូល និងជាបុរេលក្ខខណ្ឌនៃការអភិវឌ្ឍប្រកបដោយចីរភាព»

«សន្តិភាពគឺជាស្នូលនិងជាបុរេលក្ខខណ្ឌនៃការអភិវឌ្ឍប្រកប ដោយចីរភាព ដែលធានាសិទ្ធិរស់រានមានជីវិត (សិទ្ធិជាមូលដ្ឋានរបស់ពលរដ្ឋ) អនុញ្ញាតឱ្យពលរដ្ឋចូលរួមនៅក្នុងសកម្មភាពសង្គម សេដ្ឋកិច្ចដោយគ្មានការគំរាមកំហែង»។

នេះជាការលើកឡើងរបស់លោកជំទាវ ឡោក ខេង ប្រធានគណ:កម្មការសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារ បណ្តុះបណ្តាលវិជ្ជាជីវៈ និងកិច្ចការនារី នៃរដ្ឋសភា (គណៈកម្មការទី៨ ) នៃរដ្ឋសភា អនុប្រធានប្រចាំការសមាគមសមាជិកសភា (CAPPD) និងជាអនុប្រធានវេទិកាសភាស្តីពីប្រជាជននិងការអភិវឌ្ឍ (AFPPD) ក្នុងឱកាសដឹកនាំគណៈប្រតិភូសមាគមសមាជិកសភាកម្ពុជាចូលរួមកិច្ចពិភាក្សាអំពីផលប៉ះពាល់នៃការប្រែប្រួលអាកាសធាតុលើការអនុវត្តរបៀបវារៈឆ្នាំ២០៣០ និងវឌ្ឍនភាពនៃការសម្រេចបានផែនការសកម្មភាព ICPD និងគោលដៅនៃការអភិវឌ្ឍដោយចីរភាពនៅទីក្រុងម៉ានីល ប្រទេសហ្វីលីពីន នាថ្ងៃទី៤ ខែ កញ្ញា ឆ្នាំ២០២៥។

កិច្ចពិភាក្សានេះបានឆ្លុះបញ្ចាំងអំពីការតាក់តែងគោល នយោបាយ ច្បាប់ យន្តការ និងការជំរុញការអនុវត្តច្បាប់នៅតាមប្រទេសរបស់ខ្លួនឱ្យមានប្រសិទ្ធភាពដើម្បីឆ្លើយតបទៅនឹងបញ្ហាប្រឈមនៃការប្រែប្រួលអាកាសធាតុលើការអភិវឌ្ឍប្រកបដោយបរិយាបន្ន ដែលគិតគូរពីស្រ្តីក៏ដូចជាវិធានការនានាឆ្លើយតបទៅនឹងការកើនឡើងនៃជំងឺដោយសារការ ប្រែប្រួលអាកាសធាតុ កម្មវិធីសកម្មភាពអាកាសធាតុ ផែនការយុទ្ធសាស្ត្រដែលគិតគូរគ្រប់ជ្រុងជ្រោយទៅលើបញ្ហាសន្តិសុខស្បៀង បញ្ហាចំណាកស្រុក អំពើហិង្សាលើស្រ្តីជាដើម។

តាមរយៈកិច្ចសន្ទនាចែករំលែកបទពិសោធន៍របស់កម្ពុជា លោកជំទាវឡោក ខេង ក៏បានលើកឡើង អំពីការអនុវត្តក្នុងក្របខណ្ឌកម្ពុជា ដើម្បីសម្រេចបានការប្តេជ្ញាចិត្តរបស់ICPD និងឈានទៅសម្រេចបានគោលដៅអភិវឌ្ឍ(SDGs)។ លោកជំទាវបានជម្រាបជូនសមាជិក AFPPD អំពីកិច្ចខិតខំប្រឹងប្រែងរបស់រដ្ឋាភិបាល ក៏ដូចជាសភាកម្ពុជាក្នុងការជំរុញការអនុវត្តគោលនយោបាយ ច្បាប់ រួមមានការបង្កើតគណៈ កម្មការពិសេសដើម្បីពន្លឿនការអនុវត្តផែនការសកម្មភាព ICPD គោលនយោបាយប្រជាជនមនុស្សចាស់និងយុវជន ផែនការ នារីរតនៈនិងផែនការសកម្មភាពទប់ស្កាត់អំពើហិង្សាលើស្រ្តីជាដើម។

សូមបញ្ជាក់ថាសន្និសីទប្រចាំឆ្នាំនៃ AFPPD ក៏បានពិភាក្សាអំពីការពង្រឹងស្ថាប័ននេះឱ្យមាននិរន្តរភាព និងភាពជាដៃគូជាមួយបណ្តាស្ថាប័នពាក់ព័ន្ធផ្សេងៗទៀតនៅលើពិភពលោក ដើម្បីចូលរួមទាំងអស់គ្នានៅលើផ្លូវដែលត្រឹមត្រូវក្នុងការសម្រេចបានសមភាពយេនឌ័រ ការឆ្លើយតបទៅនឹងបញ្ហារបស់យុវជន សុខុមាលភាពប្រជាជនមនុស្សចាស់សកម្ម និងការប្រែប្រួលអាកាសធាតុ៕