សម្ដេចធិបតី នាយករដ្ឋមន្រ្ដី អបអរសាទរ ខួបលើកទី២៥ ទិវាអក្ខរកម្មអន្តរជាតិ ក្រោមប្រធានបទ «ការលើកកម្ពស់អក្ខរកម្ម ក្នុងយុគសម័យឌីជីថល»

ភ្នំពេញ៖ នៅព្រឹកថ្ងៃទី៨ ខែកញ្ញា ឆ្នាំ២០២៥នេះ សម្ដេចមហាវរធិបតី ហ៊ុន ម៉ាណែត នាយករដ្ឋ​មន្រ្ដី​នៃកម្ពុជា បានផ្ញើសារអបអរសាទរ ខួបលើកទី ២៥ ទិវាអក្ខរកម្មអន្តរជាតិ ក្រោមប្រធានបទ «ការ​លើកកម្ពស់អក្ខរកម្ម ក្នុងយុគសម័យឌីជីថល»។

សម្ដេចធិបតី បានមានប្រសាសន៍ថា ប្រធានបទដ៏សំខាន់មួយនេះ សំដៅបង្កើន​ការ​យល់​ដឹង​កាន់​តែ​ទូលំ​ទូលាយ ក្នុងចំណោមប្រជាពលរដ្ឋនៅទូទាំងប្រទេស អំពីសារៈសំខាន់នៃកម្មវិធីអក្ខរកម្ម និង​ការ​ជំរុញគ្រប់ភាគីពាក់ព័ន្ធ ឱ្យចូលរួមគាំទ្រក្នុងការលើកកម្ពស់កម្មវិធី អក្ខរកម្ម​ក្នុង​យុគ​សម័យ​ឌីជីថល និងការអភិវឌ្ឍសមត្ថភាព ជាពិសេសជនបាត់បង់ឱកាស ជនងាយរងគ្រោះ យុវជ​ន​ក្រៅ​សាលា កម្មករ កម្មការិនីរោងចក្រ កុមារ និងយុវជនជាជនជាតិដើមភាគតិច ដើម្បីក្លាយ​ខ្លួន​ជា​ធន​ធាន​មនុស្ស​ប្រកបដោយថាមពល គុណភាព និងភាពជាពលរដ្ឋសកល និងចូលរួមចំណែក​ដល់​ការ​បង្កើន​ល្បឿន​នៃ​កំណើនសេដ្ឋកិច្ច និងធ្វើឱ្យសង្គមជាតិទាំង​មូល​រីក​ចម្រើន​ជឿន​លឿន​ទៅមុខ​។

សម្ដេចនាយករដ្ឋមន្រ្ដីបានថ្លែងថា បន្ថែមលើនេះ ប្រធានបទដ៏សំខាន់ខាងលើ ក៏ស្រប​ទៅ​នឹង​ទស្សនៈ​វិស័យ​របស់រាជរដ្ឋាភិបាលកម្ពុជា ដែលបានដាក់ចេញនូវក្របខ័ណ្ឌ គោលនយោបាយ​សេដ្ឋកិច្ច និងសង្គមឌីជីថលកម្ពុជា ២០២១-២០៣៥ ដើម្បីឆ្លើយតបនឹងបដិវត្តន៍ឧស្សាហកម្ម ជំនាន់​ទី៤ ពោល គឺកសាងបាននូវពលរដ្ឋឌីជីថល រដ្ឋាភិបាលឌីជីថល និងធុរកិច្ចឌីជីថល៕