៩ខែ ឆ្នាំនេះ ច្រកទ្វារព្រំដែនអន្តរជាតិបាវិត មានភ្ញៀវចម្រុះជាតិសាសន៍ជាង១លាននាក់បានធ្វើដំណើរឆ្លងកាត់

ស្វាយរៀង ៖ មន្ត្រីបានឱ្យដឹងថា ៩ខែ ឆ្នាំនេះ ច្រកទ្វារព្រំដែនអន្តរជាតិបាវិត ក្នុងខេត្តស្វាយរៀង មានភ្ញៀវចម្រុះជាតិ សាសន៍ជាងមួយលាននាក់ បានធ្វើដំណើរឆ្លងកាត់ចូលមកកម្ពុជា ។

​មន្ត្រីជំនួយការច្រកទ្វារព្រំដែនអន្តរជាតិបាវិត ខេត្តស្វាយរៀង លោក ពុធ សុភាកែវ នៅថ្ងៃទី១ ខែតុលា នេះ បានប្រាប់BTVថា ក្នុងរយៈពេល៩ខែ ឆ្នាំ២០២៥នេះ ច្រកទ្វារព្រំដែនអន្តរជាតិ មានភ្ញៀវចម្រុះជាតិសាសន៍ ចូល មកទស្សនាកម្ពុជា ប្រាង្គប្រាសាទអង្គរវត្ត រមណីយដ្ឋានធម្មជាតិ ធ្វើជំនួញ ធ្វើកម្មសិក្សា ចំនួនជាង១លាន ២សែន ៩ម៉ឺននាក់ ស្មើនឹង១៥៨សញ្ជាតិ បើប្រៀបធៀបរយៈពេល៩ខែ ឆ្នាំ២០២៤ មានការថយចុះជាង២២ភាគរយ ។

លោកបានបញ្ជាក់បន្ថែមថា ទន្ទឹមនឹងភ្ញៀវចូលក្នុងរយៈពេល៩ខែនេះ ច្រកទ្វារព្រំដែន ក៏មានភ្ញៀវធ្វើដំ ណើរចេញ បន្ទាប់ពីទស្សនា និងទំនាក់ទំនងធ្វើពណិជ្ជកម្ម មានចំនួនជាង១លាន ២សែន ៧ម៉ឺននាក់ មាន១៦១ សញ្ជាតិ បើប្រៀបធៀបរយៈពេល៩ខែ ឆ្នាំ២០២៤ មានការកើនឡើងជាង១១ ស្មើនឹង១៦០សញ្ជាតិ។

លោកបានបញ្ជាក់ថាដើម្បីបញ្ជៀសជំងឺផ្សេងៗ ឆ្លងតាមរយៈភ្ញៀវ និងមធ្យោបាយ មន្ត្រីចត្តាឡីស័កប្រចាំ ច្រក បានធ្វើការត្រួតពិនិត្យសុខភាពមនុស្សដោយធ្វើការវាស់កំដៅ និងធ្វើជីវសុវត្ថិភាព (បាញ់ថ្នាំសម្លាប់មេរោគ លើមធ្យោបាយធ្វើដំណើររថយន្ត) ជាអចិន្ត្រៃយ៍ បើទោះជាបច្ចុប្បន្នសញ្ញាជំងឺគ្មានឆ្លងចូលមកកម្ពុជាក្តី ៕

អត្ថបទ៖ ភា សារិត ​