កម្ពុជា និងទីម័រឡេស្តេ បន្តពង្រឹង​កិច្ច​សហប្រតិបត្តិការ​រវាងប្រ​ទេស​ទាំង​ពីរ​កាន់​តែ​រឹងមាំ​ថែ​ម​ទៀត​លើ​វិស័យ​កសិកម្ម

ភ្នំពេញ៖ រាជរដ្ឋាភិបាលកម្ពុជា និងទីម័រឡេស្ត បានឯកភាព​គ្នា​ក្នុង​ការ​បន្ត​ពង្រឹង​កិច្ច​សហ​ប្រតិបត្តិ​ការ​រវាង​ប្រទេសទាំងពីរឱ្យកាន់តែរឹងមាំបន្ថែមទៀត ជាពិសេសលើវិស័យកសិកម្ម ដែលប្រទេស​កម្ពុជា​កំពុង​ក្លាយជាតួអង្គសំខាន់មូយនៃការផ្គត់ផ្គង់ស្បៀងអាហារទាំងក្នុងតំបន់ និងសកល។

យោងតាមក្រសួងកសិកម្ម រុក្ខាប្រមាញ់ និងនេសាទ កាលពីរសៀលថ្ងៃទី៣ ខែកញ្ញា ឆ្នាំ​២០២៥​កន្លង​ទៅ ឯកឧត្តមរដ្ឋមន្រ្តី ឌិត ទីណា បានទទួលជួបជាមួយ លោក Marcos dos Reis da Costa ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋប្រជាធិបតេយ្យទីម័រឡេស្តេ ប្រចាំ​ព្រះរាជាណាចក្រកម្ពុជា ដើម្បីពិភាក្សាការងារមួយចំនួនពាក់ព័ន្ធវិស័យកសិកម្ម។

ក្នុងជំនួប​នាឱកាសនោះ ឯកឧត្តមរដ្ឋមន្ត្រី បានសម្តែងការស្វាគមន៍ និងអបអរសាទរ ឯកឧត្តម​ឯក​អគ្គ​រដ្ឋ​ទូត ក្នុងការកាន់តំណែងថ្មី ហើយបាន​ពិភាក្សា​ការ​ពង្រឹង​កិច្ច​សហប្រតិបត្តិ​ការ​រវាង​ប្រទេស​ទាំងពី​រ​ឱ្យកាន់តែរឹងមាំបន្ថែមទៀត ជាពិសេសការពិនិត្យលទ្ធភាពជំរុញកសិ-ពាណិជ្ជកម្ម ការ​ធានា​សន្តិសុខស្បៀង និងការផ្លាស់ប្តូរកម្មសិក្សាកសិករប្រទេសទាំងពីរ៕ អត្ថបទ៖ ឈិត បូរ៉ាវី